Udadewethu okuthiwa nguGwen odabuka e-England ulandisa indlela akukholisa ngayo ukuncedisa lapho okulabamemezeli abalutshwana elizweni le-Albania uthi, “Ngangingakucabangi ukuthi kumnandi kangaka ukukhonza uJehova ngalindlela.” a

 Udadewethu uGwen ngomunye waboFakazi abanengi abathutha baya e-Albania ukuze bayencedisa ukuqoqa “abathandwayo kuzo zonke izizwe.” (UHagayi 2:7) Kuyini okubakhuthaza ukuthi baye endaweni le? Yiluphi utshintsho abalwenzileyo ukuze kube lula ukuya khona? Kuyini abakukholisayo okubanceda ukuthi babekezelele ubunzima abahlangana labo khonale?

 Okwenza abamemezeli bonke laba babuye bazoncedisa e-Albania yikuthi bayamthanda uJehova njalo bafuna ukuncedisa labanye ukuthi bamazi.

 Abafowethu labodadewethu laba bahle baqalisa ukwenza okunengi bengakayi e-Albania. Lokhu kubancede ukuthi benelise ukubekezelela ubunzima abahlangana labo khonale. Udadewethu uGwen uthi: “Ngahle ngatshintsha ibandla ngayangena leqembu elikhuluma isi-Albania elisedolobheni lakithi njalo ngavakatshela e-Albania ngayangena umhlangano wesabelo. Ngaphinda ngabuyela ngayahlala khona okwesikhatshana ukuze ngiyefunda kuhle ulimi.”

 Udadewethu uManuela yena wathi eleminyaka engu-23 wasuka ebandleni ayekulo wayancedisa kwelinye ibandla elincane komunye umhlubulo welizwe lakibo e-Italy. Ubika ukuthi wahlala endaweni leyo okweminyaka emine njalo wezwa ukuthi kufunakala abamemezeli abangancedisa e-Albania. Wasehlela ukuthi ake ayephayona khona okwenyanga ezithile.

 Udadewethu uFederica yena wayeleminyaka engu-7 ngesikhathi esizwa umbiko ovela e-Albania emhlanganweni wesabelo. Uthi umzalwane owayebethulela umbiko lowo wathi, “Abamemezeli abanengi e-Albania baqalisa izifundo zeBhayibhili ezinengi futhi labantu abalesifiso sokufunda bayangena imihlangano. UFederica uthi, “Ngatshela abazali bami ukuthi lami ngiyafuna ukuya e-Albania. Lokho kwabamangalisa kakhulu ubaba wasesithi, ‘Khuleka ngayo indaba le nxa uJehova efuna uye khona uzaphendula.’ Ngemva kwenyanga ezithile mina labangakithi sacelwa ukuthi siyencedisa e-Albania.” Sekwadlula iminyaka eminengi sibili njalo udadewethu uFederica sewatshada lomzalwane okuthiwa ngu-Orges futhi basenkonzweni yesikhathi sonke e-Albania.

 Umfowethu uGianpiero wathi esethethe impentsheni yena lomkakhe uGloria basebethutha baya e-Albania. Ubika ukuthi bakhulisa abantwababo e-Italy futhi abathathu babo bathi sebekhulile bathutha bayancedisa kwamanye amazwe okulabamemezeli abalutshwana. Uthi okwakhuthaza imuli yakhe yiNqabayokulinda eyayilesihloko esithi, “Welela eMakhedoniya.” Kanti njalo bahlala phansi baxoxisana ukuze babone ukuthi imali yakhe yempentsheni yayisenela yini ukuthi bayencedisa e-Albania.

 Labo abafuna ukuyancedisa lapho okulabamemezeli abalutshwana kumele balungiselele bengakayi khona. (ULukha 14:28) Okunye okumele bacabangisise ngakho yikuthi bazaphila ngani nxa sebekhonale. Udadewethu uGwen esikhulume ngaye uthi yena wathi elokhu esese-England wathutha wayahlala lodadewabo ukuze enelise ukugcina imali. USophia loChristopher labo abadabuka e-England bona babika ukuthi bathengisa imota yabo lenye impahla yendlini. Bathi babezitshela ukuthi bazahlala e-Albania okomnyaka nje kodwa okuthokozisayo yikuthi bahlala okwesikhathi eside.

