2 Pedhru 1:1-21
1 Inini Simoni Pedhru, muranda no mupostori wa Jesu Kristu, ndiri kutarira vaya vakawana rutendo hunosisira pamwepo na itusu, ngo ururami hwa Mwari no Muponesi wedu Jesu Kristu:
2 Unyasha hucikaezaniswi no runyararo ngahuengejehwe kwamuri ngo zivo yakarungama ya Mwari na Jesu Mambo wedu,
3 Ngo simba guru ra Mwari, takaashira zvese zvinodiwa kuti tive no upenyu hwo kujipira kuna Mwari. Takaashira zviro izvi ngo kuti itusu tinonasa kuziva Mwari. Iyena wakatidanija ngokuti wakakura no kunaka mwoyo.
4 Nga izvi, Mwari wakatigondesa zviro zvino mutengo mukuru, zvakadakaja maningi. Kuti ngo pamusoro pazvo imwimwi muve vandhu vakatojana na Mwari, meciponeswa mu kuvora ko nyika ino kunobahwa ngo zvido zvakashata.
5 Ngo ndava yazvo, vangisiranyi kuti muengejere rutendo hwenyu ngo kunaka mwoyo, kunaka mwoyo kwenyu ngo uzivi,
6 uzivi hwenyu ngo kujibata, kujibata kwenyu ngo kucungirira, kucungirira kwenyu ngo kujipira kuna Mwari,
7 kujipira kwenyu kuna Mwari ngo kuda hama, kuda kwenyu hama ngo rudo.
8 Ngokuti kudari mukava no zviro izvi zvoita ngo kufashukira pasi, zvinozomujivirira kuti mutame kuva vacikaiti basa ngo pamusoro po zivo yakarungama ya Mambo wedu Jesu Kristu.
9 Ngokuti wiya acina zviro izvi ibofu, anofunga meso ake* akambhera ngo kuvona ruvheneko, wokanganwa kujicenesa ku zvishaishi zvake zvokare.
10 Ngo kudaro hama, vangisiranyi kuti kudanijwa kwenyu no kusanwa kwenyu kuve ko cokwadi, ngokuti mukaramba meciita kudaro, imwimwi amucazoshaishizve.
11 Zvokadi, ngo njira iyi, munozonghwiniswa mu nduma yo Umambo hwa Mambo no Muponesi wedu Jesu Kristu.
12 Ngo ndava yazvo, ndinoda kumuceujira nguva jese zviro izvi pikija mecizviziva kare nokutizve makavanga mu cokwadi camunaco.
13 Asi ndinozvivona zvakanaka kumungwajazve pa zviro izvi, pandinonga ndiri mu tabherinake* iyi,
14 ndeciziva kuti tabherinake iyi inozovhiswa mbai-mbai pano, inga zvandakajekesehwa ndi Mambo wedu Jesu Kristu.
15 Ndinoita zvandinokwanisa kuti pasure po kupinda kwangu, mukwanise kuceukija* zviro izvi mwega.
16 Haiwa, aticaicijikirepi pa ngano jokunyepa jakaruhwa, patakamuzivisa simba no kuvepo ka Mambo wedu Jesu Kristu, asi takavona ngo meso edu ukuru hwake.
17 Ngokuti iyena wakakujwa no kutokoteswa ndi Mwari Baba, izwi guru parakamuvhunja kuti: “Nga uwu Mwana wangu anodiwa, anondidakajisa.”
18 Hina, masoko aya takamazwa ecivha mugore patainga naye pa dundhu rakacena.
19 Ngo kudaro tino masoko o ciporofeti anonasa kuthembeka, imwimwi muri kuita zvakanaka ngo kumazwira, kudari inga ruvheneko hunovheneka pa ndau ino cidima (mbhera kueje no kubuda ka masase*) mu mwoyo mwenyu.
20 Ngo kudaro, imwimwi munozviziva kuti akuna ciporofeti co Matahwa cakavepo ngo kudurujihwa ngo mundhu.
21 Ngokuti apana ciporofeti cakavepo ngo kuda ko mundhu, asi vandhu vaibhuya zvaivha ka Mwari vecitungamirihwa* ngo mujimu mucena.
Masoko o Pasi
^ Kangaije: “anoita bofu; anoita bute.”
^ Kana: “tende,” kana kuti, muviri wake wo pasi pano.
^ Kana: “kunanga.”
^ Kana: “ndhondho yo mazambakueja.”
^ Gama ngo Gama: “vecindundihwa.”
