1, 2. (a) ‘Cipo ca Mwari co pambhene cicikasananguriki’ cinobatanijenyi? (b) Mubvunjo japi jaticazovona pa musoro uno?

JEHOVHA paakatumira Mwana wake wo dangwe umwe basi kuviya pasi pano, Iyena wakapa cipo caizova cakanakisisa co rudo! (Jo. 3:16; 1 Jo. 4:9, 10) Mupostori Pauro wakacidanija kuti ‘cipo ca Mwari co pambhene cicikasananguriki.’—2 Kor. 9:15, Shanduro yeNyika Itsva. Ngenyi iyena wakashandisa gama iri?

² Pauro waizviziva kuti zvigondiso zvese zvakanakisisa zva Mwari, waizviita ecishandisa mupiro wakakwana wa Kristu. (Verenganyi 2 VaKorinto 1:20.) Ngo zvokadi kuti, ‘cipo . . . co pambhene cicikasananguriki,’ cingabatanija zvese zvakanaka zve rudo hwokadi hwaizotipa Jehovha ecishandisa Jesu. Hina, cipo ici cinoshamaisa maningi, zvokuti zvinonesa kunasa kucisanangura. Kuashira cipo ici cinokahamaja kunodikana kutipsasisa kudini? Cipo ici cinodikana kutikwevejera ngo maitiro api anoshanda patinonga tecinasirira kuitira Cirangarijo co rufu hwa Kristu cinoitika mu Citatu, njiku yo 23 Soka ra Baba, 2016?

3, 4. (a) Munozwa kudini pamunoashira cipo? (b) Cipo cinosisira co rudo cingapsasisa kudini mararamiro amunoita mu upenyu hwenyu?

³ Pamunoashira cipo, apana kukana-kana kuti munocidakarira kamare. Asi, zvipo zvimweni zvingava zvinosisira kana zvino revo zvokuti zvingacinja kamare upenyu hwenyu. Inga muezaniso, ngatiti muri kuda kuurawa ngo kuti makaita cishaishi cikuru mu cifise-fise. Ngo cibvumbu, panoguma mundhu wamucikazivi, onghwina pakati po mbungano zve ojipira kuuraiwa pa ndau penyu. Ngo cido cese, iyena anoda kamare kuuraiwa pa cinyau cenyu! Maizova no mazwire akadini ngo Cipo ici?

⁴ Kuashira mazwi aya o rudo acina umbau, zvokadi kamare kwaizomuita kuti murangarirezve ngo pamusoro po zvamunoita zve pikija kutocinja mararamiro omainga nawo. Izvi zvaizomukwevejera kuti muve anokova, kuti mude vamweni, zve pikija no kutoregereravo vamweni vanonga vamushaishira. Mu upenyu hwenyu hwese, maizobongesera maningi mundhu wakafaya pa ndau penyu ngo cido cese.

5. Cipo ca Mwari co muripo cakakurisa kudini kudarika cipo cimweni ciri cese?

⁵ Asi, Jehovha wakatipa ciro cikuru maningi cinodarika cipo casananguhwa pa muezaniso uwu, ecishandisa Kristu. (1 Ped. 3:18) Ngativone kuti ngenyi. Ngo ndava yo kugara utaka hwo cishaishi, tese tiri kuwira mu kufa. (Rom. 5:12) Ngo rudo hwese, Jehovha wakaita kuti Jesu aviye pasi, zve kuti ‘atambe nyatwa yo rufu ngo ndava yo vese.’ (Heb. 2:9) Asipi kuti Jehovha anotisujunura pa upenyu uno basi, asi wakaronga kuti aparaje no kucikaperi zvinoitisa kuti pave no rufu. (Is. 25:7, 8; 1 Kor. 15:22, 26) Vese vanodira gonda kuna Jesu, vanozoashira upenyu ucikaperi mu runyararo no kudakara inga vatongwi vo pasi pano vo Umambo hwa Mwari wecitongwa ndi Kristu, asi kudari vakazojwa, vanozotonga pamwepo naye mu Umambo wondhowo. (Rom. 6:23; Ap. 5:9, 10) Makomborero api amweni anobatanijwa pa cipo ici cinobva kuna Jehovha?

6. (a) Makomborero api omakasoterera o ‘cipo ca Jehovha co pambhene cicikasananguriki’? (b) Pa musoro uno ticazojija njira japi ndhatu jatinokwevejehwa ngo rudo hwa Mwari?