 Abanye abamemezeli bayancedisa e-Albania okwenyanga ezithile, besebephenduka bayesebenza elizweni lakibo bagcine imali, besebebuyela futhi e-Albania. Lokhu yikho kanye okwenziwa ngu-Eliseo lomkakhe uMiriam. Umfowethu uEliseo uthi: “Indawo umkami uMiriam avela kuyo e-Italy yindawo ejayele ukufika izethekeli ezivela kwamanye amazwe futhi kulula ukuthola umsebenzi ongawenza okwesikhathi esithile. Sasijayele ukuya khona siyebambabamba okwenyanga ezintathu ngesikhathi sokutshisa, besesibuyela siyencedisa e-Albania okwenyanga ezingu-9 sisebenzisa imali esiyabe siyitholile. Sakwenza lokhu okweminyaka emihlanu.”

 Abamemezeli abancedisa kwezinye indawo kuyabe sekumele bayephila endaweni abangayijayelanga kodwa amacebo abawanikwa ngoFakazi abahlala endaweni lezo ayabasiza ukuthi banqobe ubunzima obutshiyeneyo. Udadewethu uSophia esike sakhuluma ngaye uthi: “Ngesikhathi somqando e-Albania kuyaqanda kakhulu ezindlini ukwedlula kithi e-England. Yikho ngangikopa indlela odadewethu bakuleyondawo abagqoka ngayo ukuze lami ngikhudumale.” Umfowethu uGrzegorz lomkakhe uSona basuka kibo ePoland bayancedisa kwelinye idolobho elihle okuthiwa yiPrizren eKosovo. b Umfowethu lo uthi: “Abamemezeli abasendaweni le bathobekile balomusa futhi bayabekezela. Bayasincedisa ukuthi sifunde ulimi lezinye izinto ezinengi. Babesitshengisa izitolo ezilentengo ephansi njalo besichasisela lokuthi senzeni nxa sithenga ukudla emakethe kanye lokunye esikudingayo.”

 Abafowethu labodadewethu abancedisa kwamanye amazwe bayathokoza. Bayakukholisa ukuba lobungane laboFakazi abasendaweni lezo kanye lokwazi okunengi ngabo. Udadewethu uSona uthi: “Ngikubonile ukuthi indlela uJehova asithanda ngayo iyabatshintsha abantu. Ukubona indlela abafowethu abatshintsha ngayo batshiya izinto ababezenza lalokho ababekukholwa ngesikhathi befunda ngoJehova, kuluqinise kakhulu ukholo lwami. Bayasithanda kakhulu futhi siyakubona ukuthi siluncedo ebandleni. Sikhonza labafowethu labodadewethu abangabangane bethu.” (UMakhu 10:29, 30) Udadewethu uGloria yena uthi: “Banengi odadewethu engibaziyo ababekezelela ukuphikiswa kabuhlungu ngabantu abasemphakathini abazonda oFakazi. Indlela abamthanda ngayo uJehova iyangithinta.”

 Okunye abakukholisayo yikufunda izinto ezintsha ababengasoze bazifunde emazweni akibo. Ngokwesibonelo babonile ukuthi nxa ungavuma ukutshintsha utshiye ezinye izinto owawuzijayele ukuze wenze okunengi emsebenzini kaJehova uyathokoza. Umfowethu uStefano uthi: “Elizweni lakithi ngangitshumayela kuma-intercom ngixoxa labantu kancane nje. Kodwa abantu be-Albania bayakuthanda ukuxoxa okwesikhathi eside bezinathela ikhofi nje. Mina vele ngilenhloni kakhulu, ekuqaliseni kwakusiba nzima futhi ngangingakwazi lokuthi ngithini. Kodwa ngokuya kwesikhathi ngafunda ukuba lendaba labantu futhi khathesi sengikukholisa ukuxoxa labo. Ngiyayikholisa kakhulu inkonzo.”

