Vandhu vazinji vanorangarira kuti Zvapupu zva Jehovha i zina ro ciara cipsa. Ngo kudaro, makore ano pindirija 2.700 akapera, vashandiri va Mwari umwe wo kadi-kadi vaizivikanwa inga “fakazi (zvapupu)” jake. (Isaia 43:10-12) Mbhera gore ro 1931, itisu taizivikanwa inga Vajiji vo Bhaibheri. Ngenyi takatora zina rokuti Zvapupu zva  Jehovha?

Iri rinozivisa Mwari wedu. Mukuzwirana no matahwa o kare, zina ra Mwari, Jehovha, raiwanika kanokwana zviuri no zviuri mu Bhaibheri. Vasanduji vazinji vo Bhaibheri zina iri vakaricinja vo dira mazina o kureremeja okuti Tenji kana Mwari. Asi Mwari wo kadi-kadi wakajizivisa pacake kuna Mosi ngo zina rake, Jehovha,  eciti: “Iri ndirona zina rangu ku makore ese”. (Exodo 3:15) Mu njira iyi, iyena wakajisiyanisa no zvimwari vese vo manyepo. Itusu tinomudakaro mukuru ngo kutora zina rakacena ra Mwari.

Iri rinozivisa basa redu. Pa mundandanda wakareba wo vandhu vo kare, kutanga ngo mururami Abheri, vakapa ucapupu ngo pamusoro po gonda ravo kuna Jehovha. Mu mazana omakore, Noa, Abrahama, Sara, Mosi, Dhavhidhi zve no vamweni vakabatanijwavo pa “njama huru yo fakazi.” (Vaheberi 11:4–12:1) Kudari inga mundhu anopa ucapupu pa dare mu zina ro mundhu acina ndava, itusuvo takatema civaringo co kuzivisa zvokadi ngo pamusoro pa Mwari wedu.

Itusu tiri kutevejera Jesu. Bhaibheri rinodanija Jesu kuti “mufakazi anogondeka no wokadi-kadi.” (Apokalipsi [Cakapangijihwa] 3:14) Jesu pacake wakananga kuti iyena ‘wakazivisa zina ra Mwari’ zve wakaramba eciita ‘ ufakazi wo zvokadi’ ngo pamusoro pa Mwari. (Johani 17:26; 18:37) Ngo kudaro, vatevereri vokadi va Kristu vanodikana kutora zina ra Jehovha zve voriita kuti rizivike. Zvapupu zva Jehovha zvinovangirira kuitavo zvondhozvo.

• Ngenyi Vajiji vo Bhaibheri vakatora zina ro kuti Zvapupu zva Jehovha?

• Kubvira rini Jehovha ano Zvapupu zvake pasi pano?

• Capupu cikuru ca Jehovha ndiani?