MUSOLO WO KUJIJA 43
NGOMA 90 Vangisananyi Umwe no Umweni
Gwanja Lokunyisa Ndirona Kutama Kuva no Cokwadi
“Ivanyi no cokwadi co zviro zvese.”—1 VAT. 5:21.
ZVATISAJIJA
Mucijijo cino, tinozojija kuti tingapejesa kudini kukaya-kaya kusingacinji kungakanganisa basa redu kuna Jehovha.
1-2. (a) Kukaya-kaya kupi kunoitika kuvanamati va Jehovha? (b) Tinozobhuisana ngo pamusoro penyi mu cijijo cino?
NGUVA JIMWENI vandhu vomupira wese vangakaya-kaya. a Inga muezaniso, ambolangariranyi mujaha ari mupariji asito kubhabhatijwa, angazvivhunjisa kuti: Jehovha unohanya nae here? Ngo ndava yo kukaya-kaya uku iyena angalangarira kuti aato anasirira kuti abhabhatijwe. Muezaniso wo cipiri: Langariranyi ngo zvo hama imweni ino makore ari pakati no pakati, yakakheta pa ujaha wayo kuti ikande basa la Mwari pakutanga, pano kupsaka mare yakawanda munyika ino. Panonga pesipera mare yavo yo kusapota mbhuri, ivona vanotanga kulangarira kuti vakaita zvikhetwa zvakanaka here pavainga vari mujaha. Muezaniso wo citatu: Ambolangariranyi hanzvaji imweni yakula zvokuti aisina simba rakawanda inga lo yainga naro kare. Ivona vanganeseka maningi ngokuti avasakwanisi kuita zvavaiita kare. Yemwi makambozvivhunjisa here kuti: ‘Jehovha unondilangarirawo kamare here? Kuvangisira kondakaita ndesimushandira kunokosha here? Yeni ndisiri kukosha here kuna Jehovha?’
2 Kudai tikasiya muvhunjo jakadai inga iji jisina mupingulo, zvingavhiringija kunamata kedu Jehovha. Mucijijo cino, tinozobhuisana kuti, kukanda mulangariro jedu pa mulairo jo muBhaibheri kungatibesesa kudini kudai tesikaya-kaya kuti: (1) Jehovha unotida kamare here, (2) zvikhetwa zvotakaita kare zvakanaka here, uye (3) tisiri kukosha kuna Jehovha here.
MUNGAITENYI KUTI MUNYISE KUKAYA-KAYA KENYU
3. Igwanja ripi ratinganyisa ndirona kutama kuva no cokwadi?
3 Kuti tipeje kukaya-kaya kedu, tinodikana kujija soko la Mwari kuti tiwane mupingulo jo muvhunjo jedu. Kudai tikaita kudalo, kutenda kedu uye ushamwari wedu na Jehovha unozovanga uye “tinozova vakavanga uye vakacunga.”—1 VaK. 16:13.
4. Tingaitenyi kuti “tive no cokwadi co zviro zvese”? (1 VaTesaronika 5:21)
4 Verenganyi 1 VaTesaronika 5:21. Makwanisa kuwona kuti Bhaibheri rinotivangisa kuti tinodikana “kuva no cokwadi no zviro zvese.” Tingazviitisa kudini izvi? Tingava no cokwadi cokuti zvatinotenda ngo zvo cokwadi, kudai tikathemba zvinobhuiwa ngo Bhaibheri. Somuezaniso, ambolangariranyi ngo mujaha umweni anogara esizvivhunjisa kuti: Inini ndinokosha pamberi pa Mwari here? Kubhuya kuti iyena unodikana kutendera kuti mulangariro uwu ngowo cokwadi here? Haiwa, ngokuti iyena “unodikana kuva no cokwadi co zviro zvese” kubatanijawo no kupsaka mulangariro wa Jehovha pa shwiro iyi.
5. Tinozwisa kudini “madavirire” anoita Jehovha muvhunjo jedu?
5 Patinoverenga soko la Mwari, “tinozwa” Jehova esibhuya nesu. Asi kuti tiwane mulangariro jake pa muvhunjo jatinajo zvinoda kuti tivangisire. Tinodika kuvangisira pakuverenga katinoita Bhaibheri maningi-ningi pa shwiro jinotinesa. Tinodikana kupsakisisa ngo pamusolo po shwiroyo, tesishandisa mabhuku atinopuwa ngo sangano la Jehovha. (Zvi. 2:3-6) Yesu, tinodikana kuita mukumbiro kuna Jehovha kuti atibese patinonga tesipsakisisa mupingulo jo muvhunjo jedu. Tikapeja kuita kudalo, tinodikana kupsaka mazano omuBhaibheri anowirirana no zvatiri kusangana nazvo. Tingapsakazve muezaniso jomuBhaibheri jo vashandiri va Mwari vo kare vakasangana no zvineso zvakafanana no zvedu.
