Apokaripsi 18:1-24
18 Pasure pa izvi, ndakavona ngirozi imweni yecibzuka kuvha kudenga ino simba guru, nyika yakavhenekwa ngo kukujwa kwayo.
2 Iyona yakakhuwa* yeciti: “Rawa, rawa Bhabhironi Guru, iro raiita ndau yokugara yo madhimoni no ndau inogara mujimu jese jicizivi kucena no shiri jese jicizivi kucena no jinonyenyiwa.
3 Ngokuti majinja ese akarejera ngo vhinyu yo cido caro cokuita uhure,* majimambo o pasi pano akaita uhure na irona, vatengesi vakapfuma ngo simba ro upfumi hwarakaunganija ricikapseruki.”
4 Ndakazwa izwi rimweni recivha kudenga reciti: “Budanyi mukati maro vandhu vangu, kudari mucikadi kubatanijwavo muzvishaishi zvaro nokuti kudari mucikadi kuashira matambujiko aro.
5 Ngokuti zvishaishi zvaro zvaungana mbhera kudenga, Mwari worangarira zviito zvaro zvakashata.
6 Riitirenyivo zvarakaitira vamweni, zvokadi, rihwirijirenyi kakapethwa kaviri mu zviro zvo rakaita; mu kopo yorakanasirira doro, rinasirirenyivo zvakapethwa kaviri.
7 Irona raijikuja reciunganija upfumi ricikapseruki. Ngo kudaro, ritambujenyi meciriita kuti riceme* mukuzwirana no zvarakaita, ngokuti mwanakaji uwu ari kuenderera mberi ecinanga kudari ngo mu mwoyo make: ‘Ndiri kugara inga ndiri mambo, andiripi noni, andizocemi.’*
8 Ndizvona zvinoriitisa kuti matambujiko aro aviye ngo njiku imwe basi, matambujiko akadari inga rufu, kucema* no njara. Irona rinozopiswa kamare ngo muriro, ngokuti Jehovha* Mwari anoritongaro, ano simba.
9 “Majimambo o pasi pano, akaitaya uhure* na irona, ogara na irona eciunganija upfumi ricingapseruki, anozocema* ecijitaka paditi ngo pamusoro paro, paanozovona usi hwokubwaka kwaro.
10 Ivona vanozoima ngo ndhambo, vecithya ngo pamusoro po kutambujwa kwaro, veciti: ‘Inyathwa, inyathwa, Bhabhironi dhorobha guru rakavanga, kutongwa kwaro kwaguma ngo nguva imwe basi!’
11 “Cimwenizve, vatengesi vo pasi pese, vanozocumba no kucema* ngo pamusoro paro, ngokuti vanonga vacina mundhu wokutenga zviro zvavo.
12 Mujiyo jese jo goridhi, sirivha, mapuwe o mutengo mukuru no amweni anodanijwa kuti maperora, nguvo jo mutengo mukuru, nguvo jakapsukirikira no nguvo jo siriki no nguvo jokupsuka no zvese zvaiithwa ngo matabwa anonuhira no zviro zvese zvaiithwa ngo nyanga jo njou no matabwa o mutengo mukuru, utare no simbi no marimore;
13 kubatanijavo no kanera, ndhwiro jo ku Indiya, rubani, mafuta anonuhira, rubani unonuhira, vhinyu, mafuta o maorivhe, upfu wakanaka, trigu, n‵gombe, mavhuta, haci, ngoro, varanda no vandhu.
14 Iwewe Bhabhironi, zviro zvako zvakanaka zvawainga nazvo, aucina, mabuso awainga nawo no zvese zvakanaka zvawainga nazvo azvicazowanikizve kuri kwese.
15 “Vatengesi vo zviro izvi, vakakhupukaya ngo pamusoro paro, vanozoima ngo ndhambo ngo kuthya matambujiko arinozosongana naro. Ivona vanozocema* no kucumba,
16 veciti: ‘Inyathwa, inyathwa, ku dhorobha guru, rakasimijwa ngo nguvo jo mutengo mukuru, jokupsukirikira, jokupsuka, rakanasa kunemeswa ngo goridhi ro mutengo mukuru, mapuwe o mutengo mukuru no amweni anodanijwa kuti maperora,
17 ngokuti upfumi hwese howainga nahwo hwakaparajwa ngo nguva imwe basi!’
“Vatungamiriri vese vopiketi, vafambisi vo piketi no vese vanopona ngo zviro zviri mukumwa, vakaima ngo ndhambo.
18 Ivona vakakhuwa* pavaivona usi wokubwaka kwaro, veciti: ‘Akuzonazve dhorobha rimweni ringazoezana na iri.’
19 Ivona vakakhandira mavhu mu musoro mavo vecicema, vecicumba, vecideketera veciti: ‘Inyathwa, inyathwa, ku dhorobha guru, raingaya rino upfumi hwakaiitisa kuti vandhu vese vainga no piketi mu jombe, vakhupuke no upfumi hwaro, ngokuti irona raparajwa ngo nguva imwe basi!’
20 “Dakaranyi imwimwi kudenga ngo pamusoro paro, na imwimwivo vakasanwa, vapostori no vaporofeti, ngokuti Mwari ari kutonga dhorobha iri kuti abesere imwimwi!”
21 Ngo kudaro, ngirozi inosimba, yakamujura zibuwe rakakura, rakaezana no gwiyo, yorikhandira mu jombe, yeciti: “Ngo njira yakadari, Bhabhironi dhorobha guru, rinozokhandihwavo kamwe basi ngo kukasika rotama kuzovonekazve.
22 Iwewe Bhabhironi, kwauri akunazve mundhu anozozwa muimbi ecirija zvimadangari, nee vaimbi vecirija mutoriro no mbhayapaya. Mukati mako amuzowaniki mundhu eciita basa riri rese, nee amuzoziki kuvhuma ko gwiyo recikwiya.
23 Kwauri akunazve ruvheneko unozobwaka, akuzozikizve izwi ro mukwambo no murovohwi; ngokuti vatengesi vako vainga vakawanda pasi pano. Iwewe wakacengeja majinja ese ngo zviito zvako zvo mujimu.
24 Ndizvo. Irona rakavoneka rakazara ngo ngazi yo vaporofeti no vakasanwa no vandhu vese vakaurawa pasi pano.”
Masoko o Pasi
^ Kana: “yakamima.”
^ Mu Cigiriki, por·nei′a. Vonanyi Kudurujihwa ko Magama.
^ Kana: “ririre.”
^ Kana: “andizoriri.”
^ Kana: “kurira.”
^ Vonanyi Kudurujihwa ko Magama.
^ Mu Cigiriki, por·nei′a. Vonanyi Kudurujihwa ko Magama.
^ Kana: “anozorira.”
^ Kana: “kurira.”
^ Kana: “vanozorira.”
^ Kana: “vakamima.”
