Mucumaeri 11:1-10
11 Khandirai pau yako mu kumwa, ngokuti pasure po mazuva akawanda iwewe unozoiwanazve.
2 Kovanai zviro zvako no vandhu vanomwe kana vasere, ngokuti iwewe auzivi dambujiko rinozoitika pa nyika.
3 Kudari makore akazara ngo kumwa iwona anonisa nvura pa nyika, kudari muti ukawira kakusi kana kanjikazi, iwona unozoenderera mberi uri pa ndau yawawiraro.
4 Wiya anosota mbhepo aazosimi mbeu, wiya anosota makore aazokotori.
5 Kudari inga iwewe ucikazivi mashandire anoita simba ro upenyu mu maphondo* o cimwana ciciri mundani ma mai waco, iwewevo auzivi mabasa a Mwari wo cokwadi, wiya wakaita zviro zvese.
6 Simai mbeu yako comangwanani, ucatendera kuti nyara jako jizorore mbhera zuva rivire; ngokuti iwewe auzivi kuti ngoyapi mbeu inozobara ushoni. Auzivi dangani nga iyi kana kuti nga iyoo, kana kuti jese jinozobara ushoni.
7 Ruvheneko hwakanaka. Zvakanaka maningi kuti majiso avone ruvheneko hwo zuva.
8 Ngo kudaro, kudari mundhu akararama makore akawanda, iyena ngaadakare njiku jese. Asi iyena anodikana kuceukija kuti njiku jo matambujiko,* kangaije jinozova jakawanda; zvese zvinoda kuzoitika azvina zvazvinobesera.
9 Mujaha, dakarai uciri mujaha, mwoyo wako ngaudakare mu njiku jo ujaha hwako. Teverai makwanja o mwoyo wako, endai kwaunotungamirihwa ngo majiso ako; asi zivai kuti Mwari wo cokwadi anozokutonga ngo ndava yo zviro zvese izvi.
10 Ngo kudaro, vhisai zviro zvinotambuja mwoyo wako, tizisai zviro zvakashata pa muviri wako, ngokuti ujaha no simba ro ujaha zvinopera* ngo kukasika.
