Johani 1:1-51
1 Pakutanga kwainga no Soko, Soko rainga na Mwari, Soko iri, rainga mwari.
2 Pakutanga, iyena wainga na Mwari.
3 Mwari wakamushandisa kuti asike zviro zvese, apana cakavepo pacizivi kushandiswa iyena.
Upenyu hwakavepo
4 pecishandiswa iyena. Upenyu uhu, hwainga ruvheneko hwo vandhu.
5 Ruvheneko huri kuvheneka mucidima, asi cidima acizivi kuhunyisa.
6 Kwakabuda mwanarume wainga akatumwa inga muimiriri wa Mwari; zina rake rainga Johani.
7 Mwanarume uwu wakaviya inga capupu, kuti aite ucapupu hwo ruvheneko, kuti vandhu vo mushovo wese vatende ngo ndava yake.
8 Iyena aacaingepi ruvheneko hwondhohwo, asi wakaviya kuti ahuitire ucapupu.
9 Ruvheneko hwokadi hunovhenekera vandhu vese, hwainga hwoda kuviya mu nyika.
10 Iyena wainga mu nyika, asi nyika yakavepo pecishandiswa iyena, asi nyika aizivi kumuziva.
11 Iyena wakaviya ku nyika yaakabarihwa, asi vandhu vake avazivi kumuashira.
12 Ngo kudaro, vese vakamuashira, wakavatendera kuti vave vana va Mwari, ngokuti vakatenda zina rake.
13 Ivona avazivi kubahwa ngo kuda ko ngazi, ko nyama nokuti kuda ko vandhu, asi ngo kuda ka Mwari.
14 Ngo kudaro, Soko rakava nyama, roviya kuzogara pamwepo na itusu. Itusu takavona simba rake, simba ro mwana umwe ega* raakaashira recivha kuna baba; iyena wainga akazara ngo unyasha* hwa Mwari no cokwadi.
15 (Johani wakaita ucapupu ngo pamusoro pake, ecikhuwa* kuti: “Uwu ndiyena wandakanangaya kuti, ‘Wiya anoviya sure kwangu, wakanditangira, ngokuti iyena wakavepo inini ndicito.’”)
16 Iyena wainga akazara ngo unyasha hucikaezaniswi no cokwadi. Ngo kudaro, itusu tinoenderera mberi teciashira unyasha hucikaezaniswi.
17 Ngokuti Mwari wakapekeja Mutemo ecishandisa Mosi, unyasha hucikaezaniswi no cokwadi, zvakavepo ngo ndava ya Jesu Kristu.
18 Akuna mundhu wakambovona Mwari; mwana wake umwe ega wakatojana naye, ari pamutivi pa Baba, ndiyena wakadurujira kuti Mwari ndiyani.
19 Uhu ndihwona ucapupu hwakaithwa ndi Johani, Vajudha pavakatuma vapiri no Varevhi kuvha ku Jerusarema kuti vaende kovhunjisa kuti: “Ndiwe ani iwewe?”
20 Iyena aazivi kuramba, asi wakadavira eciti: “Inini andinipi Kristu.”
21 Ivona vakamuvhunjisa kuti: “Waro ndiwe ani? Ndiwe Eriya?” Iyena wakavadavira kuti: “Andinipi.” “Ndiwe Muporofeti?” Iyena wakavadavira kuti: “Haiwa!”
22 Ivona vakamuvhunjisa kuti: “Ndiwe ani? Tivhunjei kuti tiendevo kovhunja vatatumwa ndivona. Unonangenyi ngo pamusoro pako?”
23 Iyena wakati: “Ndiri mundhu ari kudanijira muzvipare, ndeciti: ‘Rungamisanyi gwanja ra Jehovha,* inga zvakanangwa ngo muporofeti Isaya.”
24 Vaya vainga vakatumwa vaivha ku Vafarisi.
25 Ivona vakamuvhunjisa veciti: “Waro ngenyi unobhabhatija, kuveni andiwepi Kristu, Eriya kana Muporofeti?”
26 Johani wakavadavira kuti: “Inini ndinobhabhatija ngo kumwa. Pakati penyu pano mundhu wamucikazivi
27 ari kutevera sure kwangu. Inini andifaneri kusujunura magwada ake.”
28 Zviro izvi zvakaitikira ku Bhetaniya, mwombera wo Jordhani kwaibhabhatijira Johani.
29 Mu njiku yakatevera, iyena wakavona Jesu eciviya kwaari, wonanga kuti: “Nga iri Vhuta ra Mwari rinovhisa zvishaishi zvo nyika!
