Jesu wapera kuita mukumbiro no vapostori vake vakagondeka. ‘Novapera kuimba ndumbo, vanobuda voenda ku dundhu ro Maolive.’ (Marco 14:26) Vanoenda kumabvazuva, ku munda unodaninjwa Getsemani. Kazinji Jesu anociendeyo maningi.

Ivona vanoguma pandau inodakajisa maningi pakati po muti jo muorivhe. Jesu anosia vapostori vasere pondhopo. Zvingaita kuti vainga vari ngo phedo no pamusuvo wainghwina mu munda, zvecivoneka kuti iyena wakavabvunja kuti: “Garanyi pano, inini ndinoenda iyoo konamata [kana kuita mukumbiro].” Jesu anotora Pedhru, Jakobo, na Johani wonghwina navo mu munda. Anosuruvara maningi wobvunja vatatu ava kuti: “Mwiha wangu uri mu ngozi yo kufa. Garanyi pano murindire na inini.”—Mateu 26:36-38.

Ecifunduruka padoko pakati pavo pa mukuvo uwu unonesa, Jesu ‘anogwadama pasi wokumbira’ kuna Mwari eciti: “Abba! bzese bzinokwanisika komuri. Fundurusanyi mukheyo uu kondiri; kaveta kucaitika kuda kwangu; ngakuitwe kuda kwenyu.” (Marco 14:35, 36) Jesu ari kuda kunangenyi ngo magama aya? Kunanga kuti ari kuda kuramwa kuva muponesi? Haiwa!

Ari kudenga, Jesu wakavona matambujiko aisongana no vandhu vaiurawa ngo vaRoma. Wari iyena inga mundhu wo kunyama, anohwajihwavo inga itusu. Ngo kudaro Jesu anothimwa-thimwa ngo pamusoro po dambujiko raari kuvetera. Asi cinosisira kupinda ici ngo cokuti iyena ari kuthimwa-thimwa ngo pamusoro po kuziva kuti rufu hwake inga mushaishi acikasisiri hwaizoshoresa zina ra Baba wake. Mukati mo nguva nganani, iyena anozopakaikwa pa muti inga zvinoita mundhu anoshoresa zina ra Mwari.

Pasure po mukumbiro wake wakareba, Jesu anoviya wokhanda vapostori vatatu vayani vakavata. Iyena anobvunja Pedhru kuti: “Amuzivi kukwanisa kurindira na inini no mukuvo umwe, kani? Rindiranyi, kumbiranyi, mucadocengejwa.” Jesu anovonavo kuti nee vapostori vari kutobararikavo musoro, zve hwainga hwaa usiku maningi. Iyena anoengejera kuti: “[Mujimu] wakanasirika kaveta muviri wakaremba.”—Mateu 26:40, 41.

Jesu anobudazve hwo cipiri zve anokumbira Mwari kuti abvise “mukheyo uu” kwaari. Paanoviya, iyena anokhandazve vapostori vatatu vayani vakavata, kunja ko kuita mukumbiro kuti vatame kuwira mu muejo. Jesu anobhuya navo asi vapostori ‘avazvizivi zvokumudavira.’ (Marco 14:40) Anobudazve hwo citatu wogwadama kuti aite mukumbiro.

Jesu ari kuthimwa-thimwa maningi kamare ngo pamusoro po kushohwa ko zina ra Babake ngo mafire aanoda kuita inga mushaishi. Asi Jehovha ari kuzwa mukumbiro jo Mwana wake zve pa mukuvo umweni anotuma ngirozi kuti imuvangise. Pikija zvakadaro, Jesu aakami kuita mukumbiro jo kudeketera kuna Baba vake zve ‘anovangirira kuita mukumbiro.’ Ecikumbira kudaro, ‘Ziya rinophinduka kuita madondhoji makuru o ngazi aipopomera pasi.’ Jesu ari kuthimwa-thimwa maningi.  Iyena ari kuremehwa zvokuti izanyi muzovona! Upenyu ucikaperi hwake kamare no hwo vandhu vese vanomuzwira, huri pangozi.—Luka 22:44.

Jesu paanoviya ku vapostori kwiyani hwo citatu anovakhandazve vakavata. Iyena anoti: ‘Panguva yakadari inga iyi muri kuvata no kuzorora henyu! Vonanyi! Iri kukhwedera phedo nguva yo kuti Mwana wo mundhu atengeswe munyara jo vashati. Mukanyi, ngatende. Waaphedo wiya anondipira.’—Mateu 26:45, 46, Shanduro yeNyika Itsva.