KUITIRA MAJAHA NO VASIKANE
9: Muri Mundhu wo Mushovonyi
ZVINOREVENYI?
Kuziva kuti muri mundhu womushovonyi azvifiri pa kuziva zina renyu no mavonekero enyu o kunja. Zvinobatanija zvese zviya zvamunoreremeja, zvamunotenda no undhu hwenyu.
NGENYI ZVINOSISIRA?
Kudari munoziva kuti muri mundhu wo mushovonyi, amuzotenderi kuvangirijwa ngo vadoni venyu vo kushikora. Munotoita mukuzwirana no zviya zvamunotenda.
“Vandhu vamweni vakadari inga maboneko atinovonaya mu rojha. Anoita ngo kukhetehwa nguvo jaanodikana kusimira.”—Adriani.
“Inini andithyi kuita zviro zvandinoziva kuti zvakanaka. Ndinoziva shamwari jangu ngo manera ajinoita zviro no manera andinoita patinonga tiri tese.”—Korteni.
BHAIBHERI RINOTI: “Regeranyi kuumbwa ngo nyika ino, motendera kuti Mwari acinje murangariro wenyu.”—Varoma 12:2.
ZVICINYI ZVAMUNGAITA?
Kuziva kuti ngozvapi zvamunokwanisa kuita no zvamucikakwanisi kuita pamwepo no kuziva zvamunotenda, zvinozomubesera kuti muzive kuti muri mundhu wo mushovonyi wari no mundhu wamunozova kumbejiyo. Mungatanga kuita izvi ngo kudavira muvhunjo jinoteverari.
Zvamunokwanisa kuita: Izviro zvapi zvakanaka zvandinoita? Ngozvapi zvandinokwanisa kuita? Inga muezaniso, kuti muzive zvamunokwanisa kuita, jivhunjisenyi kudari: Ndiri mundhu anojibata? Ndiri mundhu anoshanda ngo simba? Ndinodakarira kupa vamweni zviro zvangu? Kudari ndapangana kusongana no mundhu, ndinokasika kuguma here?
ZANO: Munonesehwa kuziva zvamunokwanisa kuita here? Ngo kudaro, kumbiranyi vabari venyu kana shamwari yamunothemba kuti vanange zviro zvaushoni zvavanovona kwamuri no mathangwe anoitaro kuti vanange zvondhozvo.
BHAIBHERI RINOTI: “Umwe na umwe ngaasotesese zviito zvake, akadaro anozodakara ndizvona, acikajiezanisi no vamweni.”—Vagaratiya 6:4.
Zvamucikakwanisi kuita: Ngozvapi zvandinodikana kuitisa nane pa undhu hwangu? Ngopapi pandinovona zvecinesa kucungirira muejo? Ngopapi pandinodikana kuengejera kujibata kwangu?
BHAIBHERI RINOTI: “Kudari tikananga kuti: ‘Atina cishaishi,’ tiri kujicengeja tega.”—1 Johani 1:8.
Zvamunotenda: Ngozvapi zvakanaka kana zvakashata kwandiri? Ngenyi ndinorangarira kudaro? Ndinotenda kuti Mwari ariyo? Zvicinyi zvinondikhohwesa kuti iyena ariyo? Ngozvapi zvandinorangarira kuti azvizivi kururama, ngenyi ndinorangarira kudaro? Zvicinyi zvandinotenda kuti zvinozoitika kumbejiyo?
BHAIBHERI RINOTI: “Hwiru hunozokungwarira, bzokadi bzinozokuthavira.”—Mazwi Akangwara 2:11.
Zvimweni Zvamungadakarira nga Izvi:
MUBINGURO JO 10 RO MUBVUNJO JINOBVUNJISWA NGO VOCIDOKO
Ndiri Ani?
Kuziva zvinokutungamirira, simba, zvaucikakwanisi, zve zvidisiso zvinozokubesera kuti uite zvisungo zvoungwaru paunonga wecivangirijwa.
