Sofoniya 2:1-15
2 Jinja ricikanyowejeki, ungananyi,Hina, ungananyi.
2 Zviro zvakanangwa zvicito zvaitika,Njikuyo icito yapinda inga ushwa unotohwa ngo mbhepo,Kucamwa kukuru kwa Jehovha kucito kwawira panyezuru penyu,Njiku yo ushungu ya Jehovha icito yawira panyezuru penyu,
3 Psanganyi Jehovha imwimwi mwese makapfava* munogara pa nyika,Zwiranyi mutemo* jake jakarurama.
Psanganyi ururami, psanganyi kuva vakapfava.
Kangaije Jehovha anozomuviga pa njiku yo ushungu hwake.
4 Dhorobha ro Gaza rinozosara ricina vandhu;Ashikeroni rinozoita mathere.
Vandhu vo Ashidhodhi vanozovhiswa pa ndau yavo no masikati,Ekironi inozovhitwa.
5 Vano nyatwa vaya vanogara mumbhiripiri mo jombe, jinja ro Vakereti!
Jehovha wamutonga.
Iwewe Khanani nyika yo Vafiristi, ndinozokuparaja,Iwewe unozogara ucina vandhu.
6 Mumbhiripiri mo jombe, munozova ndau yo kuhavira,Munozova no mwimbo* kuitira vahavisi no maphandu o mavhuta akavakwa ngo mapuwe.
7 Iyona inozova ndau yakasara yo vandhu vo nyumba ya Judha,Ivona vanozowana mahavo.
Cousiku vanozovata mu nyumba ya Ashikeroni.
Ngokuti Jehovha anozovangwarira,
Anozoviisa hama javo jakasungwa.
8 “Ndakazwa zvituko zvo Vamowabhi no kushora ko Vaamoni,Avo vakashora vandhu vangu no kuvanesa vecizvikuja vecinanga kuti vaizotora ndharaundha yavo.
9 Ndinopika ngo upenyu hwangu” izvi ndizvona zvinonangwa ndi Jehovha wo hondo, Mwari wo Vaiziraeri eciti: “Mowabhi inozoita inga Sodhoma,Vaamoni inga Gomora,Inozova ndau inomera muzwa no mwimbo* wo munyu,Nyika icikazogahwi ngo vandhu, vandhu vangu vanozosara, vanozoitora,Vanozosara vo jinja rangu, vanozotora nyika yavo.
10 Izvi ndizvona zvamunozowana ngo ndava yo kuzvikuja kwenyu,Ngokuti makashora vandhu va Jehovha wo hondo, mozvikuja pamberi pavo.
11 Jehovha anozovathyisa mu njira inoshamaisa;Ngokuti anozoparaja zvimwari zvese zvo pa nyika,Majinja ese anogara mu zvirundu anozokotama pamberi pake,Jinja rimwe nga rimwe pa ndau yaro.
12 Imwimwivo Vaetiyopiya, munozourawa ngo banga rangu.
13 Iyena anozotambanujira nyara yake kanjikazi, wophwanya Asiriya,Anozosiya Ninivhe icina vandhu, yakavoma inga bani.
14 Zvinyama zvinozovata mondhomo, mushovo wese wo zvinyama zvo musora.
Garahobwa no cinungu zvinozovata panyezuru po mupfimbiji yavo cousiku.
Izwi rinozoimba pa jhanera.
Sikada* inozophwanyiwa;Matabwa o sedhro anozopiswa ngo zuva no kunihwa ngo nvura.
15 Iri ndirona dhorobha raizvikujaya ricingathyi ciri cese recinanga mu mwoyo maro kudari:‘Inini ndinosisira maningi, akucina umweni wakaezana neni.’
Irona wari raa ndau inothyisa,Ndau inogara zvinyama zvo musora!
Ari wese anozopinda ngo mukati mwaro, anozorija mundozva no kujunguja musoro.
Masoko o Pasi
^ Kana: “munozvidodokesa.”
^ Gama ngo Gama: “matongero ake akarurama.”
^ Kana: “sime, dima.”
^ Kana: “sime, dima.”
^ Kana: “Cirimbo cinozophwanyiwa.” Kangaije zvinonangira sikada yaigara pamberi po cigaro ca mambo.
