Mabasa o Vapostori 23:1-35
23 Pauro ecisotesesa Sinedhriyo, wakati: “Hama, Mwari anozviziva kuti hana yangu inondivhunja kuti andizivi kumboita cakashata mbhera nyamasi.”
2 Paakananga izvi, mupiri mukuru waidanijwa Ananiya wakavhunja vaiima phedo naye kuti vamutake pa muromo.
3 Pauro wakamuvhunja kuti: “Mwari anozokutaka, iwewe, biravira rakapendwa ngo cinambo.* Ngenyi unogara pasi kuti unditonge mukuzwirana no Mutemo, kuveni ngo divi rimweni uri kuphuka Mutemowo ngo kuvhunja vandhu kuti vanditake?”
4 Vandhu vainga vari phedo naye vakananga kuti: “Uri kutukirenyi mupiri mukuru wa Mwari?
5 Pauro wakadavira kuti: “Hama, inini andicaimuzivepi kuti iyena wainga mupiri mukuru. Zvakatahwa kuti: ‘Ucatuka mutongi wo vandhu vako.’”
6 Pauro paakaziva kuti divi rimwe rainga ro Vasadhusi, asi rimweni rainga ro Vafarisi, iyena wakakhuwa mu Sinedhriyo eciti: “Hama, inini ndiri Mufarisi, mwana wo Vafarisi. Ndiri kutongwa ngo ndava yo vetero yo kumuswa ko vakafa.”
7 Ngo kunanga kwake izvi, Vafarisi no Vasadhusi vakatanga kupopana ngocavo, vandhu vese voparajana.
8 Ngokuti Vasadhusi vainanga kuti akuna rumuko, ngirozi no zvisikwa zvicikavoneki, asi Vafarisi vaitenda kuti zvese zviriyo.
9 Ngo kudaro, rakatanga joweyowe ricikaitiki. Vatari vamweni vo Vafarisi vakamuka votanga kukanija veciti: “Apana cakashata catavona ku mundhu uwu, dangani pano mujimu kana kuti ngirozi yabhuya naye . . .”
10 Joweyowe riya parakaengejeka, mutungamiriri wo masoca wakathya kuti Pauro waizotemwa ndivona. Iyena wakavhunja masoca kuti aende koovhisa Pauro pakati pavo, perapo vamuendese kunogara masoca.
11 Asi pa usiku uhwo, Mambo wakaima phedo naye womuvhunja kuti: “Cungai! Ngokuti ucapupu hwakaperera hwawakaita mu Jerusarema, unozohuitazve ku Roma.”
12 Kunja no kwaeja, Vajudha vakazwirana kumukira Pauro, vopika vecinanga kuti avacaizohepi nee avacaizomwepi vacizivi kumuuraya.
13 Vakazwiranaro veciita mbhiko, vaipindirija makumarongomuna o vandhu.
14 Vandhu ava vakaenda ku vapiri vakuru no vakuru, vonanga kuti: “Itusu taita mbhiko yo kuti atizohi ciri cese ticito tauraya Pauro.
15 Wari imwimwi pamwepo no Sinedhriyo, munodikana kuvhunja mutungamiriri wo masoca kuti anodikana kumuviisa kwamuri inga muri kuda kunasa kupopora shwiro yake. Asi acito aguma, itusu tinova tanasiririka kuti timuuraye.”
16 Mwana wo hambzaji ya Pauro, wakazvizwa zvavaingaro vecironga, iyena wakaenda ku ndau inogara masoca woverengera zvese Pauro.
17 Pauro wakadanija mukuru umwe wo masoca, womuvhunja kuti: “Perekejai mujaha uwu ku mutungamiriri wo masoca, ngokuti iyena ano masoko aanoda kumuvhunja.”
18 Iyena wakamutora woenda naye ku mutungamiriri wo masoca, womuvhunja kuti: “Musungwi anozwi Pauro, wandidanija, wondivhunja kuti perekejai mujaha uwu kwamuri ngokuti ano masoko aanoda kumuvhunja.”
19 Mutungamiriri wo masoca wakamubata ngo mukono woenda naye pamutivi, womuvhunjisa kuti: “Unoda kundivhunjenyi?”
20 Iyena wakati: “Vajudha vazwanana kumukumbira kuti muendese Pauro ku Sinedhriyo mangwana, kuti zviite inga vanoda kuzwa masoko mazinji ngo pamusoro po shwiro yake.
21 Asi mucadotendera kuti vamukhohwese, ngokuti kuno vandhu vanopindirija makumarongomuna vari kuda kumujiva. Ivona vaita mbhiko yo kuti avazohi no kumwa vacito vamuuraya. Wari ivona vari kuvetera kuti imwimwi mutendere.”
22 Ngo kudaro, mutungamiriri wo masoca wakapindisa mujaha wiya paakapera kumukohomejesa eciti: “Ucadovhunja ari wese zvawandivhunjari pano.”
23 Iyena wakadanija vakuru vaviri vo masoca, wovavhunja kuti: “Nasiriranyi mazana maviri* o masoca, makumanomwe o vapakiri vo haci no mazana maviri* o masoca ano mukhondo, kuti aende Sezareya pa nguva nvumbamwe jo usiku.*
24 Nasiriranyizve haci inozopakihwa ndi Pauro kuti muende naye zvakanaka ka govhernadhori Ferisi.”
25 Iyena wakatara karata yainanga kuti:
26 “Inini Kraudhiyo Riziya, ndiri kutarira imwimwi munoreremejwa vagovhernadhori Ferisi: Ashiranyi mucungamijo wangu!
27 Mundhu uwu wakabathwa ngo Vajudha, vecida kumuuraya. Asi inini ndakaenda ngo kukasika no masoca angu, ndomuponesa ngokuti ndakaziva kuti iyena wainga Muroma.
28 Ndecida kuziva thangwe ravaimupumbharo, ndakamuendesa mu Sinedhriyo yavo.
29 Ndakavona kuti ari kupumbhwa ngo ndava yo Mutemo wavo, asi aazivi kupumbhwa ngo ndava iri yese ingamuitisa kuti afe kana kuti adihwe mukadheya.
30 Zvecivoneka kuti ndakavhunjwa mazano avainga vamurongera kuti vamuuraye, ndizvona zvandiitisa kuti ndimutumire kwamuri ngo kukasika, ndovhunja vari kumupumbharo kuti vaende koozvinanga pamberi penyu.”
31 Ngo kudaro, masoca akatora Pauro mukuzwirana no zvaakavhunjwa opinda naye co usiku kwenda ku Antipatri.
32 Pa njiku yakatevera, vapakiri vohaci vakaenderera mberi no hwendo hwavo na Pauro, asi masoca amweni akahwirira ku ndau yaaigara.
33 Vapakiri vohaci vakaguma Sezareya, vopekeja govhernadhori karata iya, perapo vosiya Pauro mu nyara jake.
34 Ngo kudaro, govhernadhori wakaverenga karata iyani, perapo wovhunjisa porovhinsiya yaakavha. Iyena wakavhunjwa kuti waivha ku Sirisiya.
35 Iyena wakati: “Inini ndinozonasa kuzwa shwiro yako yese vakambhera ngo kuguma vandhu vari kukupumbhari.” Iyena wakavhunja vangwariri kuti vamudire mukadheya pa nyumba ya mambo Herodhi.
Masoko o Pasi
^ Kana: “iwewe mucengejeri.” Cinambo mukhaindi wo mavhu anoshanda inga tinta yokucena.
^ 200.
^ 200.
^ Gama ngo Gama: “nguva yocitatu yo usiku.”
