Vagaratiya 1:1-24
1 Ndini mupostori Pauro ndiri kumutarira. Apana mundhu wakandigaja kuti ndive mupostori, asi ndakagajwa ndi Jesu Kristu pamwe na Mwari Baba wedu, vakamuviisazve ku upenyu kuvha mu rufu,
2 hina, inini Pauro pamwe no hama jese jiri kuno, tiri kumutarira imwimwi, ungano iri ku porovhinsiya yo Garatiya:
3 Unyasha hucikaezaniswi no runyararo hunovha ka Mwari Baba wedu na Mambo Jesu Kristu ngahuve na imwimwi.
4 Iyena wakajipira ngo ndava yo zvishaishi zvedu kuti atiponese pa mugariro wakashata wo nyika* ino, mukuzwirana no kuda ka Mwari na Baba wedu,
5 iyena ngaapuwe nduma mbhera narini, kwenda no kwenda. Ameni.
6 Ndinokahamara ngokuti muri kuregera ngo kukasika Wiya wakamudanija ngo unyasha hucikaezaniswi hwa Kristu, motevera mushovo umweni wo masoko akanaka.
7 Akuna masoko amweni akanaka; asi kuno vandhu vamweni vari kumukangaija, vecida kuphinduja masoko akanaka ngo pamusoro pa Kristu.
8 Asi, pikija tikaita itusu kamare nokuti ngirozi yo mugore ikatokotesa masoko amweni akasiyana no atakamujijisaya, ngaatukwe anomacumaeraro.
9 Inga zvatapera kunanga, ndinomuvhunjazve wari kuti: Kudari ariwese akacumaera masoko akanaka akasiyana no amakaashira, ngaatukwe anomatokotesaro.
10 Munorangarira kuti ndiri kupsaka kukhohwesa vandhu, kana kuti ndiri kupsaka kukhohwesa Mwari? Munoti ndiri kupsaka kudakajisa vandhu kani? Kudari ndaipsaka kudakajisa vandhu, andicaizovepi muranda wa Kristu.
11 Hama, ndinoda kuti muzive kuti masoko akanaka andakatokotesa kwamuri, aavhi ku vandhu,
12 ngokuti andizivi kumapuwa ngo mundhu, nee andizivi kumajijiswa ngo mundhu, asi ndakamavoneswa ndi Jesu Kristu.
13 Zvokadi, makazwa ngo pamusoro po mufambiro wangu wokare mu ciJudha, kuti inini ndaiteverera ngo hasha ungano ya Mwari no kuiparaja.
14 Ndaibudirira maningi mu Cijudha, kupinda vandhu vazinji vo jinja rangu vainga no ndanga yangu, ngokuti ndaizivika ngo ndava yo kudisisa zvirovejeso zvo majibaba angu.
15 Asi Mwari, wiya wakandiita kuti ndibahwe,* wakandidanija ngo unyasha hwake hucikaezaniswi, ngokuti wakavona kuti zvakanaka
16 kuvonesa Mwana wake ecindishandisa kuti ndizivise masoko akanaka ngo pamusoro pake ku majinja, inini andizivi kwenda kovhunjisa mundhu ariwese;*
17 andizivi kwenda Jerusarema kovhunjisa vaya vakanditangira kuva vapostori, asi ndakaenda Arabhiya, ndohwirirazve Dhamasko.
18 Makore matatu akazotevera, ndakaenda ku Jerusarema kovona Khefasi,* ndopeja gumi ro njiku no njiku shanu ndinaye.
19 Andizivi kuvona mupostori umweni, aciripi Jakobo basi, munukuna wa Mambo.
20 Ngo pamusoro po zviro zvandiri kumutarira, ndinomugondesa pamberi pa Mwari kuti andiripi kunyepa.
21 Sure kwazvo, ndakaenda ku mutundhu yo Siriya no Sirisiya.
22 Asi andicaizivikepi ku ungano jo Cikristu jo ku Judheya.
23 Ijona jaizwa basi kuti: “Mundhu waititevereraya, wari ari kucumaira masoko akanaka ngo pamusoro po rutendo hwaaiparajaya.”
24 Ivona vakatanga kukuja Mwari ngo ndava yangu.
Masoko o Pasi
^ Vonanyi Kudurujihwa ko Magama.
^ Kana: “wiya wakandiparajanisa mu ndani ma mai wangu.”
^ Gama ngo Gama: “kovhunjisa nyama no ngazi.”
^ Anodanijwazve kuti Pedhru.