6. Musangano yatinoita inotibesesa kudini pakutama kuva no cokwadi katinako?
6 Gwanja rimweni rinoshandiswa ndi Jehovha kuti abhuye nesu ngo lo musangano yo ungano. Kudai tikaramba tesipinda musangano nguva jese, tingazwa mazano angatibesa pa hurukuro kana pa mupingulo wo hama kana hanzvaji unozwirana no zvatiri kusangana nazvo uye zvingatibesa kuti tinyise kukaya-kaya kedu. (Zvi. 27:17) Zvino, ngatende tiwone kuti tingaitisa kudini kuti tipeje kukaya-kaya katinako.
MUNGAITENYI KUDAI MESIKAYA-KAYA KUTI JEHOVHA UNOMUDAKARIRA HERE
7. Muvhunjo jipi jinovhunjiswa ngo vamweni?
7 Yemwi makambozvivhunjisa kuti: ‘Jehovha unodilangarirawo here?’ Kudai mesizvizwa inga musingakoshi, mungaguma pa kulangarira kuti azviiti kuti imwimwi muve no ushamwari no musiki wo zviro zvese. Mulangariro uwu, wakafanana no wakava na Mambo Dhavhidhi. Iyena wakashamiswa ngo kuziva kuti Jehovha unotoziva vandhuwo havo, zvokuti wakaguma pakuvhunjisa kuti: “Jehovha Mwari wangu, mundhu ndiyani kuti yemwi mumukoshese, ndiyani mwana wo mundhu kuti yemwi mu muyaeye?” (Pis. 144:3) Ngakupi kamungawana mupingulo jo muvhunjo uwu?
8. Maererano na 1 Samueri 16:6, 7, 10-12, Jehovha unowonenyi ku vandhu?
8 MuBhaibheri, tinojija kuti Jehovha unowona vaya vanoita inga vasikakoshi ku vandhu vamweni. Somuezaniso, Jehovha wakatuma Sameri kumuzi ka Jese kuti azoje umwe wo mwana wake wo rumwe kuti azova mambo wo vaIsraeri. Jese wakadanija vana vake vanomwe pa vasere vaainga navo kuti vasangane na Sameri, asi aato kubatanijawo Dhavhidhi, uwo wainga mudoko pa vese. b Ngokudalo, Jehovha wainga akheta Dhavhidhi kuti azova Mambo wo vaIsraeri. (Verenganyi 1 Samueri 16:6, 7, 10-12.) Jehovha wakawona kuti wainga ani Dhavhidhi. Iyena wakawonazve kuti wainga mujaha waimuda maningi uye waireremeja zviro zvokunamata.
9. Ngenyi mungava no cokwadi cokuti Jehovha unomudakarira? (Wonanyi foto.)
9 Langariranyi kuti Jehovha unokhombijisa kudini kuti unomuzwisisa. Iyena angamupa mazano akafaneya pa mugariro wamuri kusangana nawo. (Pis. 32:8) Angazviitisa kudini izvi, kudai naainga asikanasi kumuziva zvakanaka? (Pis. 139:1) Pamunoshandisa mazano amunopuwa ndi Jehovha no kuwona kuti ari kumubesesa kudini, imwimwi munozothemba kuti Jehovha unomuda maningi. (1 Mak. 28:9; Mab 17:26, 27) Jehovha unowona zvese zvamunoita kuti mumunamate. Iyena unowona undhu wo mukati wamunawo wokuda kuva shamwari yake uye izvi zvinomuita kuti ade kumubesera kuti murambe muri munamati wake. (Jer. 17:10) Iyena unodakala maningi ngo kuva no ushamwari nemwi.—1 Joh. 4:19.
“Kudai mukapsaka Jehovha, iyena unozoita kuti mumuwane.” —1 Mak. 28:9 (Wonanyi ndima 9) c
MUNGAITENYI KUDAI MUSINA COKWADI NO ZVIRO ZVOMAKAKHETA KARE
10. Patinolangarira ngo zvatakakheta kare, muvhunjo ipi inoviya mumulangariro medu?
10 Ngo kuhamba ko nguva muupenyu, vamweni vangalangarira kuti: Zvandakakhetari kuita zvakanaka here? Nguva jimweni, vakaregera kuita basa raivapa mare kuti vakwanise kunamata Jehovha vasina zvaivaphinga. Zvino, paanomakore akawanda mesiwona vandhu vavanoziva vakatevera mudakalo wo nyika ino vesidakajirwa ngo upenyu uye vano mare yakawanda. Pejisire vangazvivhunjisa kuti: ‘Zvandakaita ndesipeja nguva yangu mu basa la Jehovha zvinokosha here? Kana kuti zvakandiita kuti ndiruze mukana wangu wo kuita zviro zvimweni?’
