Nduyo 145:1-21
Ndumbo yo kusimba. Nduyo ya Dhavhidhi.
א [Arefi]
145 Mwari wangu na Mambo wangu, inini ndinozomukuja,Ndinozosimba zina renyu kwenda no kwenda.
ב [Bheti]
2 Ndinozomusimba njiku jese;Ndinozosimba zina renyu kwenda no kwenda.
ג [Gimeri]
3 Jehovha mukuru, iyena anofanera kusimbhwa;Ukuru hwake auzwisisiki.
ד [Dhareti]
4 Vandhu vanozosimba mabasa enyu, kuvha pa mubarihwana umweni kwenda pa mubarihwana umweni.Vanozovereketa ngo pamusoro po zviito zvenyu zvino simba.
ה [He]
5 Vanozovereketa ngo pamusoro po nduma yenyu huru inoshamaisa,Inini ndinozorangarijisisa ngo pamusoro po mabasa enyu anoshamaisa.
ו [Wawi]
6 Vanozovereketa ngo pamusoro po zviito zvenyu zvinothyisa,Inini ndinozozivisa ukuru hwenyu.
ז [Zayini]
7 Vanozovereketa vakadakara maningi pavanonga veciceuja unaki hwenyu hwakakura,Vozokhuwa ngo mudakaro ngo ndava yo ururami hwenyu.
ח [Heti]
8 Jehovha ano unyasha no usizi,Anononoka kunyangajwa, iyena wakazara ngo rudo hucikacinji.
ט [Teti]
9 Jehovha wakanaka ku vandhu vese,Usizi hwake unovoneka pa mabasa ake ese.
י [Yodhi]
10 Jehovha Mwari wangu, mabasa enyu ese anozomukuja,Vandhu venyu vese vakagondeka vanozomusimba.
כ [Kafi]
11 Ivona vanozozivisa rukujo hwo umambo hwenyuVozobhuya ngo pamusoro po simba renyu,
ל [Ramedhi]
12 Kuti vatokotesere vandhu zviito zvenyu zvino simbaNo nduma yenyu inoshamaisa yo umambo hwenyu.
מ [Memi]
13 Umambo hwenyu ndi umambo hwo kwenda no kwenda,Utongi hwenyu hunogara huripo ku mubarihwana no mubarihwana.
ס [Sameki]
14 Jehovha anomusa vandhu vese vari kuwaWovangisa vandhu vese vakaremba.
ע [Ayini]
15 Majiso o vandhu vese akasota imwimwi;Imwimwi munovapa zvokuha zvavo pa nguva kwayo.
פ [Pe]
16 Imwimwi munofunungura nyara yenyuMopa vandhu no zvinyama zviro zvese zvavanoda.
צ [Tsadhe]
17 Jehovha wakarurama mu makwanja ake eseIyena wakagondeka pa zvese zvaanoita.
ק [Khofi]
18 Jehovha ari phedo no vandhu vese vanomudaninja,Vese vanomudaninja ngo cokwadi.
ר [Reshi]
19 Iyena anogutisa zvido zvo vandhu vese vanomuthya;Wozwa kucema ko vandhu vanoda kubeswa, wovaponesa.
ש [Shini]
20 Jehovha anongwarira vandhu vese vanomuda,Asi anozopeja vandhu vese vanoita zvakashata.
ת [Tawi]
21 Muromo wangu, unozozivisa rukujo hwa Jehovha;Zvisikwa zvese ngazvisimbe zina rake rakacena kwenda no kwenda.
