Apokaripsi 19:1-21
19 Pasure pa izvi, ndakazwa izwi guru raiita inga ro mbungano huru kudenga. Ivona vakati: “Simbanyi Jehovha!* Ruponeso, kukujwa no simba ngo zva Mwari wedu.
2 Ngokuti matongero ake ngo ocokwadi, iwona akarurama. Ngokuti wakatonga hure* huru yakasvipisa nyika ngo uhure wayo, woihwirijira ngo ndaya yo ngazi yo varanda vake iri mu nyara jayo.”
3 Ngo kukasika vakandivhunjazve pa vhaza yocipiri kuti: “Simbanyi Jehovha!* Usi hwayo hunoenderera mberi hwecikhwira mbhera narini, kwenda no kwenda.”
4 Makumaviri o vakuru no vakuru varongomuna pomwe no zvisikwa zvirongomuna zvinopona, vanogwadama vonamata Mwari anogara pa cigaro co umambo, vakati: “Ameni! Simbanyi Jehovha!”*
5 Pacigaro co umambo pakavhazve izwi reciti: “Simbanyi Mwari wedu, muthyenyi imwimwi vashandiri vake, vadoko no vakuru.”
6 Ndakazwazve zvaiita inga maizwi o mbungano huru no zvaiita inga maizwi o kumwa yakawanda no kupaja ko mbheni yakavanga. Ivona vaiti: “Simbanyi Jehovha,* ngokuti Jehovha* Mwari wedu wo Masimba Ese, watanga kutonga!
7 Ngatidakare no kudakarisisa tomukuja, ngokuti mucadho wo Vhuta waguma, mukaji waro wapera kujinasirira.
8 Ndizvona, iyena wakatendehwa kusimira nguvo jo mutengo mukuru, jomonikira no kucena. Nguvo jo mutengo mukuru iji, jinoiimirira zviito zvo ururami zvo vakasanwa.”
9 Ngirozi iya, yakandivhunja kuti: “Tarai kudari: Vanodakara vaya vanokokwa ku mabuso o mucadho wo Vhuta.” Yakandivhunjazve kuti: “Aya ndiwona masoko ocokwadi a Mwari.”
10 Pondhopo inini ndakagwadama pasi po soka jayo kuti ndiinamate. Asi iyona yakandivhunja kuti: “Bhasopai! Ucadaro! Ndiri muranda doni wako no muranda doni wo hama jako jinoita basa ro kuita ucapupu ngo pamusoro pa Jesu. Namatai Mwari! Ngokuti kuita ucapupu ngo pamusoro pa Jesu, ngaicona cinangwa co ciporofeti.”
11 Ndakavona kudenga kwakashama, ndovona haci yakacena. Iyona yaipakihwa ngo mundhu anodanijwa kuti Mugondeki no wo Cokwadi, iyena anotonga no kuita hondo ngo ururami.
12 Majiso ake akaita inga murazvu wo muriro, mu musoro make muno majunguja mazinji. Iyena ano zina rakatahwa ricikaziviki ngo mundhu ari wese. Ndiyena basi anoriziva.
13 Iyena wakasimira nguvo yakakhatika ngo ngazi, anodanijwa ngo zina rokuti Soko ra Mwari.
14 Cimwenizve, zvikwata zvo masoca okudenga zvaimutevera, zvakapakira haci jokucena. Izvona zvaisimira nguvo jokucena jo mutengo mukuru jicina svina.
15 Pamuromo pake paibuda banga rakareba ropinja,* kuti aparaje ndirona majinja. Iyena anozovahavisa ngo ndonga yo simbi. Kusiyapo izvo, iyena anocika mu cisviniro co vhinyu co ushungu hwa Mwari wo Masimba Ese.
16 Pa nguvo yake, hina, pa mutezo pake, pakatahwa zina rokuti Mutongi wo vatongi na Mambo wo majimambo.
17 Ndakavonazve ngirozi imweni yakaima pa zuva, yecidaninjira ngo izwi guru, yovhunja shiri jese, jinomburuka pakati po denga yeciti: “Izanyi kuno, ungananyi pa mabuso makuru a Mwari.
18 Muhe nyama yo majimambo, nyama yo vatungamiriri vo masoca, nyama yo vandhu vakavanga, yohaci no yo vapakiri vajo. Nyama yo vese, varanda no vaciripi varanda, vadoko no yo vakuru.”
19 Inini ndakavona cikara ciya, majimambo o nyika no zvikwata zvawo zvo masoca vakaungana kuti vahwisane no mupakiri wo haci no cikwata cake co masoca.
20 Cikara ciya cakabathwa pamwepo no muporofeti wokunyepa, waiitaya mushamaiso pambeji paco, ecishandiswa ndicona kuti acengeje vaya vakadihwa cinamiro co cikara na vaya vanonamata cithombi caco. Ivona vakakhandihwa mu gandhwa rinopisa ngo enshofre vari penye.
21 Asi vamweni vakaurawa ngo banga rakareba raibuda pa muromo po mundhu waipakiraya haci. Shiri jese jakaguta ngo nyama javo.
Masoko o Pasi
^ Gama ngo Gama: “Areruya!” Zvinoreva kuti: “Simbanyi Jah.” Jah izina ro kugurisira ra Jehovha. Vonanyi Kudurujihwa ko Magama.
^ Mu Cigiriki, por·nei′a. Vonanyi Kudurujihwa ko Magama.
^ Gama ngo Gama: “Areruya!” Zvinoreva kuti: “Simbanyi Jah.” Jah izina ro kugurisira ra Jehovha. Vonanyi Kudurujihwa ko Magama.
^ Gama ngo Gama: “Areruya!” Zvinoreva kuti: “Simbanyi Jah.” Jah izina ro kugurisira ra Jehovha. Vonanyi Kudurujihwa ko Magama.
^ Gama ngo Gama: “Areruya!” Zvinoreva kuti: “Simbanyi Jah.” Jah izina ro kugurisira ra Jehovha. Vonanyi Kudurujihwa ko Magama.
^ Vonanyi Kudurujihwa ko Magama.
^ Rinopita.
