Ruka 16:1-31
16 Jesu wakavhunjazve vajiji vake kuti: “Mwanarume umweni mukhupuki, wainga no muvonereri wo zviro zvake. Muvonereri wondhowo wakapumbhwa kuti waireja-reja upfumi hwa patarau wake.
2 Iyena wakamudanija womuvhunja kuti: ‘Zvandiri kuzwari ngo pamusoro pako azvizivi kunaka. Endai kotara mashandisire awakaita mare yangu ngokuti andicakutenderi kuti uvonerere nyumba ino.’
3 Iyena wakarangarira kuti: ‘Waro ndoitenyi, ngokuti patarau wangu ari kundibudisa basa ro kuvonerera. Inini andikwanisi kurima, ndinopseruka maningi ngo kuzopembha.
4 Yaa! Ndazviziva zvokuita, kuti ndikabudiswa pa basa ndiwane kuzoashihwa ngo vandhu mu mamuzi mavo.’
5 Iyena wakadanija vandhu vese vaifiyari patarau wake. Wovhunja wokutanga kuti: ‘Uri kufiyari mutengonyi patarau wangu?’
6 Iyena wakadavira kuti: ‘Ndiri kufiyari zviuru zviviri no mazana maviri* o ritru jo* mafuta o maorivhe.’ Iyena wakamuvhunja kuti: ‘Ngo kukasika, torai phepha ratakasainaya, kuti utare ciuru cimwe no zana* ro maritru* o mafuta o maorivhe.’
7 Tevere, wakavhunja umweni kuti: ‘Kuzoti iwewevo, uri kufiyari mutengonyi?’ Iyena wakadavira kuti: ‘Zana* ro mupimo mukuru jo tirigu.’ Muvonereri wiya wakati kwaari: ‘Torai phepha rako rotakasainaya, utare makumasere.’
8 Patarau wake, wakamusimba, pikija wakashaisha, iyena wakaita zvo ungwaru. Ngokuti vana vo nyika* ino vakangwara maningi kupinda vashandiri va Mwari.*
9 “Ndinomuvhunjazve kuti: Psakanyi shamwari ngo upfumi hucizivi kururama, ijona jinozomuashira mu ndau jinogara kwenda no kwenda.
10 Mundhu anogondeka pa zviro zvishoma anogondekazve pa zviro zvizinji, mundhu acizivi kugondeka pa zviro zvishoma aazivizve kugondeka pa zviro zvizinji.
11 Kudari mucikagondeki ngo upfumi hucizivi kururama, ndiyani anozomugonda ngo upfumi hwokadi?
12 Kudari mukatama kugondeka pamunoshandisa zviro zvo vandhu vamweni, ndiyani anozomupa upfumi hwamakanasiririhwa?
13 Akuna mushandi anokwanisa kushandira vandhu vaviri. Ngokuti anozonyenya umwe woda umweni, kana kuti anozoshandira umwe, wonyenya umweni. Amukwanisi kushandira Mwari pamwepo no Upfumi.”
14 Vafarisi vaidaya maningi mare, vaipurukira zviro zvese izvi. Ivona vakatanga kumuseka.
15 Ngo kudaro, iyena wakati kwavari: “Imwimwi muri vaya vanojiita vakarurama pamberi po vandhu, asi Mwari anoziva zviri mu mwoyo mwenyu. Ngokuti zviro zvinovoniwa kuti zvinosisira ngo vandhu, azvisisiri kuna Mwari.
16 “Mutemo no vaporofeti zvaitokoteswa mbhera kuviya kwa Johani. Kuvhira pa mukuvo wondhowo, masoko akanaka o Umambo hwa Mwari ari kutokoteswa. Umambo uhu ndihwona huri kupsakwa maningi ngo vandhu vo mushovo wese.
17 Zvokadi, zvakareruka matenga no nyika kukhirira. Asi akuna retra doko yo Mutemo inotama kukwanirisika.
18 “Mundhu wese anorambana no mukaji wake wocadha umweni, anoita upombo. Ariwese anocadha no mwanakaji wakarambwa, anoita upombo.
19 “Kwainga no mukhupuki umweni waisimira nguvo yakapsukirikira inodhura. Njiku jese waiita mabuso.
20 Asi mupembhi* umweni waidanijwa Razaro, waianja kudihwa pa musuvo pake, wakazara ngo mavonje.
21 Iyena waida kuguta ngo mbhakata jaimbhwera pa meza yo mukhupuki uwu. Imbhwa jaitoviyavo jecinakata mavonje ake.
22 Pa kufamba ko nguva, mupembhi* wiya wakafa, wothwahwa ngo ngirozi kuenda kuna Abhirahama.
“Mukhupuki wiya wakafavo, wovigwa.
23 Naari mu Guva,* pakati po matambujiko, wakamusa majiso wovona Abhirahama ngo ndhambo, na Razaro ari pamutivi pake.
24 Iyena wakadanija eciti: ‘Baba Abhirahama, ndiitirenyivo usizi, mutume Razaro kuti abije kumbhiri ko cikunwe cake ngo kumwa, aze kotondhoja rurumi hwangu. Ngokuti ndiri kutambujika mu murazvu wo muriro.’
25 Asi Abhirahama wakati: “Mwanangu, ceujai kuti wainga no zviro zvakawanda zvakanaka pawainga penye, asi Razaro waitambujika. Asi iyena ari kuembejehwa muno, iwewe uri kutambujika.
26 Kusiyapo zviro zvese izvi, pakati pedu pano rindi rakajikisisa. Ngo kudaro, vaya vanoda kuvha kuno veciza kouri waro, avakwanisi, nee vandhu vanoda kuvha kouri waro veciza kuno.’
27 Mukhupuki wiya wakati: ‘Kana zvakadaro, baba ndinomukumbira kuti mumutume kuenda kanyi ka babangu,
28 ngokuti ndino hama shanu. Iyena anodikana kunasa kujivhunja zvakaperera kuti jitamevo kuza mu ndau yo kutambujika ino.’
29 Asi Abhirahama wakati: ‘Ivona vano matahwa a Mosi no ovaporofeti; ngavapurukire zvaanonanga.’
30 Iyena wakadavira kuti: ‘Andizvopi, baba Abhirahama, kudari ari wese anovha ko vakafa woenda kwavari, ivona vanozokhauya.’
31 Asi Abhirahama wakati: ‘Kudari ivona vacikapurukiri zvinonanga matahwa a Mosi no ovaporofeti, nee kukaenda mundhu wamuswa ko vakafa ivona avazomutendi.’”
Masoko o Pasi
^ 2.200.
^ Gama ngo Gama: “ndiri kufiyari zana ro mabhato o.” Bhato rimwe rinokhwedera kuita makumaviri o ritru no ritru mbiri.
^ 1.100.
^ Gama ngo Gama: “utare makumashanu o mabhato.” Bhato rimwe rinokhwedera kuita makumaviri o ritru no ritru mbiri.
^ 100.
^ Vonanyi Kudurujihwa ko Magama.
^ Gama ngo Gama: “kupinda vana vo ruvheneko.”
^ Kana: “mundhu anokumbira zimora.”
^ Kana: “mundhu anokumbira zimora.”
^ Kana: “Haidhesi,” kufa kunoita vandhu vese. Vonanyi Kudurujihwa ko Magama.