⁶ Cipo ca Mwari cinobatanija kuraphwa ko ndhendha jese, kuita kuti nyika ive paradhiso, zve kumuswa ko vakafa. (Is. 33:24; 35:5, 6; Jo. 5:28, 29) Zvokadi, itusu tinoda Jehovha no Mwana wake anodiwa ngo kutipa ici ‘cipo . . .  co pambhene cicikasananguriki.’ Asi, mubvunjo unoramba uripo nga uwu: Rudo hwa Mwari unozotikwevejera kuti tiitenyi? Ngativonenyi kuti rudo hwa Mwari unotikwevejeresa kudini pa kuita izvi (1) kutevera mudanyu ja Kristu ngo phedo, (2) kukhombijira rudo ku hama jedu, zve (3) kuregerera vamweni ngo mwoyo wese.

7, 8. Tinodikana kuva no mazwiro api ngo pamusoro po rudo hwa Kristu, zve izvi zvinodikana kutikwevejera kuti tiitenyi?

⁷ Cokutanga, tinodikana kuita kuti upenyu hwedu uraramire Jesu Kristu. Mupostori Pauro wakati: ‘Rudo hwa Kristu hunotindundira’ (Verenganyi 2 VaKorinto 5:14, 15.) Pauro wakavona kuti itusu aticaizotendera rudo unoshamaisa wa Kristu, kudari pacina kundundihwa kana kukwevejehwa kuti timuraramire. Kudari murangariro jedu jikazwisisa zvotakaitihwa ndi Jehovha zve mwoyo jedu jokwevejehwa ngo rudo hwake, tinova no cido co kuti upenyu hwedu uraramire Jesu Kristu ngo mwiha wese. Tingakhombijisa kudini cido ici?

⁸ Vese vanoda Jehovha, vanokwevejehwa kuti vatevejere muezaniso wa Kristu, kufamba  inga mafambire aakaita zve kutevera mudanyu jake ngo phedo. (1 Ped. 2:21; 1 Jo. 2:6) Ngo ndava yo kugondeka kwedu, itusu tinokhombija rudo hwedu kuna Mwari na Kristu. Jesu wakati: ‘Anopurukira mupango yangu no kuiteveja, ngaanondida zvokadi. Wiya anondida, anozodiwa ndi Baba wangu. Inini ndinozomuda no kujivonesa kwaari.’​—Jo. 14:21; 1 Jo. 5:3.

9. Kuvangirijwa kwapi kuno vateveri va Jesu Kristu?

⁹ Pa nguva yo Cirangarijo, zvingava zvakanaka kuti tirangarijisise mararamire edu. Jibvunjisenyi pacenyu kuti: ‘Mu mativi api andiri kubudirira ushoni mu kutevera mudanyu ja Jesu Kristu? Mu mativi api andingadikana kuitisa nane?’ Kujipopora uku kunosisira, zvecivoneka kuti nguva jese tiri kuvangirijwa kuti titevere mufambiro wo nyika ino. (Rom. 12:2) Kudari tikatama kungwarira, tingazoguma pa kuva vajiji vo uzivi hwo nyika, kana kutoireremeja zve kuva shasha jo mutambo. (Kol. 2:8; 1 Jo. 2:15-17) Tingazviitisa kudini kuti tirambe kuvangirijwa kwakadaro?

10. Mubvunjo japi jatingazviita pa nguva yo Cirangarijo, zve izvi zvingatikwevejera kuti tiitenyi? (Vonanyi pikica yo kutanga.)

¹⁰ Tingashandisa nguva yo Cirangarijo inga mukana wo kusotesesa nguvo jedu, mafirime edu, mumbo jedu, pikija zviro zviri mu komputadhori jedu, zviri mu mafoni edu, zve zviri mu mathabhureti edu. Inga zvamunosotesesa ku nguvo jenyu, jibvunjisenyi kudari: ‘Kudari ndaizoenda ku ndau yaizonga ina Jesu, zvaizondirerukira here kusimira nguvo iji?’ (Verenganyi 1 Timoti 2:9, 10.) ‘Kudari ndikasimira ici, vese vaizozvitenda here kuti ndiri muteveri wa Jesu Kristu?’ Tingazviita mubvunjo jakafanana ngo pamusoro po makhetere atinoita mafirime no mumbo jedu. ‘Jesu waizodakajwa ngo kuvona firime iyi kana kuti ngo kupurukira mumbo uwu here? Kudari ndikamushongeja foni kana thabhureti yangu, ndaizopseruka ngo zvaaizovona mondhomo here?’ Tikananga ngo pamusoro po shwiro yo kutamba vhidhio gemu, ngatijibvunjise kudari: ‘Ndingazozvivona zvecinesa kusanangurira Jesu kuti ngenyi ndecitamba vhidhio gemu iyi here?’ Rudo hwedu na Jehovha, unodikana kutikwevejera kuti tibvise ciri cese caizova cicikafaneri ku vajijisi va Kristu, azvinenyi kuti cino mutengo wakadini. (Mait. 19:19, 20) Takagondesa paya potakajipira kuti aticaizojiraramira asi taizoraramira Kristu. Ngo kudaro, atidikani kunamirira pa ciri cese caizotipiningija pa kutevera mudanyu ja Kristu ngo phedo.​—Mt. 5:29, 30; Fil. 4:8.

