1 Pedhru 5:1-14
5 Inini mukuru doni wenyu wo ungano, fakazi yo matambujiko a Kristu, muashiri wo nduma inozovoneswa, ndiri kukonokeja* vakuru vese vo ungano vari kondhono kuti:
2 Havisanyi mushambi wa Mwari wamuri kungwarira, meciita vavonereri vawo* pamberi pa Mwari ngo mwoyo wese, mucikaiti ngo kuvangirijwa. Mucazviita ngo kuda kuwana ciro ngo njira yakashata, asi zviitenyi ngo mudakaro wese.
3 Mucajiita majimambo o ndhaka* yamakapuwa ndi Mwari kuti muingwarire, asi ivanyi muezaniso ku mushambi uwu.
4 Pa nguva yaanozotatijwa pambhene muhavisi mukuru, munozoashira junguja ricikaperi ro rukujo.
5 Imwimwivo majaha, zwiranyi madhodha.* Asi imwimwi mwese simiranyi undhu hwo kujidodokesa* pakati penyu, ngokuti Mwari anozonda vanojikuja, asi anoitira unyasha hucikaezaniswi ku vandhu vanojidodokesa.
6 Ngo kudaro, jidodokesenyi pasi po nyara ino simba ya Mwari, kuti iyena azomukuje pa nguva kwayo,
7 pamunonga mecikhandira kwaari kuthimwa-thimwa kwenyu kwese, ngokuti ndiyena anomukorondha.
8 Ivanyi makarinda, ngwariranyi! Muvengi wenyu Dhiyabhu, ari kufamba-famba inga mbhondoro iri kubhonga, yecipsaka kuvhavhura mundhu.
9 Asi hwisananyi naye muno rutendo hwakavanga, meciziva kuti matambujiko akadaro ari kuwananavo no hama jenyu jo munyika yese.
10 Asi sure ko kutambujika padoko, Mwari wo unyasha hwese hucikaezaniswi, wakamudanijaya kuti muviye ku nduma yake icikaperi mu kuzwirana na Kristu, anozopejisa kurovejwa kwenyu. Iyena anozomuvangisa, anozomupa simba, iyena anozomudira pa maambo akavanga.
11 Iyena ngaave no simba mbhera narini. Ameni.
12 Ndamutarira masoko mashoma aya, ngo nyara ya Sirivhano, wandinovona kuti i hama yangu yakagondeka, kuti ndimuvangise no kumuitira ufakazi hwo kuti, uhu ndihwona kamare unyasha hucikaezaniswi hwa Mwari. Vanganyi mauri.
13 Mwanakaji* ari mu Bhabhironi wakasanwa inga ndimwi, ari kumutambisa no mwana wangu Marko ari kumutambisavo.
14 Cungamijananyi ngocenyu ngo mwoyo wese.*
Mwese makabatana na Kristu ivanyi no runyararo.
Masoko o Pasi
^ Kana: “kukumbira.”
^ Kana: “vanonasa kuungwarira ushoni.”
^ Kana kuti: mushambi.
^ Kana: “vakuru vo ungano.”
^ Kana: “simiranyi murangariro wo kujidodokesa.”
^ Mwanakaji uwu anoimirira ungano.
^ Gama ngo Gama: “ngo bhejhu ro rudo.”
