IBhayibhili lithi uNkulunkulu ufuna abantu ‘baxwaye ukuziphatha okubi kwezemacansini.’ (1 KwabaseThesalonika 4:3) Nxa iBhayibhili likhuluma ‘ngokuziphatha okubi kwezemacansini’ liyabe lisitsho ukufeba, ubutabane kanye lokuya emacansini lomuntu ongatshadanga laye.

•  Kungani kuqakathekile kuNkulunkulu ukuthi abantu abathandanayo baqale batshade bengakahlali bonke?

•  Abathandanayo kumele baqale bahlale bonke yini bengakatshadi ukuze babone ukuthi bayahambelana?

•  Abatshadileyo bangawuqinisa njani umuzi wabo?

•   UNkulunkulu nguye owaqalisa umtshado. Lokhu wakwenza ngesikhathi ehlanganisa u-Adamu lo-Eva. (UGenesisi 2:22-24) Wayengahlosanga ukuthi indoda lomfazi bahlale ndawonye bengatshadanga.

•   UNkulunkulu nguye okwaziyo okungasithokozisa. Waqalisa umtshado ehlose ukuthi abantu abatshadileyo bahlale ndawonye kuze kube nini lanini lokuthi uncede futhi uvikele yonke imuli. Ngokwesibonelo, ezinye impahla zendlini zithengwa zilebhuku elitshoyo ukuthi kumele zisetshenziswe njani. UMdali wethu laye uyasitshela okumele sikwenze ukuze izimuli zethu ziphumelele. Ukulalela imilayo kaNkulunkulu kuyasinceda sonke isikhathi.—U-Isaya 48:17, 18.

•   Ukuya emacansini lomuntu ongatshadanga laye kungakulimaza. Ngokwesibonelo, ungazithwala ungahlelanga, ube lomkhuhlane kumbe uhlale ukhathazekile. a

•   UNkulunkulu wenza ukuthi abantu benelise ukuba labantwana ngokuya emacansini. UNkulunkulu uyakuqakathekisa ukuphila njalo ukwenelisa ukuba labantwana yisipho esiligugu. Ufuna sitshengise ukuthi siyasihlonipha isipho lesi ngokuqala sitshade.—KumaHebheru 13:4.

 Ukuqala lihlale ndawonye lingakatshadi ayisikho okuzakwenza ukuthi imuli yenu iphumelele. Kodwa lingaphumelela nxa lizimisele ukuthi lithembeke komunye lomunye futhi libambisane ekulungiseni inhlupho ezingaba khona. b Ukutshada yikho okuzalenza lizimisele ukuhlala ndawonye.—UMathewu 19:6.

 Akulamuzi ongathunqi intuthu. Kodwa nxa abatshadileyo bengalandela okutshiwo liBhayibhili bazaphumelela. Nanku okunye okumele bakwenze:

•   Qakathekisa okufunwa ngumkakho.—1 KwabaseKhorinte 7:3-5; KwabaseFiliphi 2:3, 4.

•   Kumele lithandane futhi lihloniphane.—Kwabase-Efesu 5:25, 33.

•   Funda ukungakhulumi loba yini efika ekhanda.—IZaga 12:18.

•   Bekezelelanani futhi liphangise ukuthethelelana.—KwabaseKholose 3:13, 14.