NXA wake wavakatshela esihlengeni seSangir Besar e-Indonesia eminyakeni eyadlulayo, kungenzeka ukuthi wake wabona odadewethu abangamaKhristu abathathu ekhunjini lesihlenge leso. Abantu abanengi esihlengeni leso babazi ngomsebenzi wabo wokutshumayela bencedisa abantu ukuze bazwisise iBhayibhili. Kodwa ngalesosikhathi kulomunye umsebenzi ababewenza.

Babengena emanzini bathwale amatshe amakhulu ayelapho, baye lawo ekhunjini. Amanye akhona ayengaba ngangebhora lenguqu. Ngemva kwalokho odade labo babehlala ezitulweni zabo ezincane ezenziwe ngesigodo besebegqula amatshe la besebenzisa izando, bawaphahlaze abe mancane ngangeqanda lenkukhu. Ngemva kwalokho babewafaka emabhakedeni besebewathwala baqanse amastephisi besiya lapho ababehlala khona. Babefika bawafake emasakeni amakhulu ayethwalwa ngamaroli abesesiyasetshenziswa ukulungisa imigwaqo.

Omunye wabodade laba kuthiwa nguHulda. Yena izimo zakhe zazimvumela ukuthi enze umsebenzi lo okwesikhathi eside ukwedlula abanye. Izikhathi ezinengi imali ayeyithola lapho wayeyisebenzisa ukuncedisa abangakibo. Kodwa khathesi kwasekulokunye ayefuna ukukuthenga ngayo. Wayefuna ukuthenga i-tablet ukuze abe le-JW Library. UHulda wayekwazi ukuthi amavidiyo kanye lokunye okunengi okuku-JW Library kwakuzamnceda athuthukise inkonzo yakhe njalo alizwisise ngcono iBhayibhili.

UHulda wayesebenza amahora amabili nsuku zonke ekuseni okwenyanga lengxenye. Wagqula amatshe agcwala iroli encane. Imali yakhe yokuthenga i-tablet yacina isiyenele.

UHulda uthi: “Ngangidinwa kakhulu lomzimba ube buhlungu ngenxa yokugqula amatshe. Kodwa konke lokhu ngakukhohlwa sengile-tablet yami entsha ngoba yayingisiza ukuthi ngithuthukise inkonzo yami njalo kwasekulula lokulungiselela imihlangano yebandla.” UHulda uthi i-tablet yakhe yamnceda lasekuqaliseni kweCovid-19 ngoba wayesenelisa ukungena imihlangano kanye lokutshumayela labanye esebenzisa yona. Sithokoza loHulda ngoba wenelisa ukuthenga i-tablet eyayizamnceda ukuthi enze kuhle inkonzo yakhe.