Eminyakeni engaba ngu-3 500 eyadlulayo, uJehova uNkulunkulu watshela labo ababemkhonza lokho okwakumele bakwenze ukuze babe lekusasa elihle. Wathi: “Sengimise phambi kwenu ukuphila loba ukufa, izibusiso leziqalekiso. Khathesi zikhetheleni ukuphila, ukuze kuthi lina kanye labantwabenu libe lokuphila.”—UDutheronomi 30:19.

Abantu labo kwakumele bakhethe kuhle ukuze babe lekusasa elihle. Lathi kumele sikhethe kuhle. IBhayibhili liyatsho ukuthi kumele sikhethe ukwenzani ukuze sibe lekusasa elihle. Lithi: “Limthande uJehova uNkulunkulu wenu, lilalele ilizwi lakhe.”—UDutheronomi 30:20.

BALA IBHAYIBHILI: Kumele ubale iBhayibhili ukuze ufunde ngoJehova. Lokhu kuzakwenza umthande. Ungenza njalo, uzabona ukuthi uNkulunkulu uyakuthanda futhi ukufisela okuhle. Uthi ukhuleke kuye ‘ngoba yena ulendaba lawe.’ (1 UPhetro 5:7) IBhayibhili lithembisa ukuthi nxa ungazama ukufunda ngaye, ‘uzasondela kuwe.’—UJakhobe 4:8.

KUSEBENZISE OKUFUNDAYO: Ukulalela uNkulunkulu kutsho ukulandela lokho asitshela khona eBhayibhilini. Ungenza njalo, “uzaphumelela.”—UJoshuwa 1:8.