ISAGA lesi sijayelekile kakhulu ebantwini abahlala emazweni asempumalanga ye-Africa njalo akuthandabuzwa ukuthi inengi labantu emhlabeni jikelele liyakuvuma okutshiwo yisaga lesi. Wena-ke? Ubona angani kuhle yini ukuboleka imali kumngane wakho kumbe kwezinye izindawo nje? Kwesinye isikhathi kungakhanya kulicebo elihle sibili, kodwa kuhle yini? Ukuboleka kungadala luphi uhlupho njalo kungasiwisela kuziphi izingozi?

Esinye isitsho sesiSwahili sihle siveze umkantsho wendaba. Sithi: “Ukuboleka kuyabuqeda ubungane.” Kuliqiniso sibili ukuthi isikwelede singabaxabanisa abangane kumbe izihlobo. Kwezinye izikhathi izinto aziphumi ngendlela ebikhangelelwe lanxa umuntu obolekayo ubehlale phansi wahlela kuhle udaba lwakhe. Ngokwesibonelo umnikazi wemali angacaphuka nxa imali yakhe ingasabhadalwanga ngesikhathi ebesivunyelenwe. Lokho kungadala ukungazwanani phakathi komnikazi wemali kanye lomaboleka, laphakathi kwezimuli zabo. Yikho-ke akumelanga ukuthi singaswela imali besesigijimela ukuyaboleka ngoba lokhu kwandise ukuvusa izingxabano.

Ukuboleka imali kungaphambanisa lobungane bethu loNkulunkulu. Njani? Okwakuqala, iBhayibhili lithi umuntu obolekayo kodwa abeseyekela ngabomo ukubhadala mubi. (IHubo. 37:21) Liphinda licacise lokuthi “owebolekayo uyisichaka salowo omebolekayo.” (IZaga 22:7) Nxa ulesikwelede kuyabe kungani uyisigqili somnikazi wemali kuze kube yilapho usumbhadele. Yikho esinye isitsho se-Africa sisithi: “Umuntu angakuboleka inyawo zakhe, uzakuya lapho akutshela ukuthi uye khona.” Lokhu kutsho ukuthi nxa ulesikwelede esikhulu uyabe ungaselayo inkululeko yokwenza okufunayo.

Kuyacaca-ke ukuthi kuqakatheke kakhulu ukuthi umuntu angaboleka imali ayibhadale ngoba angacina esehlezi emeveni. Ukuba lezikwelede ezinengi kungakutshayisa ngekhanda, kwenze ungasabuquthi ngitsho ubuthongo futhi ucine ususebenza ungasaphumuli. Kanti njalo kungaxabanisa indoda lomkayo, futhi kungachitha lomuzi, singasabali ukuhambisana emthethweni kumbe ukuvalelwa ejele. Amazwi akuRoma 13:8 asivula ingqondo sibili ngoba athi: “Lingayekeli umlandu ungahlawulwanga, ngaphandle kokuqhubeka komlandu wokuthandana.”

Konke lokhu esesikhulume ngakho kutshengisa ukuthi kumele umuntu aqaphele nxa efuna ukuboleka imali. Kunganceda kakhulu ukuzibuza imibuzo elandelayo: Kuyini okungenza ngiyekweleda imali sibisibili? Ngifuna ukunakekela imuli yami yini kumbe sekuyibuhwaba nje? Kungabe kubangelwa yikuthi sengifisa impilo ephezulu mina ngingelamali yini? Ezikhathini ezinengi kungcono kakhulu ukuphila ngalokho umuntu alakho kulokuzithwalisa nzima ngokudala izikwelede.

Zingaba khona izinto ezingasijuma silibele siswele lokuthi sizangena ngaphi sesiphelelwe ngamacebo. Loba kunjalo, kumele ukuthi nxa singaboleka imali sitshengise ukuthi sithembekile. Singakwenza njani lokhu?

