Mateu 15:1-39
15 Perapo, Vafarisi no vatari vakaviya kuna Jesu vecivha ku Jerusarema veciti:
2 “Vajiji vako avateveji ngenyi zvirovejeso zvo vandhu vokare? Inga muezaniso, ivona avasambi* nyara javo pavanonga vecida kuha.”
3 Iyena wakavadavira kuti: “Imwimwi amuteveji ngenyi mutemo wa Mwari ngo pamusoro po zvirovejeso zvenyu?
4 Inga muezaniso, Mwari wakati: ‘Kujai baba na mai wako.’ Wakatizve: ‘Wiya anoshora* baba wake na mai wake ngaaurawe.’
5 Asi imwimwi munoti: ‘Wiya anovhunja baba wake na mai wake kuti: “Ciri cese candinaco caizobesera imwimwi, icipo cakapuwa Mwari.”
6 Iyena aacadikanizve kukuja baba wake.’ Imwimwi munoita kuti soko ra Mwari ritame kushanda ngo ndava yo zvirovejeso zvenyu.
7 Imwi vacengejeri! Isaya wakanasa kuporofeta ngo pamusoro penyu paakati:
8 ‘Vandhu ava vanondikuja ngo muromo yavo, asi mwoyo yavo iri ndhambo na inini.
9 Vanoenderera mberi vecindinamata biresi, ngokuti vanojijisa mutemo jo vandhu basi.’”
10 Paakapeja kunanga izvi wakadanija mbungano kuti ikhwedere phedo, woivhunja kuti: “Purutananyi munase kuzwisisa izvi:
11 Asipi cinonghwina ngo pamuromo wo mundhu cinomusvipisa, asi ciro cinobuda ngo pamuromo wo mundhu ndicona cinomusvipisa.”
12 Vajiji vakaviya vomuvhunja kuti: “Munozviziva kuti Vafarisi vaikhugunyika ngo kuzwa zvamanangaya?”
13 Jesu wakavadavira kuti: “Muti wese ucizivi kusimwa ndi Baba wangu vo kumatenga, unozovhitwa.
14 Varegerenyi. Ivona, mapofu ari kuseseja vamweni. Kudari bofu rikaseseja bofu doni, ese anowira murindi.”
15 Pedhru wakadavira kuti: “Tidurujirenyi muezaniso uwu.”
16 Jesu wakati: “Na imwimwi amutovo mukazwisisa kani?
17 Amuzvizivi here kuti zvese zvinonghwina ngo pamuromo zvinoenda mundani perepo zvosvejwa mu ratirina?
18 Asi zviri zvese zvinobuda ngo pamuromo zvinovha ngo mumwoyo, izvi ndizvona zvinosvipisa mundhu.
19 Inga muezaniso, mu mwoyo munobuda murangariro jakashata, kuuraya, upombo, uhure,* umbavha, ucapupu hwo kunyepa no kutuka.
20 Zviro izvi ndizvona zvinosvipisa mundhu; asi kuha ucizivi kusamba nyara azvisvipisi mundhu.”
21 Paakavha pondhopo, Jesu wakaenda ku mutundhu wo Tiro no Sidhoni.
22 Mwanakaji umweni wo Finisiya waigara mu mutundhumo, wakamukhwederera ecimukhuwira kuti: “Ndiitirenyivo usizi, Mambo, Mwana wa Dhavhidhi. Mwana wangu wokaji ano dhimoni rakashata maningi.”
23 Asi iyena aazivi kumudavira nee gama rimwe haro. Vajiji vake vakaviya kwaari vomuvhunja kuti: “Mudavirenyi ciri cese, ngokuti ari kutitevera ecitikhuwira.”
24 Jesu wakati: “Andizivi kutumihwa ku mundhu ari wese, asi ndakatumihwa ku mavhuta akasvejeka o nyumba ya Iziraeri.”
25 Asi mwanakaji wakaviya womugwadamira, eciti: “Mambo, ndibesenyi!”
26 Jesu wakamudavira kuti: “Azvizivi kunaka kutora pau yo vana vadoko kakuikhandirira zviimbhwa.”
27 Mwanakaji wiya wakati: “Ndizvona, Mambo, asi zviimbhwa zvinobojera mbhakata jinombhwera pa meza yaatenji wazvo.”
28 Jesu wakamudavira kuti: “Mwanakaji, kutenda kwako kwakakura maningi; ngazviitike zvaunodaro.” Mwana wake wakavanga kuvhira pa mukuvo wondhowo.
29 Paakavha pondhopo, Jesu wakaenda phedo no Jombe ro Garireya. Wakakhwira pa dundhu, wogara pasi pondhopo.
30 Perapo mbungano huru yo vandhu vakamukhwederera veciviya no vandhu vaithobinya, vakaremara, mapofu, mbeveve, no ndhendha jimweni. Ivona vaivarajika pa mukumbo ja Jesu, iyena ecivarapa.
31 Ngo kudaro, mbungano yaikahamara ngo kuvona mbeveve jecivereketa, vakaremara veciraphwa, vaithobinya vecifamba ushoni no mapofu ecivona. Vese vaikuja Mwari wo Vaiziraeri.
32 Asi Jesu wakadanija vajiji vake wovavhunja kuti: “Ndiri kuzwira pena mbungano iyi, ngokuti joita njiku ndhatu jese ina inini, icizivi kuha ciri cese. Andidi kupindisa vandhu ava vecifa ngo njara, ngokuti vangazowa ngo njara mugwanja.”
33 Asi vajiji vakamuvhunja kuti: “Tingajiwanepi mu bani muno pau jinokwana kugutisa mbungano yo vandhu vakawandisa kudari?”
34 Jesu wakavavhunjisa kuti: “Muno pau ngana imwimwi?” Ivona vakati: “Pau nomwe no zvihove zvinganani.”
35 Jesu paakapeja kuvhunja mbungano yo vandhu kuti vagare pasi,
36 iyena wakatora pau nomwe jiya no zvihove, pasure po kuita mukumbiro, wakazvigura-gura wozviashija vajiji vake, vajiji vozvipekeja mbungano.
37 Vese vakaha voguta, vounganija zvitengu zvinomwe zvakakura, zvozara ngo matimbu o zviro zvakasara.
38 Vaya vakaha, vaikwana kuita zviuru zvirongomuna* zvo vanarume, kusiyapo vanakaji no vana vadoko.
39 Pakupejisira, Jesu wakaeneka mbungano, iyena wopakira ngarava woenda ku mutundhu wo Magadhani.
Masoko o Pasi
^ Kana kuti: kusamba nyara ko mutango-mutango.
^ Kana: “anotuka.”
^ Vonanyi Kudurujihwa ko Magama.
^ 4.000.
