Mabasa o Vapostori 27:1-44
27 Nokwatemwa civaringo co kuti taidikana kupakira piketi kuti tiende Itariya, ivona vakadira Pauro no vasungwi vamweni mu nyara jo mukuru wo masoca anodanijwa kuti Jhuriyo, wo cikwata ca Augustu.
2 Takapakira piketi yaivha ku Adhramiti yecida kwenda ku ndau inocevera ngarava. Ndau iyi ngo yo jombe ro porovhinsiya yo Aziya, totanga kuita hwendo tecienda kondhoyo. Mwanarume umweni wo ku Masedhoniya waidanijwa kuti Aristarko wo Tesaronika, waingavo na itusu.
3 Pa njiku yakatevera, takapinda ngo ku Sidhoni. Jhuriyo wakaitira unyasha Pauro, womutendera kuti aende kovona shamwari jake kuti jimubesere.
4 Patakavha pondhopo takaenda tecijivirihwa ngo cirundu co Shipre, ngokuti taienda kwaivha mbhepo.*
5 Sure kwazvo, takafamba mu jombe ro Sirisiya no Pamfiriya, toguma Mira mu Risiya.
6 Kondhoyo, mukuru wo masoca wiya wakavona piketi yaivha Areshandriya yecienda Itariya, wotipakija mondhomo.
7 Pasure po kufamba padoko padoko mukati mo njiku jakawanda, takaguma Kinidho tecineseka. Ngokuti mbhepo* aicaititendera kwenda kotainga takasota, takafamba takajivirihwa ngo cirundu co Kreta tecipinda ngo Sarimoni.
8 Pataifamba ngo mu mbhiripiri tecineseka, takaguma pa ndau panodanijwa kuti Pokucevera Pakanaka, phedo no dhorobha ro Razeya.
9 Painga papera mukuvo wakawanda. Wari uno kufamba mu jombe kwainga koonesa ngokuti pikija Njiku yo kuzira,* yainga yapinda. Pauro wakavavhunja kuti:
10 “Shamwari jangu, ndiri kuvona kuti hwendo hwedu hunozobara ngozi, ngokuti atizoruzi basi mujiyo jakawanda no piketi, asi tinozoruzavo upenyu hwedu.”
11 Asi mukuru wo masoca wakazwira mufambisi wo piketi no mune wayo, kuciripi zvainangwa ndi Pauro.
12 Zvecivoneka kuti paicevera piketi apacainga pakanaka kugarepo pa nguva yo kutondhora, vazinji vakavona kuti zvainga zviri nane kuvha kondhoyo, kuti kudari zvecikwanisika vaizoguma Feniki, ndau yokucevera yo Kreta inotendera kwenda kumavhazuva.*
13 Noyatanga kuvhunguza padoko padoko mbhepo* yo kakusi, ivona vakavona kuti zvavaida zvainga zvakwanisika, vovhisa nanga, vofamba veciteverera cirundu co Kreta ngo mubhiripiri.
14 Pasure po mukuvo mushoma, ngo divi ro cirundu ciya, kwakavha mbhepo yakavanga* inodanijwa kuti Eurakironi.
15 Piketi payaitakwa ngo simba, azvicaikwanisika kwenda kwaivharo mbhepo,* itusu takakonehwa kuita ciri cese, toregera piketi yecitohwa ngo mbhepo.*
16 Perapo, takafamba takajivirihwa ngo cirundu cidoko cinodanijwa kuti Kaudha, pikija zvakadaro, zvainesa kungwarira cingarava cidoko caisungihwa sure ko piketi.
17 Pasure po kucipakija mukati, vakacisungiremo, vecithya kutaka nvungu* yo Sirite,* vakathujura thanga piketiyo yotutwa ngo mbhepo.*
18 Zvecivoneka kuti taivhunguzwa maningi ngo mbhepo,* njiku yakatevera vakatanga kusveja mujiyo mu kumwa.
19 Pa njiku yocitatu, ngo nyara javo, ivona vakasvejera mu jombe mujiyo jimweni javaishandisa mu piketi.
20 Pakapera njiku jakawanda ticizivi kuvona zuva no ndhondho, tecivhunguzwa ngo mbhepo,* aticaigondepi kuti taizopona.
21 Nopapera mukuvo wakareba vacizivi kuha ciri cese, Pauro wakaima pakati pavo, wonanga kuti: “Shamwari jangu, nomakazwa zvandakamuvhunja totama kubuda mu Kreta, aticaizotambepi nyatwa iyi toruza zviro.
22 Asi wari, ndinomuvhunja kuti cunganyi ngokuti akuna na umwe wedu anozofa, asi piketi basi ndiyona inozophwanyika.
23 Pa usiku hwaperari, ngirozi ya Mwari wangu, wandinoitira basa rakacena yakandigumira
24 yondivhunja kuti: ‘Ucathya Pauro. Unodikana kwenda ka Sezari. Cimwenizve, Mwari wakupa upenyu hwo vandhu vese vari mu piketi umu.’
