Mabasa o Vapostori 16:1-40
16 Iyena wakaguma Dherbhe no Ristra. Kondhoyo kwainga no mujiji waidanijwa kuti Timoti, make vainga Mujudha. Ivona vainga muteveri wa Jesu, babake vainga Mugiriki,
2 hama jo Ristra no Ikoniyo, jaisimba maningi Timoti.
3 Pauro waida kuti Timoti amuperekeje. Ngo kudaro, iyena wakamusoka ngo ndava yo Vajudha vo mundharaundha yondhoyo, ngokuti vese vaizviziva kuti babake vainga Mugiriki.
4 Pavaifamba mu dhorobha ngo dhorobha, ivona vaivhunja hama zvainga zvasungwa ngo vapostori no vakuru vainga ku Jerusarema kuti vazviite.
5 Ngo ndava yazvo, ungano jaivangiswa rutendo hwajo, jecikura njiku no njiku.
6 Ivona vakapinda ngo ku Frijiya no Garatiya, ngokuti mujimu mucena wakavarambisa kucumaera soko ra Mwari mu porovhinsiya yo Aziya.
7 Cimwenizve, pavakaguma ku Misiya, vakaeja kunghwina mu Bhitiniya, asi mujimu* wa Jesu auzivi kuvatendera.
8 Ngo kudaro, vakapinda ngo ku Misiya, voguma ku Trowadhe.
9 Co usiku, Pauro wakavoneswa mundhu umweni wo ku Masedhoniya akaima ecimudeketerera kuti: “Izanyi kuzotibesa ku Masedhoniya kuno.”
10 Paakandopera kuvoneswa, takaita hwendo kuenda Masedhoniya tecivona kuti Mwari watidanija kuti tiende koovatokotesera masoko akanaka.
11 Ngo kudaro, takapakira ngarava kuvha Trowadhe toenda Samotrasi, asi pa njiku yakazotevera, takaenda Neyapori;
12 patakavheyo, takaenda ku nyika yo Firipi, inotongwa ngo Varoma, dhorobha guru ro dhistritu yo Masedhoniya. Takagara mu dhorobhemo njiku nganani.
13 Ngo mu Sabudu, takabuda kunja ko musuvo pamutivi wo murambo, patairangarira kuti taizowana ndau yokuita mukumbiro. Itusu takagara pasi, totanga kubhuya no vanakaji vaiunganeyo.
14 Painga no mwanakaji umweni waidanijwa kuti Ridhiya, wainga munamati wa Mwari. Mwanakaji uwu, wainga mutengesi wo nguvo jakapsukirikira. Iyena waipurukira. Waivha ku dhorobha ro Tiyatira. Jehovha* wakafunungura mwoyo wake kuti anase kuzwa masoko ainangwa ndi Pauro.
15 Ridhiya no vo pamuzi pake pavakapera kubhabhatijwa, wakakumbira kuti: “Kudari mecindivona kuti ndakagondeka kuna Jehovha,* viyanyi muzogare kumuziyo.” Iyena waitivangirija kuti tipinde naye.
16 Njiku imweni, pataienda ku ndau yo kuitira mukumbiro, takasongana no mushandi kaji umweni wainga no dhimoni. Iyena waikwanisa kufembera zvo kumbeji. Ngo kudaro, majipatarau ake aiwana mare ndizvona.
17 Musikane uwu waindoteverera Pauro na itusu, ecikhuwa* kuti: “Vanarume ava, ndivona vandhu va Mwari Mukuru-Kuru, ivona vari kumutokotesera gwanja ro ruponeso.”
18 Iyena waiita kudaro ko mazuva akawanda. Pejisire, Pauro wakaremba ndizvona, wosota sure, wovhunja mujimu wiya kuti: “Ndinokuvhunja ngo zina ra Jesu Kristu kuti budai pa musikane uwu.” Mujimu wakabuda pa nguva yondhoyo.
