1 Vatesaronika 2:1-20
2 Hama, munonasa kuzviziva kuti kuviya kwatakaita kondhono, akuzivi kuva kwabiresi.
2 Pikija takatambujwa no kuneswa mu Firipi inga zvamunoziva, takabesehwa ndi Mwari kuti tive vandhu vakacunga, pa kubhuya masoko akanaka ngo pamusoro pa Mwari pamberi po kuteverehwa.
3 Ngwajo yamunozwa yecivha kwatiri, aivhi ku murangariro wakashata, nee aivhi ku murangariro ucizivi kucena.
4 Zvecivoneka kuti Mwari wakatitendera kutipa basa ro kuzivisa masoko akanaka, tinobhuya ticingadi kudakajisa vandhu, asi tecida kudakajisa wiya anokwanisa kupopora mwoyo wedu.
5 Zvokadi imwimwi munozviziva kuti atizivi kushandisa masoko o kubata kumeso, kana o kunyepejera kuti tikwanise kucengejera vamweni. Mwari ndiyena capupu cedu!
6 Aticaipsakepi kukujwa ngo vandhu, nee aticaipsakepi kukujwa ndimwi kana ngo vandhu vamweni, pikija taitova hedu mutoro ku vamweni ngo kuva kwedu vapostori va Kristu.
7 Mukusiyana, itusu takava vandhu vakapfava pakati penyu, inga mai vanomwisa no kurera vana vavo ngo rudo.
8 Tino rudo hwakakura kudari, itusu takadakara maningi kumupa zvinopinda masoko akanaka a Mwari. Asi takamupavo upenyu hwedu kuti timubese ngokuti tinomuda maningi.
9 Imwimwi hama munonasa kuziva kuvangisira no kushanda ngo simba kwatakaita. Pataimucumaerera masoko akanaka anovha kuna Mwari, itusu taishanda usiku no masikati kuti titame kuva muthwaro kwamuri.
10 Imwimwi pamwepo na Mwari, munoita ucapupu ngo pamusoro po mugariro watainga nawo wakagondeka, wakarurama, ucina ndava patainga pakati penyu imwimwi vatendi.
11 Imwimwi munonasa kuziva kuti itusu taimungwaja, taimunyaraja, taipangira umwe na umwe wenyu, inga zvinoita baba ku vana vavo,
12 kuti murambe mecifamba zvakanaka pamberi pa Mwari. Iyena ari kumudanija kuti muve mu Umambo hwake pamwepo no nduma yake.
13 Ndizvona zvinotiitisa kuti tibonge Mwari ticikazorori, pamakaashira soko ra Mwari ramakazwa ndisu, amuzivi kuriashira inga soko ro mundhu asi makariashira inga soko riri kuvha ka Mwari. Irona riri kumucinja imwimwi vatendi.
14 Imwimwi hama makava mecitevejera ungano ja Mwari jiri mu Judheya, jakabatana pamwepo na Kristu Jesu, ngokuti imwimwi makatambujwa ngo vandhu vo munyika yenyu. Ivona vari kutambujwavo ngo Vajudha.
15 Ivona vakatouraya Mambo Jesu no vaporofeti vecititeverera. Kusiyapo izvo, ivona avaripi kudakajisa Mwari. Asi vari kuita zvinohwisana no vandhu vese,
16 ngokuti ivona vari kutirambisa kubhuya no vandhu vo majinja kuti vaponeswe. Pavanoita kudaro, vanonga vecizajisa zvishaishi zvavo. Asi pa kupejisira ushungu hwake hwakavagumira.
17 Asi patakaparajaniswa na imwimwi hama, pa cimukuvo cidoko mu muviri kuciripi mu mwoyo, ngo ndava yo cido cedu cakavanga, itusu takavangisira kuti tizeyo kuzomuvona.
18 Ngo ndava yazvo, itusu taida kuzeyo kuzomuvona, inini Pauro ndakaeja kaviri kuciripi kamwe, kuti ndizeyo kuzomuvona. Asi Sathana wakatifungira gwanja.
19 Ngokuti andimwipi vetero yedu, junguja redu ro kujikuja pamberi pa Mambo wedu Jesu pa kuvepo kwake? Andimwipi?
20 Imwimwi kamare ndimwi rukujo hwedu no mudakaro wedu.
