CIJIJO 47

Imwimwi Makanasiririka Kuti Mubhabhatijwe?

RIJANYI

Imwimwi majija zviro zvakawanda maningi ngo pamusoro pa Jehovha, kuvhira pamakatanga kujija Bhaibheri. Kangaije makatoita cinjo iri yese kuti mushandise zvamuri kujijaro. Zvingaita kuti pano ciro ciri kumuimisa kuti mujipire kuna Jehovha no kubhabhatijwa. Mu cijijo ici, tinozovona zviro zvimweni zvingamuimisa kuti mutame kubhabhatijwa no zvamungaita kuti muzvinyise.

1. Kureva kuti munodikana kuziva zvese zviri mu Bhaibheri kuti muzobhabhatijwe?

Kuti imwimwi mubhabhatijwe, munodikana kuva no “zivo yakarungama yo cokwadi.” (1 Timoti 2:4) Izvi azvirevi kuti kudari munoda kubhabhatijwa, munodikana kuziva kudavira muvhunjo jese jinowanika mu Bhaibheri, mucito mabhabhatijwa. Pikija vakatobhabhatijwa kare, vaciri kuenderera mberi vecijija ngo pamusoro pa Jehovha. (Vakorose 1:9, 10) Imwimwi munodikana kuziva jijiso jinosisira maningi jo soko ra Mwari Bhaibheri. Vakuru vanozomubesera kuvona kuti zvomajijaro, zvinokwana kana kuti haiwa, kuti muende kobhabhatijwa.

2. Ngozvapi zviro zvamunodikana kutanga maita mucito maenda kobhabhatijwa?

Mucito maenda kobhabhatijwa, munodikana ‘kukhauya motendeuka.’ (Verenganyi Mabasa o Vapostori 3:19.) Izvi zvinoreva kuti makhauya ngo zviro zvese zvakashata zvomakaita kare, mokumbira kuti Jehovha amuregerere. Zvimweni ngo zvokuti, munoramba mufambiro wese wakashata, mopona mukuzwirana no zvinoda Mwari. Zvimweni zvamungaita, ngo zvo kwenda ku musongano no kutanga kucumaera no ungano, inga mucumaeri acikazivi kubhabhatijwa.

3. Ngenyi amuvhiri kuthya kubhabhatijwa?

Vamweni vanothya kubhabhatijwa, ngokuti vanorangarira kuti, avazokwanisi kuita zvese zvovakagondesa kuna Jehovha. Izvokadi kuti pa nguva jimweni munozoposa, asi pikija vanarume no vanakaji vakagondeka vo kare vanonangwa mu Bhaibheri, vaitoposavo. Asi Jehovha aaveteri kuti vashandiri vake vave vakakwana. (Verenganyi Nduyo 103:13, 14.) Iyena anodakara pamunoita zvamunokwanisa. Jehovha anozomubesera. Zvokadi, Jehovha anogondesa kuti akuna cinozokwanisa ‘kutiparajanisa no rudo hwake.’—Verenganyi Varoma 8:38, 39.

NASANYI KUPSAKISISA

Kunasa kuziva Jehovha no kutendera besero rake, kunozomupa simba ro kunyisa zvineso zvamunazvo kuti mukwanise kubhabhatijwa.

4. Nasanyi kuziva Jehovha

Mbhera papi munodikana kuziva Jehovha mucito mabhabhatijwa? Imwimwi munodikana kunasa kumuziva kuti mumude no kumudakajisa. Rijanyi VHIDHIYO kuitira kuvona kuti vajiji vo Bhaibheri kutenderera nyika yese vakaitavo kudaro. Perapo bhuisananyi ngo pamusoro po muvhunjo unotevera.

VHIDHIYO: Gwanja ro Kuenda ku Rubhabhatijo (3:56)

Pa vhidhiyo iyi, ngozvapi zvakabesera vandhu vakasiyana-siyana kuti vabhabhatijwe?

Verenganyi Varoma 12:2, perapo bhuisananyi ngo muvhunjo iji:

Imwimwi muri kukana-kana ngo pamusoro po zvinojijisa Bhaibheri? Munokana-kana kuti zviri kujijisa Zvapupu zva Jehovha izvokadi?
Kudari mecikana-kana, ngozvapi zvamungaita?

5. Kunyisa cineso ciri cese kuti mubhabhatijwe

Tese tinosongana no zvineso patinosana kupira upenyu hwedu kuna Jehovha no kubhabhatijwa. Kuti muvone muezaniso, rijanyi VHIDHIYO, perapo bhuisananyi ngo muvhunjo jinotevera.

VHIDHIYO: Kuda Kwake Jehovha Kwakamuita Kuti Anyise Zvineso (5:22)

Pa vhidhiyo, ngozvapi zvineso zvakadikana kunyiswa ndi Narangerel kuti ashandire Jehovha?
Kuitisa kudini rudo wainga na Narangerel wakamubesera kunyisa zvineso?

Verenganyi Mazwi Akangwara 29:25 na 2 Timoti 1:7, perapo bhuisananyi ngo muvhunjo uwu:

Ngozvapi zvinotipa cicunge co kunyisa zvineso?

6. Thembanyi besero ra Jehovha

Jehovha anozomubesera kuti muite zvaanoda. Rijanyi VHIDHIYO, perapo bhuisananyi ngo muvhunjo jinotevera.

VHIDHIYO: Jehovha Mwari Anozomubesera (2:50)

Pa vhidhiyo, zvicinyi zvaiphinga mujiji umwe wo Bhaibheri kuti atame kubhabhatijwa?
Ngozvapi zvaakajijira zvakamubesera kuti anase kuthemba Jehovha?

Verenganyi Isaia 41:10, 13, perapo bhuisananyi ngo muvhunjo uwu:

Ngenyi mungathemba kuti munozokwanirisa mbhiko yamakaita pa kuda kubhabhatijwa?

7. Engejeranyi kubongesera ngo rudo hwa Jehovha

Kurangarira manera amunodiwa ndi Jehovha, kungaengejera kubongesera kwenyu no cido cenyu co kuda kumushandira kwenda no kwenda. Verenganyi Nduyo 40:6, perapo bhuisananyi ngo muvhunjo unotevera:

Ngoapi makomborero a Jehovha amunobongesera maningi?

Muporofita Jeremiya waida maningi Jehovha no soko rake, iyena waireremeja maningi cidakajiso co kushandira Jehovha. Iyena wakati “Mazwi enyu aiita kondiri kudakara no kutamba. Ngokuti ndaidanwa ngo Zina renyu, Tenji Mwari wo Simba rese.” (Jeremia 15:16) Daviranyi muvhunjo jinotevera: