2 Vakorinte 1:1-24
1 Inini Pauro, mupostori wa Kristu Jesu ngo kuda ka Mwari, na Timoti hama yedu, tiri kutarira ku ungano ya Mwari iri mu Korinte, kubatanijavo no vashandiri va Mwari vese vari mu Akaya yese:
2 Ivanyi no unyasha hucikaezaniswi no runyararo hwa Mwari Baba no hwa Jesu Kristu Mambo wedu.
3 Ngaasimbhwe Mwari na Baba wa Mambo wedu Jesu Kristu, Baba vakazara ngo usizi na Mwari anotondhoja vandhu vari pa mugariro jiri jese,
4 wiya anotitondhoja pa matambujiko edu ese, kuti tikwanisevo kutondhoja vamweni vari pa matambujiko ari ese ngo kutondhojwa kwatinoithwa ndi Mwari.
5 Kutambujika kwatinoita ngo ndava ya Kristu pakunowanda, kutondhojwa kwatinoithwa pecishandiswa Kristu, kunowandavo.
6 Kudari teciwanana no matambujiko, zvinomutondhoja no kumuponesa; kudari tecitondhojwa, imwimwi munotondhojwavo, zvomubesera kucungirira matambujiko atiri kusonganari nawo.
7 Vetero yatinayo ngo pamusoro penyu yakavanga, ngokuti muri kuwananavo no matambujiko atinawo wari, imwimwi munozotondhojwavo.
8 Hama, itusu atidi kuti mugare mucikazivi matambujiko atakasongana nawo mu porovhinsiya yo Aziya. Itusu takatambujika maningi kupinda simba redu, tainga toda kufa.
9 Zvokadi, takavona kuti tainga tatongehwa rufu. Izvi zvakaitika kuti titame kujithemba tega, asi kuti tithembe Mwari anomusaya vakafa.
10 Iyena wakatiponesa pa ngozi yo kufa yakadari, anozotiponesa. Itusu tinovetera kuti iyena anozoenderera mberi ecitiponesa.
11 Imwimwivo mungatibesa ngo mukumbiro jenyu jo kudeketera, kuitira kuti vandhu vazinji vabonge ngo pamusoro pedu ngo unyasha hwatakaitihwa pa kudavihwa ko mukumbiro jo vazinji.
12 Tinodada ngokuti hana yedu inoita ucapupu hwokuti tino hana yakacena ngokuti takava no mufambiro wakacena no womwoyo wese mu nyika, maningi-ningi pakati penyu. Kusiyapo izvo, atizivi kuita mukuzwirana no uzivi hwo nyika, asi takaita mukuzwirana no unyasha hucikaezaniswi hwa Mwari.
13 Ngokuti atiripi kutara ngo pamusoro po zviro zvamucikakwanisi kuverenga no kuzwisisa. Inini ndinovetera kuti munoenderera mberi mecinasa kuzwisisa zviro izvi,
14 inga zvamakazwisisa zvomuita kuti mudade ngo pamusoro pedu, itusu tinozodadavo ndimwi pa njiku ya Mambo wedu Jesu.
15 Ndecithemba izvi, ndaida kutanga kuzeyo, kuti mudakarezve hwocipiri;*
16 ngokuti ndaida kuza koomuvona ndecienda Masedhoniya, ndovha Masedhoniya ndoviyazve komuri, mozondiperekeja kuenda Judheya.
17 Pandakaronga zviro zvondhozvo, ndakazvivona inga zvicina basa here? Ndinoronga zviro inga mundhu wo kunyama, zvondiita kuti ndinange kuti “Hina,” perapo ndonanga kuti “Haiwa,” here?
18 Zvecivoneka kuti Mwari anothembeka, itusu tinothembekavo. Itusu atinangi kuti “hina” kuveni tiri kunanga kuti “haiwa.”
19 Ngokuti Mwana wa Mwari, Jesu Kristu wakacumaera pakati penyu ecishandisa itusu, inini na Sirivhano* pamwepo na Timoti, aazivi kuva “hina” asi pa nguva yondhoyo wova “haiwa,” asi kwaari “hina” wakava “hina.”
20 Azvinenyi kuti Mwari waita zvigondiso zvakawandisa kudini, izvona zvakava “hina” acishandisa iyena. Tinonangazve kuna Mwari kuti “Ameni” kuti akujwe ngo pamusoro pedu.
21 Asi wiya wakatithembesa kuti takazojwa ndiyena, anotiita kuti tive no cokwadi cokuti imwimwi na itusu tiri va Kristu. Wakatizoja ndiyena Mwari.
22 Iyena wakatidirazve cidhindho, wotipa cigondiso co zvinozoviya, zvinoreva, mujimu, mu mwoyo yedu.
23 Ndinodanija Mwari kuti andiitire ucapupu hwokuti ciri kundiitisa kuti nditame kuzeyo ku Korinte ngo cokuti andidi kumuhwajisa.
24 Itusu atiripi veno vo rutendo hwenyu, asi tinoshanda pamwepo tese kuti muve no mudakaro, ngokuti makaima ngo rutendo hwenyu.
