Akulandawo eBhayibhilini lapho okukhulunywa khona ngokukhipha isisu. Loba kunjalo akhona amavesi atshengisa indlela uNkulunkulu abona ngayo ukuphila, okugoqela lokomntwana osesiswini.

 Ukuphila yisipho esivela kuNkulunkulu. (UGenesisi 9:6; IHubo 36:9) Uyakuqakathekisa konke ukuphila okuhlanganisa lokomntwana ongakazalwa. Yikho nxa umuntu ekhipha isisu kufanana lokuthi usebulele.

 Umthetho uNkulunkulu awunika ama-Israyeli wawusithi: “Uma amadoda alwayo angatshaya umfazi ozithweleyo abesebeletha isikhathi sakhe singakafiki, kodwa engalimalanga kakubi, owonileyo kumele ahlawuliswe lokho okuyabe kubizelwe yindoda yomfazi kwasekuvunywa ngumthethwandaba. Kodwa kungaba lokulimala okubi, kumele impilo ikhwitshizwe ngempilo.”—U-Eksodusi 21:22, 23. a

•  Iqalisa nini impilo yomuntu?

•  UNkulunkulu angamthethelela yini umuntu owake wakhipha isisu?

•  Kubi yini ukukhipha isisu nxa kuyikuthi ukuphila kukamama loba okomntwana kusengozini?

 KuNkulunkulu impilo yomuntu iqalisa nxa owesifazana ethatha isisu. ELizwini lakhe iBhayibhili, uNkulunkulu utshengisa ukuthi nxa umntwana esasesiswini uyabe evele esengumuntu. Ake sihlole ezinye izibonelo ezitshengisa ukuthi kuNkulunkulu umntwana osesiswini losezelwe kuyafanana.

•   INkosi uDavida yaphefumulelwa ukuthi ithi: “Amehlo akho awubona umzimba wami ungakabi lesimo.” (IHubo 139:16) Amazwi la atshengisa ukuthi kuNkulunkulu, uDavida wayesengumuntu ngesikhathi esesiswini.

•   UNkulunkulu wayesekwazi ukuthi uJeremiya wayezakuba ngumphrofethi lanxa wayengakazalwa. Wamtshela wathi: “Ngingakakubumbi esiswini ngakwazi, ungakazalwa ngakukhetha ngakubeka ukuba ngumphrofethi ezizweni.”—UJeremiya 1:5.

•   Umlobi weBhayibhili uLukha owayengudokotela wasebenzisa ibala lesiGrikhi elifananayo lapho ekhuluma ngomntwana osesiswini lowayesezelwe.—ULukha 1:41; 2:12, 16.

 Ye uNkulunkulu angamxolela umuntu owakhipha isisu ikakhulu nxa laye eseyiqakathekisa impilo. Umuntu onjalo akumelanga ahlale ezithonisisa ngalokho akwenzayo. IBhayibhili lithi: “UJehova ulesihawu njalo ulomusa, . . . Njengobukhatshana bempumalanga kuyo intshonalanga kanjalo ususile iziphambeko zethu kithi.” b (IHubo 103:8-12) UJehova uyabathethelela bonke abaphenduka ngeqiniso ezonweni zabo, okuhlanganisa lalabo abake bakhipha izisu.—IHubo 86:5.

 Sesibonile ukuthi iBhayibhili liyatshengisa ukuthi ukuphila komntwana ongakazalwa kuqakathekile, yikho akumelanga umuntu agijimele ukukhipha isisu ngenxa yokuthi ubona angani impilo yakhe loba eyomntwana ingaba sengozini.

 Kodwa ngekabani impilo okumele isindiswe nxa sekulesimo esibangela ukuthi impilo kamama loba eyomntwana osesiswini ibe sengozini? Nxa kungaba njalo indoda lomkayo bangazenzela isinqumo sokuthi ngokukabani ukuphila abazazama ukukusindisa.