Mucumaeri 2:1-26
2 Ngo kudaro, ndakati ngo mu mwoyo mwangu: “Wari ndiri kuda kueja kuita zviro zvinodakajisa upenyu hwangu, kuti ndivone kuti ndinowanenyi.” Asi ndakavonazve kuti zviro izvi azvina zvazvinobesera.
2 Inini ndakati: “Kuseka iupenji!”
Inini ndakajivhunjisa kudari: “Zviro zvinodakajisa zvinobeserenyi?”
3 Inini ndakapsakisisa maningi ndotendera kuti mwoyo wangu udakare ngo kumwa vhinyu, ndecienderera mberi ndino uzivi wangu mukuvo wese. Inini ndakaguma pa kukumbatira upenji kuti ndivone kuti ngozvapi zvaizobesera vandhu kuti vaite pa njiku javo shoma javanajo vecipona pasi po matenga.
4 Ndakaita mabasa makuru. Ndakavaka nyumba; ndakasima muuvha jangu.
5 Ndakarima munda no kuita parki jangu, ndakasimemo mushovo yese yo muti inobara mucero.
6 Ndakaita ndau jangu jokuvigira kumwa, kuti idirijire gwasha ro mamuti akasimwa.
7 Ndakava no vashandi vorume no vokaji, ndovazve no vashandi vakabarihwa pamuzi pangu.* Ndakava no mushambi jakawanda jo n’gombe no mavhuta, kupinda vandhu vese vakapona mu Jerusarema inini ndicito ndabahwa.
8 Ndakazviunganijira sirivha no goridhi, upfumi wo majimambo no wo porovhinsiya. Ndakajipsakira vaimbi vorume no vokaji, kubatanijavo no zvinodakajisa vanarume: Ndakava no mwanakaji, hina, vanakaji vakawanda.
9 Ngo kudaro, ndakava no zviro zvakawanda maningi kupinda vandhu vese vakapona mu Jerusarema inini ndicito ndabahwa. Uzivi wangu wakaenderera mberi una inini.
10 Inini ndakaita zviro zvese zvandaida.* Mwoyo wangu wakadakara ngo zviro zvese zvinodakajisa, mwoyo wangu waidakara ngo ndava yo kushanda kwangu ngo simba. Uwu ndiwona wainga mupfupo wangu ngo kushanda kwangu kwese ngo simba.
11 Asi pandakarangarijisisa ngo pamusoro po zviro zvese zvakaithwa ngo nyara jangu no kuvangisira kwese kwandaiita pa basa rangu randainga ndakaita ngo simba rese, ndakavona kuti zvese zvainga zvabiresi, kwainga kugogomera mbhepo. Panyika* apacainga no ciri cese caibesera kamare.
12 Ngo kudaro, ndakatanga kurangarijisisazve ngo pamusoro po uzivi, upenji no urethe. (Ngokuti mundhu anozotevera pasure pa mambo anozoitenyi? Anozoita basi zviro zvakaithwa kare.)
13 Inini ndakavona kamare kuti uzivi unobesa kupinda upenji, kudari inga ruvheneko unobesa kupinda cidima.
14 Muzivi ano majiso anovona ushoni, asi benji rinofamba mu cidima. Ndakazwisisavo kuti kufa ko vese kwakaezana.
15 Inini ndakati ngo mu mwoyo mwangu: “Zviya zvinoitika no benji ndizvona zvinozoitikavo na inini.” Waro, ndawanenyi ngo kuva kwangu no uzivi wakawanda maningi? Inini ndakati ngo mu mwoyo mwangu: “Izvi azvinavo zvazvinobesera.”
16 Ngokuti nee muzivi nee benji avazoceukijwi mbhera narini. Mu njiku jo kumbeji, vese vanonga vakanganika. Mundhu ano uzivi anozofisa kudini? Anozofavo inga benji.
17 Ngo kudaro, ndakatanga kunyenya upenyu, ngokuti mabasa ese aiithwa pa nyika* ndakamavona inga aindicamwisa. Ngokuti zvese zvainga zvabiresi, kwainga kugogomera mbhepo.
18 Ndakatanga kunyenya zviro zvese zvandakashandira ngo simba pa nyika.* Ngokuti zviro zvese ndaizozvisiira mundhu waizotevera sure kwangu.
19 Ndiyani angaziva dangani iyena anozova muzivi kana kuti benji? Mu njira iri yese, iyena anozovonerera zviro zvese zvandakawana pa nyika* ndecishanda ngo simba no uzivi. Izvi azvinavo zvazvinobesera.
20 Ngo kudaro, ndakacamwa pandakarangarira ngo pamusoro po kushanda ngo simba kwandakaita ndecivangisira ngo mwoyo wese pa nyika.*
21 Ngokuti pikija mundhu anoshanda ngo simba ecitungamirihwa ngo uzivi, zivo no kukwanisa basero, anozodikana kupa zviro zvese ku mundhu umweni acizivi kuzvishandira. Izvi azvinavo zvazvinobesera, idambujiko guru.
22 Mundhu anowanenyi ngo kushanda ngo simba kwaanoita no kuvangisira kwaanoita ngo mwoyo wese paanonga ecishanda pa nyika?*
23 Ngokuti mu njiku jese jo upenyu hwake, basa rake rinomuviisira nyathwa no matambujiko, nee cousiku mwoyo wake aukwanisi kuzorora.* Izvi azvinavo zvazvinobesera.
24 Akuna ciro cimweni cakanaka maningi kuno mundhu kuciripi kuha, kumwa no kudakara ngo kushanda ngo simba kwaanoita. Inini ndakazwisisa kuti zviro izvi zvinovha kuna Mwari wo cokwadi,
25 ngokuti ndiyani anonasa kuha no kumwa kupinda inini?
26 Ku mundhu anomudakajisa, iyena anomupekeja uzivi, zivo no mudakaro, asi anopekeja mushaishi basa ro kuunganija zviro. Iyena anounganija zviro izvi perepo ozvipekeja wiya anodakajisa Mwari wo cokwadi. Izvi azvinavo zvazvinobesera, ikugogomera mbhepo.
Masoko o Pasi
^ Gama ngo Gama: “vana vo pamuzi.”
^ Gama ngo Gama: “zvaikumbihwa ngo majiso angu.”
^ Gama ngo Gama: “Pasi po zuva.”
^ Gama ngo Gama: “pasi po zuva.”
^ Gama ngo Gama: “pasi po zuva.”
^ Gama ngo Gama: “pasi po zuva.”
^ Gama ngo Gama: “pasi po zuva.”
^ Gama ngo Gama: “pasi po zuva.”
^ Kana: “iyena aakwanisi kuzorora.”
