Jesu naandopera kubhabhatijwa ndi Johani, anoendeswa mu zvipare zvo Judheya ngo mujimu wa Mwari. Jesu ano zvakawanda zvo kurangarira. Pa kubhabhatijwa kwake, “gore rakazauka koari.” (Mateu 3:16) Waro angarangarira ngo zviro zvaakajija no zvaakaita mugore. Zvokadi kamare ano zvakawanda zvokurangarija!

Jesu anopeja 40 o dhiya, usiku no masikati ari mu zvipare. Pa mukuvo uwo aahi ciricese. Pa mukuvowo Jesu ano njara maningi, Sathana Dhiabhu womukhwederera kuti amueje, woti: “Kudari iwewe uri Mwana wa Mwari, nangai ku mapuwe aya aphinduke kuita mukate.” (Mateu 4:3) Ngo kuziva kuti zvakashata kushandisa simba rake ro kuita mushamaiso kuti agutise zvido zvake, Jesu anoramba muejo uu.

Dhiabhu aaimiri apo basi. Anomuejazve ngo manera amweni. Iyena anoeja Jesu kuti aphuke kubva pa nyezuru po themberi. Asi Jesu aatenderi kuejwa uku kokuti akhombije simba rake. Ecinanga zviri mu Matahwa, Jesu anokhombija kuti zvakashata kueja Mwari ngo njira yakadaro.

Pa ciejo co citatu, Dhiabhu ngo maitiro ariese anokhombija Jesu “umambo hwese hwo nyika no goja rahwo,” wonanga kuti “ndinozokupa bzese ibzi kudari ukagwadama wondiromberera.” Jesu wakarambazve wonanga zvakajeka kuti: “Ibvai Sathana.” (Mateu 4:8-10) Jesu aazivi kutendera kunyiswa ngo muejo wo kuita zvakashata, anoziva kuti anodikana kunamatwa ndi Jehovha basi. Hina, iyena anokheta kugara akagondeka kuna Mwari.

Tinojija zvakawanda ngo zviejo izvi no madaviriro akaita Jesu. Uku kwaenga kuejwadi kamare, zvinokhombija kuti Dhiabhu asipi citatijo co ushati inga zvovanonanga vamweni. Iyena i mundhudi kamare zve aavoneki. Ciitiko ici cinokhombijazve kuti utongi hwese hwo nyika ino ngo hwa Dhiabhu kamare zve ndiena anohuvonerera. Waro kupekeja kwakaitari Dhiabhu umambo kuna Kristu kwaizoitisazve kudini ciejo cikuru?

Kusiapo izvo, Dhiabhu wakananga kuti waida kutopekeja Jesu umambo hwese hwo nyika kudari akagwadama womunamata. Dhiabhu anganasavo kutieja ngo njira yakafanana, kangaije ngo kutipa mukana wo kuwana upfumi, kuva mutongi kana kuwana cigaro mu nyika ino. Tinova vakangwara kudari tikatevejera muezaniso wa Jesu ngo kugara takagondeka kuna Mwari, azvinenyi kuti tawanana no ciejo cakadini. Mucakanganwa kuti Dhiabhu wakasiya Jesu, acivetera kuzomuejazve pa “mukuvo umweni.” (Luka 4:13) Izvo zvingatiitikiravo, ngokudaro, atidikani kuvaraihwa.