2 Johani 1:1-13
1 Inini musharuka,* ndiri kutarira hambzaji yakasanwa* pamwepo no vana vayo, vandinoda maningi, kuciripi inini ndega basi asi no vese vakaziva cokwadi,
2 ngo pamusoro po cokwadi cinogara mukati medu, icona cinozogara na itusu mbhera narini.
3 Tinozova no unyasha hucikaezaniswi no pena* no runyararo hwa Mwari Baba no hwa Jesu Kristu Mwana wa Baba, pamwepo no rudo no cokwadi.
4 Ndakadakara maningi ngo kuziva kuti vana vako vamweni vari kufamba mu cokwadi, veciteveja mutemo watakapuwa ndi Baba.
5 Asi wari, hambzaji yangu, ndiri kukumbira kuti ngatidisane. (Andiripi kukutarira mutemo mupsa, asi mutemo watainga nawo kuvhira pa kutanga.)
6 Izvi ndizvona zvinoreva rudo kuti: tirambe tecifamba mukuzwirana no mutemo jake. Uwu ndiwona mutemo wamakazwa kuvhira pa kutanga, kuti munodikana kuramba mecidisana.
7 Kuno vacengeji vazinji vakavoneka mu nyika, ivona avatendi kuti Jesu Kristu wakaviya inga mundhu wo kunyama. Uwu anocengeja no kuzonda Kristu.
8 Ngwariranyi kuti mutame kuruza zviro zvatakawana ngo simba redu, asi kuti muwane mupfupo wakakwana.
9 Mundhu wese anopindirija jijiso ya Kristu aana Mwari. Asi wiya anoramba ari mu jijiso iyi, ana Baba no Mwana.
10 Kudari ariwese akamugumira acina jijiso iyi, mucamuashira pa muzi penyu kana kumucungamija.
11 Wiya anomucungamija anobatana no zviito zvake zvakashata.
12 Pikija ndino zviro zvizinji zvokukuvhunja, andidi kuzvitara pa karata, asi ndinoimira kuti ndinozogumeyo. Ngo kudaro tinozobhuya kamare tiri pamwepo, kuti udakare maningi.
13 Vana va yaya wako vokusanwa, vari kukutambisa.
Masoko o Pasi
^ Kana: “mukuru wo ungano.”
^ Gama ngo Gama: “mwanakaji wakasanwa.” Mwanakaji uwu anganangira ungano.
^ Gama ngo Gama: “unyasha.”