 Udadewethu uLeah lomkakhe uWilliam abadabuka e-United States labo bathutha baya e-Albania. ULeah uthi: “Ukuba lapha kusifundise izinto ezinengi. Sesifunde ukwamukela abanye emzini wethu, inhlonipho kanye lokuba lobungane. Sifunde lendlela ezintsha zokutshumayela, lokuxoxisana labantu ngeMibhalo lendlela zokukhuluma nje.” UWilliam yena uthi: “Abantu abanengi abavakatshela e-Albania bathathwa umoya ngamatheku amahle asendaweni le. Mina ngithanda kuyakhwela nje ezintabeni ze-Albania ezinde. Kodwa okwenza ngiyathande kakhulu indawo le ngabantu bakhona. Abantu abanengi abasensimini yethu babetshunyayezwa kancane nje nxa kulemikhankaso eqakathekileyo. Kodwa nxa singabavakatshela, kwezinye izikhathi siyathatha ilanga lonke sixoxe lemuli ezilutshwana nje.”

 Kodwa abakukholisa kakhulu abafowethu labodadewethu laba yikubona abantu besamukela indaba ezinhle. (1  KwabaseThesalonika 2:19, 20) Udadewethu uLaura owathuthela e-Albania eseseyintombazana ulandisa okunye okwenzakala ngesikhathi encedisa edolobheni leFier. Ubika ukuthi ngeminyaka embili lengxenye nje, abantu abangu-120 endaweni leyo baba ngabamemezeli. Abangu-16 bakhona nguye owabafundisa iqiniso!” Udadewethu uSandra yena uthi wake watshumayeza omunye umama owayesebenza emakethe. Umama lowo wacina esenguFakazi njalo wabuyela esigabeni sakibo, uthi becina ukubonana wayeseqalise ukufunda iBhayibhili labantu abangu-15.

 Abanye abamemezeli abathuthela e-Albania balokhu bencedisa khonangale futhi bayayikholisa okumangalisayo inkonzo. Kwezinye izikhathi bayamangala nxa bebona abanye abantu abake babatshumayeza kudala sebelamukele eqiniso. (UmTshumayeli 11:6) Umfowethu uChristopher esike sakhuluma ngaye uthi kwelinye ilanga wahlangana lenye indoda ayeke wafunda layo iBhayibhili kudala esanda kufika e-Albania. Ubika ukuthi wathokoza esizwa indoda leyo imtshela ingxoxo zeBhayibhili ababesiba lazo ngalesosikhathi futhi yona lomkayo basebebhabhathiziwe.” Udadewethu uFederica ubika ukuthi walandwa ngomunye udadewethu kwelinye ibandla wambuza wathi usangikhumbula yini. Wasemtshela ukuthi wake wamtshumayeza kudala eminyakeni engu-9 eyadlulayo. Uthi yena wathi esesukile edolobheni lelo umama lowo wasala wafunda iBhayibhili wathuthuka waze wabhabhathizwa. UFederica ubika ukuthi ekuqaliseni wayezitshela ukuthi akulalutho lokubambekayo ababelwenzile e-Albania kodwa iqiniso yikuthi basebenza sibili ngoba abanye abantu bacina sebengoFakazi.”

 Abafowethu labodadewethu abathuthela e-Albania loba eKosovo bayajabula ngenxa yokuthi uJehova uwubusisile umsebenzi wabo njalo wabenza bathokoza empilweni. Umfowethu uEliseo oseleminyaka eminengi encedisa e-Albania uthi: “Izikhathi ezinengi thina abantu sisuka sithatheke sicabange ukuthi izinto ezigijinyiswa ngabantu bomhlaba lo yizo ezingasenza sithokoze empilweni. Kodwa lokhu yikuziyenga nje. Imithetho kaJehova yiyo kuphela engasenza sithokoze futhi sihlaliseke. Ukuncedisa lapho okulabamemezeli abalutshwana kuyangisiza ukuthi ngikukhumbule lokhu. Ngiyakholisa kakhulu ngoba engikwenzayo kuyabanceda abanye. Engingakutsho yikuthi ngilabangane abanengi abazimisele ukwenza khona kanye engikwenzayo.” Udadewethu uSandra yena uthi: “Ukuyancedisa lapho okulabamemezeli abalutshwana kungenze ngabona ukuthi uJehova usenginike ithuba lokugcwalisa isifiso engangilaso esokuyatshumayela indaba ezinhle kwamanye amazwe. Angizisoli ngitsho ngokuthuthela e-Albania futhi ngiyathokoza okunye okumangalisayo.”