11. (a) Rudo hwedu na Jehovha pomwe na Jesu unotikwevejeresa kudini mu basa ro kucumaira? (b) Rudo hwedu ungatikwevejeresa kudini kuti tibesere vamweni mu ungano?

¹¹ Rudo hwedu na Jesu, unotikwevejeravo kuti tishande ngo mwiha wese mu kucumaira zve mu basa ro kuita vajiji. (Mt. 28:19, 20; Lc. 4:43) Pa nguva yo Cirangarijo, tinozova no mukana wo kushanda inga mapiyona o besero anopeja 30 kana 50 o nguva mu basa ro kucumaira. Munganasirisa mugariro wenyu kuti muitevo zvondhozvo here? Mwanarume umweni acina mukaji ano makore 84 o kubahwa, aacaizvigonda kuti waizokwanisa kuita upiyona wo besero ngo ndava yo makore no uhomi hwake hwaindomunesa-nesa. Pikija zvakadaro, mapiyona o mundharaundha make aida kumubesera. Mapiyona aya akamupa cifambiso zve no kungwarira kwese akakheta ndima yaaizoshanda, pakupejisira wakazokwanisa 30 o nguva yaaida. Maizokwanisa kupsaka no kubesera ari wese mu ungano yenyu kuti akwanisevo kukovana mu mudakaro wo kuita upiyona wo besero pa nguva yo Cirangarijo here? Ngo zvokadi kuti, asipi vese vedu vangakwanisa kuita upiyona wo besero. Pikija zvakadaro, tingashandisa nguva iri yese kana simba ratinaro, kuti tiengejere kujipira kwedu pa kukuja Jehovha.  Ngo kuita izvi, tinojivonesa kuti takadari inga ndi Pauro, uwo wakakwevejehwa ngo rudo hwa Kristu. Rudo hwa Mwari unotikwevejerazve kuita cinyi?

12. Rudo hwa Mwari unotikwevejera kuti tiitenyi?

¹² Cocipiri, mupostori Johani wakaziva kuti rudo hwa Mwari waizotikwevejera kuti tiitire rudo hama jedu. Johani wakatara kudari: “Vokudikana, kudari Mwari watidisisa kudaro, itusuvo tinodikana kudisana ngocedu.” (1 Jo. 4:7-11) Hina, atingakwanisi kamare kutendera rudo hwa Mwari asi ticikakwanisi kuda hama jedu. (1 Jo. 3:16) Tingakhombijisa kudini rudo hwedu mu njira jinoshanda?

13. Jesu wakagaja muezaniso wapi wo kuda vamweni?

¹³ Ngativonenyi muezaniso wa Jesu. Panguva yo mushando wake wo pasi pano, iyena wakapa ngwariro inosisira kuno vanozvidodokesa. Iyena wakawana vaya vakaremba mu muviri​—vakaremara, mapofu, vacikazwi, zve mbeveve. (Mt. 11:4, 5) Jesu wakava no mudakaro ngo kucumaira vainga no njara, avo vaivoniwa ngo vatungamiriri vo vaJudha inga vandhu “vakatukwa.” (Jo. 7:49) Iyena waida vanozvidodokesa ava zve wakashanda ngo simba kuti avabesere.​—Mt. 20:28.

14. Ngo zvapi zvamungaita pacenyu kuti mukhombijire rudo hwenyu ku vamweni vo mu ungano yenyu?

¹⁴ Nguva yo Cirangarijo inopekeja mukana wo kutevejera Jesu, ngo kutora nguva kuitira kubesera hama no hambzaji mu ungano yenyuyo kamare. Inga zvamunoita kudaro, apana kukana-kana kuti munozovona vamweni vanozobeserekana ngo rudo hwenyu. Jitoriyo kare hama no hambzaji jiri kuda kubesehwa. Maizokwanisa kubvakacira vanodiwa ava here? Maizovapa cokuha, maizovabesera pa basa ro pamuzi, kuvatora kuenda navo ku musongano, kana kuvakoka kuti mushande navo mu basa ro kucumaira here? (Verenganyi Luka 14:12-14.) Tinodikana kusiya kuti rudo hwa Mwari utikwevejere pa kupsaka no kukhombijira rudo hwedu ku hama jedu.

