Inga vabari, muno mugariro jamunosana kutevejera. Inga muezaniso, kunanga kuti munoeja kuva vandhu vakagondeka here? Kudari muri vandhu vakagondeka, mungatodavo kujijisa vana venyu kuti vave vakagondeka.

Mungatodavo kujijisa vana venyu kuti vave vandhu vanoshanda ngo simba, vakanaka no vanorangariravo ngo kugara ushoni ko vamweni. Mwana anodikana kujijira izvi paanonga aciri mudoko.

BHAIBHERI RINOTI: “Jijisai mwana gwanja rinosisira: akakura, aazorisii.”—Mazwi Akangwara 22:6.

Foni no terevhisori, zviri kubudisa zviro zvicikaripi zvaushoni. Mai vamweni vanodanwa Karina, vakati: “Zviro zvakashata zvingavoniwa mu foni pa nguva iri yese. Pikija pa nguva yatinonga takagara no vana vedu, zvingaita kuti ivona vari kutovona zviro zvakashata mu foni!”

BHAIBHERI RINOTI: “Vandhu vakura . . . vanoita kuti simba ravo ro kuzwisisa rijijiswe kusiyanisa zvakanaka no zvakashata.”—Vahebheru 5:14.

Kuva no mugariro jakanaka kunosisira maningi. Izvo zvinobatanija kunanga zviro zvakadari inga “ndapota,” “ndabonga.” Zvinobatanijazve kuvonesa kwedu kuti tinoneseka ngo vamweni. Izvi azvinyanyi kuitwa maningi mu njiku jino, ngokuti vandhu vazinji vakabatikana maningi ngo foni.

BHAIBHERI RINOTI: “Zvamunoda kuti vandhu vamuitire, vaitirenyivo zvondhozvo.”—Ruka 6:31.

Nasanyi kujekesa kuti ngozvapi zvamakajijiswa. Inga muezaniso, kupsakisiswa kumweni kwakaitwa, kwakavonesa kuti majaha anoregera kuita zvo vatano vacito vacadha, kudari vakazvijijiswa kuti kuita zvondhozvo kwakashata.

ZANO: Kuti mukwanise kubhuya no mwana wenyu ngo pamusoro po mugariro jakanaka, shandisanyi masoko amavha kuvona mu terevhisori kana ciitiko cimweni haco. Kudari masokoo ari kubhuya ngo pamusoro po kunyenyana ko vandhu, mungavhunja mwana wenyu kudari: “Manera vandhu vari kunyenyana mazuva ano, zvinoyangaja maningi. Unorangarira kuti ngenyi vandhu vanoita zviro zvakadari?”

“Vana vanonesehwa maningi kusana kuti ngozvapi zvakanaka kana zvakashata, vacikazivi kuzvijijiswa.”—Brandoni.

Jijisanyi vana venyu mugariro jaushoni. Pikija vana vadoko kamare, vanokwanisavo kunanga zviro zvakadari inga izvi, “ndapota,” “ndabonga” no kuitiravo vamweni zviro zvakanaka. Bhuku rimweni rinobhuya ngo pamusoro po kurera vana, rakati: “Vana pavanovona kuti zvavari kuita zviri kubesehwa ngo mbhuri yavo, shikora no ndharaundha, vanoengejera kuita kwavo zviro zvakanaka kuti vabesere vamweni kusiyapo kuita zvakavanakira basi.”

ZANO: Ipanyi vana venyu mabasa o pa muzi kuti vaite. Ngo kudaro, ivona vanozovona kuti zvinosisira maningi kuita zviro kuti vabesere vamweni.

“Kudari vana vedu vakaroveja wari kuita mabasa o pa muzi, avazoneseki maningi pavanonga vecigara vega. Ngokuti vanonga vatozviroveja.”—Tara.