Isaya 29:1-24
29 “Ariyeri* ano nyathwa. Ariyeri ndirona dhorobha Dhavhidhi raakaimisa tende yake!
Endererai mberi wecidaro makore ese;Mutambo yako ngaienderere mberi yeciithwa mukuvo wese.
2 Asi inini ndinozoviisa dambujiko mu Ariyeri,Imona munozova no kucema pamwepo no kucumba,Irona rinozova kwandiri inga simbe rinobwaka ro artari ya Mwari.
3 Inini ndinozomutendeneja,Ndinozomutendeneja ngo mamuti akapinjaNdozomuvakira rusingo kuti ndimuhwise.
4 Iwewe unozocikihwa pasi;Wozovereketa uri pasi,Masoko ako anozovhungwa ngo bukuta.
Izwi rako rinozozikira pasiInga izwi ra nyamusoro,Masoko ako anozoita ciweye-weye ecivha mubukuta.
5 Vavengi vako vanozoita inga upfu wakaceta,Mbungano yo vandhu vanobzinyirira inozoezana no ushwa unotohwa ngo mbhepo.
Izvi zvinozoitika pa mukuvo wondhowo, ngo civhumbo.
6 Jehovha wo hondo anozoviya kuti akubeseNgo mbheni, mudhuma ngo pasi no kutindhira kukuru,Mbhepo, zibepo no murazvu wo muriro unoparaja.”
7 Ngo kudaro, vandhu vo majinja ese vari kuita hondo na Ariyeri.Vese vari kumuhwisa,Ivona vari kumutendeneja ngo mupfimbijiVecimutambuja.Vanozoita inga kurota mucivoniso co usiku.
8 Hina, zvinozoita inga mundhu ano njara ari kurota eciha,Asi omuka ecizwa njara,Zvozoita inga mundhu ano nyota, orota ecimwa,Asi anomuka akaremba, ecizwa nyota.
Izvi ndizvona zvinozoitika no vandhu vese vo majinjaVari kuita hondo no dundhu ro Ziyoni.
9 Kanjamuswanyi no kushamaiswa;Zviitenyi mapofu, mugare muri mapofu.
Ivona vakarejera, asi avazivi kurejera ngo vhinyu;Ivona vari kuthethereka, asi avaripi kuthethereka ngo ndava yo doro.
10 Ngokuti Jehovha wamudururira mujimu wo kuvatisa;Iyena wafunga majiso enyu, imwimwi vaporofeti,Wofukija musoro yenyu, imwimwi vavoni.
11 Ngokuti komuri, civoniso cese cakaezana no masoko ari mubhuku rakanamwa. Pamunoripa mundhu ari wese anokwanisa kuverenga, munomukumbira kudari: “Tapota, verengai izvi ngo izwi guru,” iyena anozomudavira kudari: “Andikwanisi ngokuti rakanamwa.”
12 Pamunopa bhuku iri mundhu ari wese acikakwanisi kuverenga, momukumbira kudari: “Tapota, tiverengerei izvi,” iyena anozomudavira kudari: “Andikwanisi kuverenga.”
13 Jehovha anoti: “Vandhu ava vanokhwedera kwandiri ngo muromoVanondireremeja ngo muromo yavo,Asi mwoyo yavo iri ndhambo maningi na inini;Kunamata kwavanondiitira kwakacijikira pa mutemo yo vandhu, yavakajijiswa.
14 Ngo kudaro, ndinozoitirazve vandhu ava zviro zvinoshamaisa,Mushamaiso panyezuru po mushamaiso;Uzivi wo vandhu vavo vakangwara unozopera,Kuzwisisa ko vandhu vavo vakangwara kunozovigwa.
15 Vano nyathwa vandhu vaya vanoita zvese zvavanokwanisa kuti vafisire Jehovha zvavanoronga.
Ivona vanoita mabasa avo pa cidima,Vecinanga kudari: “Ndiyani ari kutivona?
Ndiyani anoziva zvatiri kuita?”
16 Ngenyi muno murangariro wakashata!
Kureva kuti muumbi wakaezana no dongo?
Kureva kuti ciro cakaithwa cingavhunja wiya wakaciita kudari:
“Andiyepi wakandiita?”
Kureva kuti ciro cakaumbwa cingavhunja wiya wakaciumba kudari:
“Iyena aazivi ciro?”
17 Kwasara nguva doko basi kuti Rebhanoni iithwe munda wo mucero,Munda wo mucero uithwe gwasha.
18 Pa njiku yondhoyo, vandhu vano mandondo vanozozwa masoko ari mubhuku,Majiso o mapofu anozovona ari pakasvipa no ari pacidima.
19 Vandhu vakapfava vanozodakara maningi ngo ndava ya Jehovha,Varombo vo panyika vanozotamba ngo ndava yo Mucena wo Vaiziraeri.
20 Ngokuti vandhu vanobzinyirira vanonga vacikozve.Mundhu anozvikuja anozoguma ku magumo,Vese vanogara vakateya kuti vakhuvaze, vanozourawa.
21 Vaya vanobhuya masoko o kunyepa kuti vape vamweni ndava,Na vaya vanoeja kuteya vandhu vaya vanojivirira vamweni pa musuvo wo dhorobha,Pamwepo na vaya vanobhuya zviro zvicina shwiro voramba kuitira zviro zvakarurama varurami.
22 Ngo kudaro, Jehovha wiya wakaponesa Abhirahama anonanga kudari ku nyumba ya Jakobe:
“Jakobe aazopserukizve,Kumeso kwake akuzocamwizve.
23 Ngo kudaro, paanozovona vana vake vari pakati pake,Mabasa o nyara jangu,Ivona vanozocenesa zina rangu;Hina, vanozocenesa Mucena wa Jakobe,Vozoreremeja maningi Mwari wo Vaiziraeri.
24 Vaya vakapanduka vanozozwisisa,Vaya vanon’gun’guta vanozotendera kujijiswa.”
Masoko o Pasi
^ Kangaije: “Simbe Rinobwaka ro Artari ya Mwari.” Kangaije zvecinangira Jerusarema.