Okwakuqala, akumelanga siqile umuntu sisithi kasoze abe lendaba lokuthi simbhadale ngoba yena ukhanya elemali enengi kakhulu. Akufanelanga sicabange ukuthi nxa umuntu ehlezi kuhle selomlandu wokuthi asincedise ngemali nxa silohlupho. Kufanele sithembeke emuntwini lo singaboni angani singenza esikufunayo njalo akumelanga sibe lomona nxa sibona abanye bephakathi komhlane lembeleko.​—IZaga 28:22, NW.

Nxa ungaboleka kumele ubhadale masinyane. Lanxa umuntu engatshongo ukuthi uyifuna nini imali yakhe kumele wena umtshele ukuthi uzayibhadala nini, njalo wenze okuthembisileyo. Kungaba kuhle ukuthi libhale phansi elikuvumeleneyo ukuze lingaxabani kusasa. (UJeremiya 32:9, 10) Kulokuthumela omunye umuntu ukuthi akuhambisele imali, nxa kusenza akube nguwe oyibuyiselayo ukuze ufike umbonge. Ukubhadala isikwelede somuntu kwenza lihlale lizwanana. Entshumayelweni yakhe ayenzela eNtabeni uJesu wathi: “Akuthi u ‘Yebo’ wenu abe ngu ‘Yebo’ lo ‘Hatshi’ abe ngu ‘Hatshi.’ ” (UMathewu 5:37) Kanti njalo kumele sihlale siwakhumbula amazwi kaJesu athi: “Kuzo zonke izinto yenzani kwabanye lokho elifuna bakwenze kini.”​—UMathewu 7:12.

IBhayibhili lingasinceda nxa sikuthanda kakhulu ukuboleka imali. Lithi: “Kodwa-ke ukulalela uNkulunkulu ngokusuthiseka kuyinzuzo enkulu.” (1 KuThimothi 6:6) Ngamanye amazwi ukusuthiseka ngalokho esilakho kungasisiza ukuthi singangeni ebunzimeni obubangelwa yizikwelede. Lokhu akulula sibili ngoba siphila emhlabeni olabantu abafisa ukuthola abakufunayo khonapho khonapho. Kodwa thina kumele ‘silalele uNkulunkulu.’ Njani?

Nansi isibonelo sendoda lomkayo abangamaKhristu abahlala e-Asia. Bathi besanda kutshada babehawukela abanye ababesenelisa ukuthenga izindlu. Yikho bakhetha ukuthi basebenzise imali ababeyigcinile lokuthi baboleke enye ebhanga lasezihlotsheni zabo ukuze bathenge eyabo indlu. Kodwa akubanga nsuku ngaki, basebethwele qatha bebhadala izikwelede nyanga zonke. Baqalisa ukungezelela eminye imisebenzi phezu kwababelayo, sebephuza lokutshayisa okokuthi basala belesikhathi esincane sokuba labantwababo. Ubaba walapha ekhaya uthi, “Ngasengihlala ngikhathazekile, ngisizwa ubuhlungu njalo ngingasalali lokulala ngisizwa angani ngetheswe inkalakatha yembokodo ekhanda. Ngangiswela lesikhala sokuphefumula.”

Ngokuhamba kwesikhathi bakhumbula amazwi aku-1 Thimothi 6:6 basebebona ukuthi akula okunye ababengakwenza ngaphandle kokuyithengisa indlu yabo. Kwabathatha iminyaka emibili ukuthi babhadale izikwelede zabo. Lokhu kwabafundisani? Bathi: “Ukukhangela izinto zokuziphilisa ngendlela uNkulunkulu athi sizibone ngayo kuyavikela.”

Abantu abanengi bayasazi isaga sesiSwahili esikhulume ngaso ekuqaliseni kwesihloko lesi. Lanxa kunjalo balokhu bekuthanda ukuboleka. Pho-ke njengoba sesixoxe ngokuthi lona iBhayibhili lithini, uzacabangisisa yini ngombuzo othi, Kuhle Yini Ukuboleka Imali? Nxa ungenza njalo uyabe uhlakaniphile.