1 Johani 2:1-29
2 Vana vangu, ndiri kumutarira zviro izvi kuti mucaita cishaishi. Asi, kudari mundhu akaita cishaishi, tino mubeseri* wakarurama Jesu Kristu ari pamwepo na Baba.
2 Ngokuti ndiyena muripiri wo zvishaishi zvedu kuti tiviirane na Mwari, haiwa zvedu basi, asi kubatanijavo zvishaishi zvo vandhu vo nyika yese.
3 Nga izvi, tinozwisisa kuti tinomuziva, kudari tikaramba tecizwira mutemo jake.
4 Wiya anonanga kuti: “Inini ndinomuziva,” asi acingateveji mutemo jake, ari kunyepa, mundhu uwo aana cokwadi.
5 Asi, wiya anoteveja soko rake, ngo gwinyiso rudo hwa Mwari hwakakwana kwaari. Ngo kudaro tinoziva kuti takabatana naye.
6 Wiya anonanga kuti anoramba akabatana naye, anodikana kuramba ecifambavo inga ndiyena.
7 Hama jinodiwa, andiripi kumutarira mutemo mupsa, asi ngo wo kare, wamunawo kuvhira pakutanga. Mutemo wokare uwu, ndirona soko ramakazwaya.
8 Ndiri kumutarirazve mutemo mupsa, uri wokadi-kadi kwaari no kwamuri, ngokuti cidima ciri kukhirira,* ruvheneko huri kuvheneka.
9 Wiya anonanga kuti ari pa ruvheneko asi wozonda hama yake, aciri mu cidima.
10 Wiya anoda hama yake, anoramba ari mu ruvheneko, kwaari akuna cinomukhugunya.
11 Asi, wiya anozonda hama yake ari mucidima, ari kufamba mu cidima, aaripi kuziva kwaari kuenda ngokuti waithwa bofu ngo cidima.
12 Vana vangu, ndiri kumutarira ngokuti zvishaishi zvenyu zvakaregerehwa, ngo ndava yo zina rake.
13 Ndiri kumutarira imwimwi majibaba, ngokuti makaziva wiya ariyo kuvhira pakutanga. Ndiri kumutarira imwimwi majaha ngokuti makanyisa mushati. Ndiri kumutarira imwimwi vana vadoko, ngokuti makavaziva Baba.
14 Ndinomutarira imwimwi majibaba, ngokuti makaziva wiya ariyo kuvhira pakutanga. Ndinomutarira imwimwi majaha, ngokuti makavanga, soko ra Mwari rinoramba riri mamuri, imwimwi makanyisa Sathana.*
15 Mucada nyika pomwe no zviro zvayo. Wiya anodisa nyika, rudo hwa Baba ahuripi naye;
16 ngokuti zvese zviri mu nyika, zvakadari inga zvido zvo muviri, kuemura ko majiso no kujikuja ngo upfumi, azvivhi kuna Baba asi ngo zvo nyika.
17 Kunja kwa izvi, nyika no zvido zvayo zviri kukhirira,* asi wiya anoita kuda ka Mwari anoramba aripo mbhera narini.
18 Vana vangu, iyi i nguva yo kupejisira, inga zvamakazwa kuti muvengi wa Kristu anozoviya. Wari kwabuda vavengi va Kristu vakawanda, ngokudaro tinoziva kuti iyi i nguva yo kupejisira.
19 Ivona vakavha pakati pedu, asi avacaingepi vedu, ngokuti no vainga vedu, vaizogara na itusu. Asi vakabuda pakati pedu kuti zvivoneke kuti asipi vese vainga vedu.
20 Imwimwi mwese makazojwa nga wiya wakacena, mwese munozviziva.
21 Ndinomutarira imwimwi, haiwa ngokuti amuzivi cokwadi, asi ngokuti munociziva ngokuti akuna manyepo anovha mu cokwadi.
22 Ndiyani munyepi aciripi wiya anoramba kuti Jesu ndiyena Kristu? Uwu ndiyena muvengi wa Kristu, anoramba Baba no Mwana.
23 Wiya anoramba Mwana, aaripivo pamwepo na Baba. Asi wiya anonanga kuti anotenda Mwana, anotendavo Baba.
24 Kuna imwimwi, rambanyi meciita zvamakazwa pa kutanga. Kudari mukaramba meciita zvamakazwa pa kutanga, munozoramba makabatana no Mwana, mobatanavo na Baba.
25 Cimwenizve, iyena kamare wakatigondesavo upenyu hucikaperi.
26 Ndinomutarira zviro izvi ngo pamusoro pa vaya vanopsaka kumupausa.
27 Kwamuri, kuzojwa kwamakaithwa ndiyena rambanyi munako, apana anodikana kuva mujijisi wenyu. Kuzojwa kwamakaithwa ndiyena kunomujijisa zviro zvese, ikona ngo kokadi, asipi ko kunyepa. Inga zvaakamujijisa, rambanyi makabatana naye.
28 Wari vana vangu, rambanyi makabatana naye, kuti paanozovoneswa pambhene, tinozovereketa takasujunuka, atizoreyi* kwaari takapseruka pa kuvepo kwake.
29 Mukaziva kuti iyena wakarurama, munozivavo kuti wese anoita zvakarurama ndi mwana wa Mwari.
Masoko o Pasi
^ Kana: “muimiriri.”
^ Kana: “kupinda.”
^ Gama ngo Gama: “mushati.”
^ Kana: “kupinda.”
^ Kana: “atizofunduruki.”