19 Majipatarau ake paakavona kuti vainga vacinazve kokuwanira mare, vakabata Pauro na Sira, vovaendesa ku vatongi.
20 Ivona vakavaendesa ku vatongi veciti: “Vanarume ava Vajudha, vari kushaishira maningi dhorobha redu.
21 Ivona vari kutokotesa zvirovejeso zvicikatendehwi kuita kana kutevejera, ngokuti itusu tiri Varoma.”
22 Vandhu vese vakavamukira. Vatongi pavakapera kuvavhurisa nguvo javo, vakavhunja vandhu kuti vavatake ngo mushakwe.
23 Pasure po kuvataka maningi, vakavadira mukadheya, vovhunja vangwariri kuti vanase kuvangwarira.
24 Pasure po kuvhunjwa izvi, mungwariri wakavadira mukadheya yo mukati, wovasungira murenje pa matanda.
25 Asi pakati po usiku, Pauro na Sira vakaita mukumbiro no kukuja Mwari ngo ndumbo. Vandhu vamweni vainga vakasungwa, vaivazwa.
26 Ngo civhumbu, kwakaitika kuzungunyika kukuru ko nyika, kozungunyisa njiki jo kadheya yese. Kusiyapo izvi, musuvo jakafununguka, njinga jainga jakasunga vandhu, jakasujunuka.
27 Mungwariri wo kadheya naamuka mu hope, wovona musuvo jo kadheya jakashama, wakavhomora banga rake ecida kujiuraya ngokuti wairangarira kuti vandhu vaingaya vakasungwa vatiza.
28 Asi Pauro wakakhuwa ngo izwi guru eciti: “Ucajiuraya, tese tiri muno!”
29 Ngo kudaro, iyena wakakumbira cokuvheneka ndicona, wonghwina mukati ecigogoma no kutetemera, wogwadama pamberi pa Pauro na Sira.
30 Mungwariri wiya wakavabudisa kunja, wovavhunjisa kuti: “Ndoitenyi kuti ndizoponeswe?”
31 Ivona vakadavira kuti: “Tendai Mambo Jesu, iwewe no mbhuri yako munozoponeswa.”
32 Ivona vakamuvhunja masoko a Jehovha* pamwepo no vese vo pamuzi pake.
33 Pa nguva yondhoyo no usiku, wakavatora wosuka mavonje avo. Tevere, iyena no vopamuzi pake vakabhabhatijwa ngo kukasika.
34 Wakavatora woenda navo kumuzi kwake, wovadirira zvokuha pameza. Iyena no vese vo pamuzi pake, vakadakara maningi ngokuti vainga votenda Mwari.
35 Kunja no kwaeja, vatongi vakatuma varindiri kuti vaende koovhunja mungwariri wo kadheya kuti: “Budisai vandhu vaya.”
36 Mungwariri wo kadheya wakavhunja Pauro masoko aya, eciti: “Vatongi vatuma vandhu kuti imwimwi mo vaviri mubudiswe. Waro budanyi mupinde muno runyararo.”
37 Pauro wakavavhunja kuti: “Ivona vakatitaka pamberi po vandhu vese ticizivi kutongwa, pikija itusu tiri Varoma, perapo votidira mukadheya. Wari ivona voda kutipindisa ngo cifise-fise here? Andizvopi! Ivona ngavaviye kuzotibudisa.”
38 Vangwariri vakaenda kovhunja masoko aya ku vatongi. Ivona vakathya maningi pavakazwa kuti vandhu ava vainga Varoma.
39 Ngo kudaro, vakaviya vokumbira kuregerehwa, perepo vovabudisa kunja, vecivakumbira kuti vabude mu dhorobhemo.
40 Asi Pauro na Sira, pavakabuda mukadheya, vakaenda kumuzi ka Ridhiya. Ivona pavakavona hama, vakajivangisa, perepo vopinda.
Masoko o Pasi
^ Uwu ndiwona mujimu mucena wa Mwari wakaashihwa ndi Jesu.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “ecimima.”
^ Vonanyi Kudurujihwa ko Magama.