11. Munyori wozvo Mapisarema 73 waineseka ngo pamusoro penyi?
11 Kudai muno muvhunjo jakafanana na iji, langariranyi ngo zvo munyori wo Pisarema 73. Iyena waiwona vandhu vainga vasikanamati Jehovha vesidakajwa ngo upenyu, vasina matambujiko, vakaganya uye vasikaneseki. (Pis. 73:3-5, 12) Paakawona kuganya kavo, wakalangarira kuti kunamata kake Jehovha akagondeka akusaibesa ciro kana cikhetwa cake cokushandira Jehovha cainga cisito kunaka. Iyena “nguva jese waineseka” maningi ngo mulangariro uwu unowoja mweyo. (Pis. 73:13, 14) Dhavhidhi wakanyisisa kudini mulangariro uwu wakashata?
12. Maererano na Mapisarema 73:16-18, zvicinyi zvakabesa munyori uwu kuti arwisane no mulangaririo jakashata?
12 Verenganyi Mapisarema 73:16-18. Munyori wo mapisarema wakaenda kundau yakacena ya Jehovha uye ino runyalaro. Iyena wakazolangarira zvakanaka. Dhavhidhi wakazwisisa kuti, kunyange upenyu wo vandhu vasikanamati Jehovha wesikhombija kuva wakanaka zvino, asi avana soterero yo lamangwana rakanaka. Ngokuzwisisa uku, iyena aatozve kuzoneseka ngo zvaainga akheta uye waithemba kuti kushandira Jehovha cainga ciro caikosha maningi muupenyu wake. Mukupejisira, iyena wakazokheta kuramba esinamata Jehovha.—Pis. 73:23-28.
13. Mungawanisa kudini runyalaro mumulangariro kudai musina cokwadi no zviro zvomakakheta munguva yakadarika? (Wonanyi foto.)
13 Inga zvakaizwa ndi Dhavhidhi, imwimwivo mungava no runyalaro rakafanana mumulangariro. Kuitisa kudini? Ambolangariranyi ukoshi wamunawo kuna Jehovha no makamborero amunawo zvino okuva no ushamwari wakavanga naye pamwepo no makomborero omunozova nawo munolamangwana. Vandhu vasikanamati Jehovha avana zviro zvakadai uye avatowani besero la Jehovha. Kuna vaya vasikanamati Jehovha, zvinokosha maningi kavari kuva no basa lakanaka, upenyu wakanaka, ngokuti ivona avana ciri cese cavanosoterera munguva yo mberi. Ngokudalo, ivanyi no cokwadi cokuti Jehovha unotigondesa makomborero akawanda kupinda zviri zvese hazvo zvatingalangarira nyamasi uno. (Pis. 145:16) Ambolangariranyi izvi basi: Mungakwanisa kuziva kuti upenyu wenyu waizova wakadini kudai musito kukheta kunamata Mwari here? Ciro cimwe camunodikana kulangarira nga ici: Kudai mukakheta kunamata Jehovha Mwari ngo rudo lese uye nokuda kubesa vamweni, imwimwi nguva jese munozova no zvamunoda uye munozova makadakala.
Sotanyi mberi kumakomborero omakapikirwa ndi Jehovha (Wonanyi ndima 13) d
KUDAI MUSINA COKWADI COKUTI MUNOKOSHA KUNA JEHOVHA
14. Mugariro jipi jiri kusangana no vamweni? Uye muvhunjo upi wavanozviita?
14 Vashandiri vamweni va Jehovha avasakoni kuita zvavaiita kare ngo ndava yokuneseka ngokuva vasharuka, vogara vesitambujika ngo utano kana kuti kurarama vano cineso co mumuviri. Zviro izvi, zvingavaita kuti vazwe vasikakoshi mumaonero a Jehovha. Vangatoguma pakuzvivhunjisa kuti: ‘Yeni ndisiri kukosha kuna Jehovha here?’
15. Munyori wozvo Mapisarema 71 wakazwisisa ngo pamusoro penyi?
15 Munyori wo Mapisarema 71 wakakhombija kuneseka kakafanana paainga aamusharuka. Iyena wakaita mukumbiro esiti: “Musandisiya kudai simba langu rapera.” (Pis. 71:9, 18) Kunyange kuti Dhavhidhi wainga waamusharuka, iyena wakaramba ano cokwadi cokuti, kudai akaramba esinamata Jehovha akathembeka, iyena waizomutungamirira uye waizomutsigira. Dhavhidhi wakajija kuti, Jehovha unodakala maningi nga vaya vanoita zvavanokona pakumunamata pasinenyi no zvineso zvavari kusangana nazvo.—Pis. 37:23-25.
