Abantu abanengi bacabanga ukuthi umuntu kumele abe ngofundileyo futhi onothileyo ukuze kumhambele kuhle esikhathini esizayo. Bacabanga ukuthi amakhampani, izimuli lomphakathi kuyancedakala nxa abantu bangathola imfundo yeyunivesithi. Kanti njalo babona angani ukufunda okuzwayo yikho okungenza umuntu athole umsebenzi olemali lokuthi labo abalemali enengi bayathokoza.

Cabanga ngalokho okwatshiwo ngenye indoda edabuka eChina okuthiwa nguZhang Chen. Yathi, “Ngangicabanga ukuthi kumele ngibe le-degree ukuze ngiqede ubuyanga lokuthi ukuba lomsebenzi olemali kwakuzakwenza ngithokoze futhi ngisuthiseke empilweni.”

Abanengi bafuna ukufunda emayunivesithi adumileyo, mhlawumbe akwamanye amazwe ngoba bacabanga ukuthi ukwenza njalo kuzabenza babe lekusasa elihle. Lokhu bekusenzakala kakhulu abantu bengakavinjelwa ukuthi baye kwamanye amazwe ngenxa yomkhuhlane we-COVID-19. Umbiko ka-2012 owe-Organisation for Economic Co-operation and Development uthi: “Kubo bonke abantu abafunda kwamanye amazwe, amaphesenti angu-52 avela e-Asia.”

Izikhathi ezinengi abazali basebenza nzima kakhulu ukuze abantwababo bayefunda emayunivesithi akwamanye amazwe. UQixiang oweTaiwan uthi: “Abazali bami babenganothanga kodwa basihambisa sobane eMelika ukuthi siyefunda khona.” Abazali bakaQixiang njengabanye abazali abanengi bangena ezikweledini ezesabekayo ukuze babhadalele imfundo yabantwababo.

Imfundo ingenza impilo ibe ngcono kodwa kayihlali isenza ukuthi abafundi bathole lokho akade bekukhangelele. Ngokwesibonelo, abanengi abawutholi umsebenzi abawufunayo lanxa besebenze nzima okweminyaka eminengi baze baboleka lemali enengi ukuze bafunde. Umbiko kaRachel Mui owaphuma kuphephandaba leSingapore okuthiwa yi-Business Times uthi: “Abantu abafunde baqeda eyunivesithi kodwa abangakatholi umsebenzi baqhubeka besiba banengi.” Enye indoda eyisikhwicamfundo okuthiwa nguJianjie ehlala eTaiwan ithi, “Abanengi abawutholi umsebenzi abawufundelayo.”

Labo abathola umsebenzi abawufundeleyo bangacina bebona ukuthi impilo ayihambi ngendlela akade beyifisa. Enye indoda ehlala eThailand okuthiwa nguNiran yathi isivela funda eyunivesithi eseNgilandi yawuthola umsebenzi eyayiwufundele. Ithi: “Imfundo yeyunivesithi yanginceda ngathola umsebenzi engangiwukhangelele oholisa imali enengi kodwa kwakumele ngisebenze nzima njalo okwamahora amanengi ngelanga ukuze ngihole leyomali. Ngokuhamba kwesikhathi inkampani yamisa izisebenzi ezinengi umsebenzi. Lami ngaphelelwa ngumsebenzi. Ngasenginanzelela ukuthi akulamsebenzi ongakwenza uqiniseke ukuthi uzakuba lekusasa elihle.”

Abanothileyo labakhanya bephila impilo entofontofo labo balenhlupho ezigoqela ukungazwanani ezimulini, ukugula lokukhathazeka ngezomnotho. Indoda ehlala eJapan okuthiwa nguKatsutoshi ithi, “Ngangilemali enengi kodwa ngangingathokozi ngoba abanye babelomhawu ngami futhi bengiphatha kubi.” Owesifazana ohlala eVietnam okuthiwa nguLam uthi: “Abantu abanengi bayazama ngamandla abo wonke ukuthi bathole imali enengi ngenxa yokuthi bacabanga ukuthi lokhu kuzabenza bathokoze. Kodwa izikhathi ezinengi bacina bekhathazeka kakhulu, begula njalo behlulukelwa.”

NjengoFranklin, abanengi bacine bekubona ukuthi kulezinto eziqakatheke kakhulu empilweni kulokugijimisa imfundo ephezulu lenotho. Abanye babo badinga ikusasa elihle ngokuba ngabantu abalungileyo lokwenzela abanye izinto ezinhle. Lokhu kuzabenza babe lekusasa elihle yini? Impendulo sizayithola esihlokweni esilandelayo.