CIJIJO 15
Jesu ndiyani?
Mundhorowondho yo vandhu, Jesu nga umwe wo vandhu vanonyanya kuzivika maningi kudarika vandhu vese vakamborarama pasi pano. Kunyange zvakadalo, vandhu vakawanda vanondogumira pakuziva zina lake basi, vasingazivi zvakawanda ngo zvake, uye vanobhuya zvakasiyana-siyana ngo zvo kuti umbori ani. Asi Bhaibheri rinoti kudini ngo zvake?
1. Jesu Ndiyani?
Jesu mundhu wo mweya, unosimba uye unogala kudenga. Asati asika zviro zvese, Jehovha wakatanga kusika Jesu. Ngo zvinoita kuti adanijwe kuti ‘dangwe lo zvisikwa zvese.’ (VaKorose 1:15) Bhaibheri rinobhuya kuti Jesu Mwana wa Mwari ‘akabarwa ari ega’ ngokuti ndiyena akasikwa ndi Jehovha pacake kamare. (Johani 3:16) Jesu wakashanda pamwepo na Baba vake Jehovha, esivabesa pakusika zviro zvese. (Verenganyi Zvirevo 8:30.) Jehovha na Jesu vanodanana maningi. Jesu unozwi “Soko,” ngokuti ndiyena anobhuya masoko no ndhungamiriro esiemerera Mwari.—Johani 1:14.
2. Ngenyi Jesu wakaviya panyika?
Makore 2.000 adarika, Jehovha wakashandisa mweya wake mupsvene kuita cishamiso cokuvhisa Jesu kudenga womuviisa panyika, izvi wakazviita paakakanda upenyu wa Jesu mundani mo mbhandwe yaizwi Mariya. Izvi zvakaita kuti Jesu abarwe inga mundhu wo nyama. (Verenganyi Ruka 1:34, 35.) Jesu wakaviya panyika kuti azoita Mesiya kana kuti Kristu, wainga akabhuiwa kare kuti waizoviya panyika pano kuti azoponesa vandhu. a Zvese zvakabhuiwa mu Bhaibheri ngo zva Mesiya, zvakazajika pana Jesu, uye zvakabesa vandhu kuziva kuti ndiyena wainga ‘Kristu Mwanakomana wa Mwari anopona.’—Mateu 16:16.
3. Jesu uri kupi zvinezvi?
Jesu paakafa, wakamuswa ano muviri wo mweya akahwirira kudenga, uye paakaguma konayo, ‘Mwari wakamupa rukujo.’ (VaFiripi 2:9) Zvinezvi uno, Jesu ingirosi inosimba lakakula maningi zvokuti Jehovha basi ndiyena anomudarika.
JIJANYI ZVIZINJI
Jijanyi zvimweni ngo zva Jesu, uye wonanyi kuti ngenyi zvesikosha kumuziva.
4. Jesu asiyena Mwari wo Masimba Ese
Bhaibheri rinojijisa kuti kunyange hazvo Jesu unosimba kudarika ngirosi jese, anozvikanda pasi pa Jehovha, Mwari wake na Baba vake. Ngenyi tesidalo? Wonanyi VHIDHIYO kuti muzwe zvinobhuiwa ngo Bhaibheri, ngo musiyano uripo pakati pa Jesu na Mwari wo Masimba Ese.
Mavhesi anotevera anozotibesa kuwona kuti Jehovha na Jesu vandhu vaviri vakasiyana. Verenganyi vhesi iji, mapeja bhuisananyi ngo muvhunjo jinotevera:
Verenganyi Ruka 1:30-32.
-
Ngirosi yakabhuya kuti Jesu wainga ani kuna Jehovha Mwari “wo Kumusoro-Soro”?
Verenganyi Mateu 3:16, 17.
-
Pakabhabhatijwa Jesu, izwi lakavha kudenga lakati kudini?
-
Munolangarira kuti lainga izwi laani?
