SONDELA PHANSI KUKANKULUNKULU
“Ngenza Izinto Zonke Zibe Zintsha”
Uyafisa yini ukuthi wena lemuli yakho libe lempilakahle njalo liphile isikhathi eside? Uyakufuna yini ukuphila emhlabeni ozabe ungelabuhlungu, ukuhlupheka lokufa? Umhlaba onjalo kawusilo phupho. Umhlaba omutsha olokulunga uzabakhona masinyane ngenxa yokuthi uJehova uNkulunkulu uhlose ukuthi ube khona. Khangela ukuthi inhloso yakhe ichazwa njani kuSambulo 21:3-5.—Bala.
“[UNkulunkulu] uzazesula zonke izinyembezi emehlweni abo.” (ISambulo 21:4) Uzakwesula izinyembezi ezinjani? Kakusinyembezi zentokozo loba ezokuvikela amehlo ethu. Kodwa isithembiso sikaNkulunkulu sitsho izinyembezi ezibangelwa yikuhlupheka losizi. UNkulunkulu kasoze nje omise izinyembezi ezinjalo kodwa uzazesula zingaphindi zibe khona ngokususa ukuhlupheka losizi okubangela ukuthi abantu bakhale izinyembezi.
“Akusayikuba khona futhi ukufa.” (ISambulo 21:4) Ukufa yikho osekubangele izinyembezi zosizi ezinengi. UJehova uzakhulula abantu abalalelayo esitheni esiyikufa. Njani? Ngokususa okuyikho okubangela ukufa: isono esasithola ku-Adamu. (KwabaseRoma 5:12) UJehova uzakwenza ukuthi abantu abalalelayo baphelele esebenzisa umhlatshelo wenhlawulo kaJesu. * Isitha sokucina ukufa ‘sizachithwa.’ (1 KwabaseKhorinte 15:26) Abantu abathembekileyo bazenelisa ukuphila ngendlela uNkulunkulu ayehlose ukuthi baphile ngayo, okutsho ukuthi baphile phakade beqine saka.
‘Abusayikuba khona futhi ubuhlungu.’ (ISambulo 21:4) Yibuhlungu obunjani obungasayikuba khona? Bonke ubuhlungu bokusindwa yimicabango, ubuhlungu benhliziyo lobuhlungu bomzimba obubangelwa yisono njalo obenza impilo ibe munyu ezigidini zabantu buzaphela du.
Ukuphila okungela zinyembezi, ukufa lobuhlungu kuzakuba khona esikhathini esiseduze. Kodwa ungabuza ukuthi, ‘Ngaphi?’ ‘Isithembiso sikaNkulunkulu simayelana lokuphila ezulwini yini?’ Hatshi. Khangela ukuthi ngani. Okokuqala, isithembiso leso siqala ngamazwi athi, “ikhaya likaNkulunkulu selisebantwini,” njalo abantu bahlala emhlabeni. (ISambulo 21:3) Okwesibili, isithembiso leso sichaza umhlaba lapho ‘okungasayikuba khona futhi ukufa,’ okutsho ukuthi ngumhlaba owawulokufa kodwa kuyabe kungasekho. Ezulwini kakukaze kube lokufa kodwa kade kwaba khona lapha emhlabeni. Kuyacaca-ke ukuthi isithembiso sikaNkulunkulu sempilo engcono sizagcwaliseka khonapha emhlabeni.
UNkulunkulu uzazomisa zonke izinyembezi ezijuluka ngenxa yokuhlupheka losizi
UJehova ufuna sisikholwe isithembiso sakhe somhlaba omutsha olokulunga. Ngemva nje kokuchaza izibusiso ezizaba khona, ugcizelela ukuba qotho kwesithembiso sakhe ngokuthi: “Ngenza izinto zonke zibe zintsha!” Abesesithi; “Amazwi la aqotho njalo aliqiniso.” (ISambulo 21:5) Zama ukuthi wena lemuli yakho lifunde okunengi ngokuthi lingaba njani phakathi kwezikhonzi ezithokozayo ezizabona isithembiso sikaNkulunkulu esimangalisayo sigcwaliseka.
Izahluko ZeBhayibhili Ongazibala Ngo-December
1 Phetro 1 kusiya kuSambulo 22
^ Ukuze uthole okunengi ngomhlatshelo wenhlawulo kaKhristu, bona isahluko 5 sebhuku elithi IBhayibhili Lifundisani Sibili? elidindwe ngoFakazi bakaJehova.