25 Shamwari jangu, ndinomuvhunja kuti cunganyi ngokuti ndinotenda kuti zvandavhunjwari ndi Mwari, zvinozoitika.
26 Piketi iyi inozophwanyikira phedo no cirundu ciri cese.”
27 Pahwakaita usiku hwo cigumi na rongomuna tecivhunguzwa ngo mbhepo* mu jombe ro Adhriya, pakati po usiku, vafambisi vo ngarava vakatanga kurangarira kuti vainga vaaphedo no kumutundhu.
28 Vakapima kujika, vowana mutengo unokhwedera kuita makumatatu o metru no metru ndhandhatu. Ngo kudaro, vakafamba padoko, vopimazve. Vakawana makumaviri o metru no metru munomwe.
29 Zvecivoneka kuti taithya kuti taizotaka mapuwe, vakakhandira nanga* murongomuna mukumwa, veciimira kuti kunja kueje.
30 Vafambisi vo piketi pavaida kutiza, vowisira mu jombe cingarava cidoko ciya, veciti vaida kubija nanga jo kumbeji ko piketi,
31 Pauro wakavhunja mukuru wo masoca no masoca kuti: “Vandhu ava vakambhera ngo kutama kugara mu piketi muno, imwimwi amuzoponi.”
32 Masoca akaceka mapote o cingarava ciya, vocisiya cecipinda.
33 Kunja no koda kueja, Pauro wakavangisa vese kuti vahe, eciti: “Nyamasi yaanjiku yocigumi na rongomuna, mucikazivi zvinozoitika, pacina camakaha.
34 Ngo kudaro, ndinomuvhunja kuti muhe ciri cese ngokuti zvinozomubesera, apana no vhuji rimwe haro ro mu musoro menyu rinozoruzika.”
35 Pasure po kunanga izvi, wakatora pau woita mukumbiro wo kubonga kuna Mwari pamberi po vese, woigura perapo wakatanga kuiha.
36 Vese vakacunga, votanga kuhavo.
37 Vandhu vese vainga mu piketi vaikwana kuita mazana maviri na makumanomwe o vandhu no vandhu vatandhatu.*
38 Novapera kuguta, vakakhandira tirigu mu jombe kuti piketi irerukihwe.
39 Kunja no kwaeja, vavhuthi avazivi kukwanisa kuziva mutundhu wovainga, asi vakavona manghwiniro no nvungu, ngokudaro, vakazwanana kuceveserepo piketi.
40 Vakaceka mapote o nanga, vomasiya eciwira mu jombe, pa nguva yondhoyo, vakasujunura mapote o makhasinya* o sure no kumbeji. Sure kwazvo, vakakhwija thanga ro kumbeji, voenda kumutundhu.
41 Pavakataka nvungu yainga yakabobojwa ngo kumwa mativi ese, piketi yakaomehwa, domu rakabata pasi rotamazve kucukunuka, asi sure ko piketi kwakaphwanywa ngo mavimbi.
42 Ngo kudaro, masoca akasunga kuuraya vasungwi vese kuti patame kuwanika na umwe hake anosambira, wotiza.
43 Asi mukuru wo masoca wainga ecida kuponesa Pauro. Ngo kudaro, aazivi kutendera kuti masoca auraye vasungwi vaya. Iyena wakavhunja vaikwanisaya kusambira kuti vatange kuphukira mukumwa, vaende kumutundhu,
44 vanosararo vaizotevera: vamweni vakabatirira tabwa, vamweni vobatirira mabweshu o piketi. Ngo kudaro, vese vakaguma kumutundhu vari penye.
Masoko o Pasi
^ Kana: “dutu.”
^ Kana: “dutu.”
^ Izvi zvinoreva kuti kuzira ko Njiku yo Kuviiranisa, kwaiitika mu mweji wa tirsi, kutanga ko mukuvo wo nvura no kutama kugajana ko jombe.
^ Gama ngo Gama: “ kwenda ku pharamande ra njikazi no pharamande ra kusi.”
^ Kana: “dutu.”
^ Kana: “dutu.”
^ Kana: “dutu.”
^ Kana: “dutu.”
^ Kana: “vaithya kutaka pa ndau inooma pakati po jombe.”
^ Kana: “dutu.”
^ Vonanyi Kudurujihwa ko Magama.
^ Kana: “dutu.”
^ Kana: “dutu.”
^ Kana: “dutu.”
^ Nanga jo sure.
^ 276.
^ Makhasinya akaita inga hasvi; anoshandiswa pa kuvhutha shati.
