Mucumaeri 12:1-14
12 Ngo kudaro, ceukijai Musiki wako Mukuru mu njiku jo ujaha hwako, jicito jaguma njiku jo matambujiko, acito aguma makore aunozonanga kudari: “Andidakajihwi ngo upenyu”;
2 itai zvondhozvo mu mukuvo wokuti zuva, ruvheneko, mweji no ndhondho zvicito zvaita cidima, itai izvi makore acito ahwirira pasure po kuna ko nvura;
3 itai izvi pa njiku inotetemera varindiri vo nyumba, pa njiku yokuti vandhu vano simba vanogwadama, pa njiku yokuti vanakaji vanozosiya kukwiya ngokuti vaavashoma, pa njiku yokuti vanakaji vanosota kunja ngo pa jhanera vanovona cidima;
4 pa njiku yokuti musuvo inoenda ku gwanja inozofungwa, pa njiku yokuti musindo* unoizwa ngo gwiyo unozozika ngo ndhambo, pa njiku yokuti mundhu anozomuka ngo kurira ko shiri, pa njiku yokuti vana vese vokaji vanozoimba vacina simba.
5 Pa njiku yokuti mundhu anozothya matundhu, gwanja rinozothyisa, muti wo amendowa unozobara maruva, ndere inozojikhwekhwereja, cido cokuda kuha cinozopera, ngokuti mundhu ari kufamba ecienda ku nyumba yake yaanozogara kwenda no kwenda, vaya vanocumba vanofamba mu gwanja;
6 ceukijai Musiki wako ruji wo sirivha ucito wavhiswa, tijhera yo goridhi icito yaphwanyiwa, juvi ricito raphwanyika pa mwimbo, bote ro ndovo ricito radajuka.
7 Ngo kudaro, bukuta rinozohwirira ku mavhu kwarakavha, simba ro upenyu rinozohwirira kuna Mwari wo cokwadi, wiya wakapa vandhu simbero.
8 Mujijisi anonanga kudari: “Zviro zvicikabeseri kamare! Zviro zvese azvina zvazvinobesera.”
9 Mujijisi aazivi basi kuva muzivi, asi wakaendereravo mberi ecijijisa vandhu zviro zvaaiziva. Iyena wakarangarijisisa no kunasa kupsakisisa kamare no cinangwa co kutara mazwi akawanda akangwara.
10 Mujijisi wakapsaka magama akanaka, tevere wakatara masoko ocokwadi munjira yakarungama.
11 Masoko o vazivi akaita inga ndonga inopinja, zvese zvavanonanga zvakaita inga peregu yakanasa kukohomehwa; masoko avo vakamapuwa ngo muhavisi umwe basi.
12 Mwanangu, ngo pamusoro po zviro zvimweni kunja kwa izvi, inini ndinokungwaja: Kutara mabhuku akawanda akuperi, mundhu anovangisira maningi kuti amaverenge anoremba.
13 Pasure po kuzwa zvese izvi, ciro cinosisira nga ici: Ithyai Mwari wo cokwadi, zwirai mupango jake, ngokuti izvi ndizvona zvinosisira maningi mu upenyu wo vandhu.
14 Ngokuti Mwari wo cokwadi anozotonga vandhu mukuzwirana no zvese zvavakaita, kubatanijavo no zviro zvese zvakafisika, ozovona dangani izvona zvakanaka kana kuti zvakashata.
Masoko o Pasi
^ Kana: “bharuriyo rinoizwa ngo gwiyo rinozozika.”