Verenganyi Johani 14:28.
-
Pamuzi ndiyani anosimba lokutuma umweni, aba kana kuti mwana?
-
Jesu waida kubhuyenyi paakati Jehovha ndi Baba vake?
Verenganyi Johani 12:49.
-
Jesu unolangarira kuti wakaezana na Baba vake here? Iyemwiwo munoti kudini?
5. Zvinokhombija kuti Jesu ndiyena wainga Mesiya
Bhaibheri rino uporofita wakawanda wakabesa vandhu kuti vazive Mesiya, wiya wakakhetwa ndi Mwari kuti azoponesa vandhu. Wonanyi VHIDHIYO inobhuya ngo zvo uporofita wakazajiswa ndi Jesu paainga ari pasi pano.
Verenganyi uporofita uri mu mavhesi aya mapeja bhuisananyi ngo muvhunjo jinotevera:
Verenganyi Mika 5:2 kuti muwone uporofita unokhombija kuti Mesiya waizowoneka riini panyika. b
-
Uporofita wo kaizobarirwa Jesu wakazajika here?—Mateu 2:1.
Verenganyi Mapisarema 34:20 na Zekaria 12:10 kuti muwone uporofita unobhuya ngo mafire aizoita Mesiya.
-
Uporofita uwu wakazajika here? —Johani 19:33-37.
-
Jesu wakaita zvokuronga here kuti uporofita uwu uzajike kaari?
-
Zvakaitikari izvi zvinokhombijenyi ngo zva Jesu?
6. Zvinokosha kuti tijije ngo zva Jesu no basa lake
Bhaibheri rinobhuya ngo zvo kukosha kokujija ngo zva Jesu no basa lake. Verenganyi Johani 14:6 na 17:3, mapeja bhuisananyi ngo muvhunjo unotevera:
-
Ngenyi zvinokosha kuti tijije ngo zva Jesu?
Jesu wakavhura mukana wokuti tive shamwari ya Mwari. Iyena wakajijisa cokwadi ngo zva Jehovha, uye ngo ndava yake tinokwanisa kuwana upenyu usingaperi
VAMWENI VANOTI: “Zvapupu zva Jehovha azvitendi muna Jesu.”
-
Mungavadavirisa kudini?
TAJIJENYI
Tajija kuti Jesu ingirosi inosimba, uye kuti ndiyena Mwanakomana wa Mwari uye Mesiya.
Muvhunjo Jokuhwirijira
-
Ngenyi Jesu esizwi “dangwe lo zvisikwa zvese”?
-
Jesu asati aviya panyika pano, wakaitenyi?
-
Tinozvizivisa kudini kuti Jesu ndi Mesiya?
JIJANYI ZVIMWENI
Jijanyi zvakawanda ngo zvo basa la Jesu inga Mesiya.
“Jesu Ndiyena Mesiya Anobhuiwa Muuporofita here?” (Mu saiti jw.org)
Jijanyi kuti ndizvona here kuti Mwari wakabara Jesu ngo mabarirwe amwewo no anobarwa vana.
Verenganyi muzwe kuti Bhaibheri rinoti kudini ngo zvo jijiso yo utatu.
“Jesu ndi Mwari Here?” (Nharireyomurindi, 1 ya Abril yo 2009)
Verenganyi ngo zvo kucinja ko upenyu wo mwanakaji umweni paakajija zvinobhuiwa mu Bhaibheri ngo zva Jesu.
“Ngenyi mwanakaji mu Judhiya wakaongorora kutenda kake” (Mukai! wa Maio wa 2013)
a Muzvijijo 26 na 27 tinozojija kuti ngenyi tesida kuponeswa, uye kuti Jesu unotiponesesa kudini.
b Wonanyi pakazwi Nasanyi Kuzwisisa 2 kuti muwone ngo uporofita wainga wakanasa kubhuya kuti Jesu waizoviya riini panyika.