16. Vandhu vaavasharuka vangabesa Jehovha ngo maitire api? (Mapisarema 92:12-15)
16 Kudai muri musharuka, wonanyi mugariro wenyu inga mawonerwe aunoizwa ndi Jehovha. Zivanyi kuti Jehovha angakona kumubesa kuti mubudire muno zvokunamata kunyange mesineseka mumuviri. (Verenganyi Mapisarema 92:12-15.) Pano kukanda mulangariro wenyu pa zviro zvamusikakoni kuita, kandanyi mulangariro wenyu pa zviya zvamunokona. Somuezaniso, mungakona kuvangisa vamweni ngo muezaniso wenyu kamare wo kuthembeka uye kudakala kamunoita. Mungabhuisana no vamweni ngo mabesere akamuita Jehovha pamakore adarika uye ngozvapi zvigondiso zvomuBhaibheri zvamuri kusoterera munolamangwana. Zivanyizve kuti mukumbiro jenyu jo mweyo wese jamunoitira vamweni, jinosimba maningi uye jinokosha. (1 Pet. 3:12) Pasinenyi no maponero edu, tese hedu tingaita zvakawanda kuna Jehovha pamwepo no vamweni vedu.
17. Ngenyi tesidikana kuvhisa cido cokuzviezanisa no vamweni?
17 Kudai mesineseka ngo kuti amusiripi kuita zvakawanda mubasa la Jehovha, ivanyi no cokwadi cokuti Jehovha Mwari unokoshesa maningi zvese zvamuri kumuitira. Nguva jimweni, mungada kuezanisa zvamunoita no zvinoizwa ngo vamweni. Asi musaita zvakadalo! Ngenyi? Ngo ndava yokuti Jehovha aadi kuezanisa kakadalo. (VaG. 6:4) Somuezaniso, Mariya wakapa Jesu cipo co mafuta anonuhirira uye anodhura maningi. (Joh 12:3-5) Mukusiyana, noni imweni yainga isina zvakawanda yakaita mupiro kuthemberi ngo zvimare zviviri zvisingakoshi. (Ruka 21:1-4) Jesu aato kuezanisa zvipo zvo vanakaji vaviri ava, asi mukusiyana iyena wakawona kuti vese vainga no kutenda kakavanga. Jesu waitevejera babake, ngokudalo, ivanyi no cokwadi cokuti Jehovha unowona zvese zvamunomuitira azvinenyi nokuti zvidoko.
18. Icinyi cinozotibesa kukurira kutama kuva no cokwadi katinako? (Wonanyi bokiso rakazwi: “ Soko la Jehovha Ringakona Kumubesa Kuti Musakaya-kaya.”)
18 Nguva jimweni, tese tinombotama kuva no cokwadi. Inga zvotajija, soko la Mwari Bhaibheri ringatibesa kuti tirwisane no kutama kuva no cokwadi. Ngo kudalo, shandanyi ngo simba kuti muwane mupingulo jo muvhunjo jenyu uye siyanyi kuti kuthemba kenyu kunyise kukaya-kaya kamunako. Zivanyi kuti Jehovha anonasa kumuziva kamare. Iyena unodakala maningi paanowona kuvangisira kamuri kuita kuti mukande kunamata pakutanga uye unozomupa mubairo. Ivanyi no cokwadi cokuti Jehovha unoda maningi vanamati vake uye unoneseka nga umwe nga umwe wavo.
NGOMA 111 Zvinotiita kuti Tidakare
a MASOKO AKASANANGURWA: Mucijijo cino, tiri kubhuisana ngo kutama kuva no cokwadi, kunotiita kuti tineseke ngo pamusoro po ukoshi wedu kuna Jehovha uye na zviya zvatakakheta. Kukaya-kaya uku andikopi kunobhuiwa mu Bhaibheri kuti kungakwanisa kurembesa kutenda kedu muna Jesu pamwepo no kuzvipikirwa zvatakagondeswa ndi baba vedu Jehovha.
b Kunyange Bhaibheri risingabhui mupira wainga na Dhavhidhi paakakhetwa ndi Jehovha, asi iyena wainga asiri cimujaha kamare.—Wonanyi Mungwaji ya 1 ya Setembro yo 2011, pheji 29, ndima 2 mu Cishona.