30 Uwu ndiyena wandakanangaya kuti: ‘Sure kwangu kuri kuviya mundhu wakanditangira, ngokuti iyena wakavepo inini ndicito.’
31 Inini andicaimuzivepi, asi inini ndinobhabhatija ngo kumwa kuti iyena azivike ku Vaiziraeri.”
32 Johani wakaitazve ucapupu eciti: “Ndakavona mujimu mucena weciviya inga njiva wecivha kudenga, womata pamusoro pake.
33 Inini ndainga ndicikamuzivi. Asi Wiya wakandituma kuti ndibhabhatije ngo kumwa, wakandivhunja kuti: ‘Mundhu waunovona ecimathwa pa musoro pake ngo mujimu mucena, uwu ndiyena anobhabhatija ngo mujimu mucena.’
34 Inini ndakazvivona, ndozviitira ucapupu kuti uwu ndiyena Mwana wa Mwari.”
35 Njiku yakazotevera, Johani waiima no vajiji vake vaviri.
36 Paakavona Jesu ecifamba, wakati: “Nga iri Vhuta ra Mwari!”
37 Vajiji vake vaviri pavakamuzwa ecibhuya zviro izvi, ivona vakatevera Jesu.
38 Jesu wakasota sure wovavona vecimutevera, iyena wakavavhunjisa kuti: “Muri kupsakenyi?” Ivona vakamudavira kuti: “Rabhi (zvikasandujwa zvinoreva kuti: “Mujijisi”), muri kugara kwapi?”
39 Iyena wakavavhunja kuti: “Viyanyi kuzovona.” Ivona vakaenda, koovona paaigara, vogara naye njiku yondhoyo; jainga jecikhwedera kuita nguva murongomuna jo madeko.*
40 Andereya munukuna wa Simoni Pedhru, ndi umwe wo vaviri vakazwa zvakananga Johani, votevera Jesu.
41 Andereya wakatanga ngo kusongana na Simoni nevanji wake, womuvhunja kuti: “Tawana Mesiya” (zvikasandujwa zvinoreva kuti: “Kristu”).
42 Iyena wakaenda naye kuna Jesu. Jesu paakamuvona wakati: “Iwewe ndiwe Simoni, mwana wa Johani; unozodanijwa kuti, Khefasi” (zvikasandujwa zvinoreva kuti: “Pedhru”).
43 Mu njiku yakatevera Jesu waida kuenda ku Garireya. Perapo wakasongana na Firipi, womuvhunja kuti: “Ivai muteveri wangu.”
44 Firipi wainga wo ku Bhetsaidha, dhorobha ra Andereya na Pedhru.
45 Firipi wakasongana na Natanaeri, womuvhunja kuti: “Tasongana na wiya wakatahwaya ndi Mosi mu Mutemo na wiya wakatahwaya ngo vaporofeti kuti: “Jesu mwana wa Josefa, wo Nazareta.”
46 Asi Natanaeri wakamuvhunjisa kuti: “Ku Nazareta kungatovhavo mundhu wakanaka weya?” Firipi wakamudavira kuti: “Viyai kuzovona.”
47 Jesu wakavona Natanaeri eciviya kwaari, wonanga ngo pamusoro pake kuti: “Uwu ndiyena Muiziraeri wo cokwadi, acikacengejeri.”
48 Natanaeri wakamuvhunjisa kuti: “Mandizivisa kudini?” Jesu wakamudavira kuti: “Ndakuvona uri pasi po mukuyu, Firipi acito akudanija.”
49 Natanaeri wakamudavira kuti: “Rabhi, imwimwi muri Mwana wa Mwari, muri Mambo wo Vaiziraeri.”
50 Jesu wakamuvhunjisa kuti: “Unotenda ngo ndava yo kukuvhunja kuti ndakuvona uri pasi po muti wo mukuyu here? Iwewe unozovona zviro zvikuru kupinda izvi.”
51 Perapo Jesu wakamuvhunja kuti: “Ndinokuvhunja zvokadi kuti unozovona kudenga kwakafununguka, ngirozi ja Mwari jecikhwira no kubzuka jecienda ku Mwana wo mundhu.”
Masoko o Pasi
^ Kana: “mwana umwe wakaithwa ndi Mwari pacake.”
^ Kana: “unyasha hucikaezaniswi.”
^ Kana: “ecimima.”
^ Vonanyi Kudurujihwa ko Magama.
^ Gama ngo Gama: “nguva yocigumi.”