15. Inga vana va Adhamu, cicinyi catinodikana kuziva?

¹⁵ Cocitatu, rudo hwa Jehovha unodikana kutikwevejera kuti tiregerere hama no hambzaji jedu. Inga vana vo mundhu wo kutanga Adhamu, itusu takagara utaka hwese hwo cishaishi no muviyo waco, rufu. Apana na umwe wedu angananga kuti, “Inini andidi muripo.” Pikija vashandiri vakatendeka va  Mwari, vanoda kamare unyasha ucikafaneri wa Jehovha ecishandisa Kristu. Umwe nga umwe wedu anodikana kuziva kuti itusu takaregerehwa gava guruwani. Ngenyi izvi zvinosisira? Mupinguro unowanika pa umwe wo muezaniso ja Jesu.

16, 17. (a) Ngo zvapi zvatinodikana kujija ngo muezaniso wakaizwa ndi Jesu wa mambo wakaregerera gava guruwani? (b) Pasure po kurangarijisisa muezaniso wa Jesu, zvicinyi zvomasunga kuita?

¹⁶ Jesu wakananga ngo pamusoro pa mambo kuti wakaitisa kudini kuti aregerere muranda wake gava rakakura kamare ro 10.000 zvo matarenta, kana kuti 60.000.000 o madhenari. Asi, muranda uwu wakaregerehwari kamare, aazivi kuda kuregerera cigava cidoko co mudoni wake, cainga co 100 ro madhenari. Mambo wakanyangajwa maningi paakazwa kushata mwoyo ko mushandi waaingaya aitira unyasha. Mambo wakati: ‘Muranda wakashata. Ndakukungurira magava ako ese ngokuti wandiririra. Iwewevo aucaidikanepi kuitira unyasha mudoni wako, inga inini ndakuitiravo unyasha?’ (Mt. 18:23-35) Hina, unyasha unoshamaisa wa mambo, waidikana kukwevejera muranda wondhowo kuti aregerere mudoni wake. Mukufanana, cicinyi catinokwevejehwa kuita ngo rudo no unyasha hwa Jehovha?

¹⁷ Tinodikana kushandisa nguva yo Cirangarijo inga mukana wo kuvona kuti takaviga bundu no hama kana hambzaji iri yese here kana kuti haiwa. Kudari tinaro, iyi ndiyona nguva yakanaka yotaizotevejera Jehovha, uwo wakanasirira ‘kukungurira.’ (Nee. 9:17; Ndu. 86:5) Kudari tecibonga zvakatiitira Jehovha ngo kupfujura gava redu guruwani, tinozoda kuregerera vamweni ngo mwoyo wese. Atingaashiri rudo no kuregerera ka Mwari, kudari ticina rudo zve kudari ticikaregererivo vamweni. (Mt. 6:14, 15) Pikija hazvo kuregerera kucikazocinji zvokare, izvi zvicaita kuti kumbeji kwedu kuve kwakanaka kamare.

18. Rudo hwa Mwari wakabeseresa kudini hambzaji imweni kuti icungirire kutama kukwana ko hambzaji yo ku ungano?

¹⁸ Ku vazinji vedu, ‘kuceukijana’ njiku no njiku pamwepo no hama no hambzaji jedu, zvingava zvinonesa. (Verenganyi VaKolosi 3:13, 14; VaEfeso 4:32.) Inga muezaniso, Lilyi hambzaji icina mwamuna mu ungano, iyo yakabesera ngo cido cese noni imweni yaidanijwa kuti Karol. ^[1] Lily wakabesera Karol ngo cifambiso, wakamuitira basa, zve wakamukhombijira kunaka mwoyo mu njira zinji jinoshanda. Pikija hazvo Lily akaita zvese izvi, Karol wakandoramba ecineseka zve zvainga zvicizivi kureruka kumubesera. Asi, Lily wakasotesesa mugariro jakanaka ja Karol. Iyena wakaramba ecimubesera ko makore akawanda mbhera ndhendha ya Karol yapindirija kamare, zve wakazofa. “Pikija zvakadaro” Lily wakati: “Ndinosoterera kuzovona Karol ecimuswa. Ndinoda kumuziva paanonga aano mugariro wakakwana.” Hina, rudo hwa Mwari ungatikwevejera kuti ticungirire hama no hambzaji jedu zve zvicatiita kuti tisoterere nguva iyo yo kuti kutama kukwana ko vandhu kucazopera mbhera narini.

19. Mungakwevejereswa kudini ngo ‘cipo ca Mwari co pambhene cicikasananguriki’?

¹⁹ Itusu tinoashiradi kamare ‘cipo . . . co pambhene cicikasananguriki’ cinobva kuna Jehovha. Narini atizodi kurerusa cipo ici cinosisira. Kusiapo izvi, maningi-ningi pa nguva yo Cirangarijo, ngative tecibongesera kamare ku zvese zvotakaitihwa ndi Jehovha na Jesu. Hina, rudo hwavo ngahutikwevejere kuti titevere Jesu ngo phedo, kuti tipsake no kuitira rudo hama jedu, zve kuti tiregerere hama jedu zvecibva pa mwoyo.