1-2. (a) Kungani uPhawuli wathi “okukhulu kulakho konke luthando”? (b) Yiphi imibuzo esizaxoxa ngayo?

 NGESIKHATHI uPhawuli ekhuluma ngokholo lethemba lothando, wathi “okukhulu kulakho konke luthando.” (1 Khor. 13:13) Kungani uPhawuli watsho njalo? Ngesikhathi esizayo kuzabe kungasadingeki ukuthi sibe lokholo ezithembisweni zikaNkulunkulu zomhlaba omutsha kumbe ukuthi sibe lethemba lokuthi zizagcwaliseka ngoba ziyabe sezigcwalisekile. Kodwa kuzamele sihlale simthanda uJehova kanye labantu. Sizabe silokhu singezelela indlela esimthanda ngayo kanye lendlela esithanda ngayo abantu kuze kube nini lanini.

² Njengoba kuzamele siqhubeke silothando, asixoxeni ngemibuzo le emithathu. Owokuqala, kungani kumele sithandane? Owesibili, singatshengisa njani ukuthi siyathandana? Owesithathu, singenzani ukuze siqhubeke sithandana kakhulu?

3. Kungani kumele sithandane?

³ Kungani kuqakathekile ukuthi sithandane? Nxa sithandana sitshengisa ukuthi singamaKhristu eqiniso. UJesu watshela abafundi bakhe wathi: “Nxa lithandana, abantu bonke bazakwazi ukuthi lingabafundi bami.” (Joh. 13:35) Kanti njalo nxa sithandana sizahlala simanyene. UPhawuli wathi uthando ‘lwenza simanyane ngokupheleleyo.’ (Kol. 3:14) Kodwa kulesinye isizatho esiqakathekileyo sokuthi kungani kumele sithandane. Umphostoli uJohane wabhalela amaKhristu ayekhonza lawo wathi: “Loba ngubani othanda uNkulunkulu kufanele  athande lomfowabo.” (1 Joh. 4:21) Nxa sibathanda abanye siyabe sitshengisa ukuthi siyamthanda uNkulunkulu.

4-5. Nika isibonelo esitshengisa ukuthi indlela esithanda ngayo uNkulunkulu ingenelana njani lendlela esithandana ngayo.

⁴ Indlela esithanda ngayo uNkulunkulu ingenelana njani lendlela esithanda ngayo abafowethu labodadewethu? Ngokwesibonelo, ake sixoxe ngendlela inhliziyo yethu esebenzelana ngayo lamanye amalunga omzimba. Nxa udokotela angahlola esandleni sethu ngomtshina ukuze abone ukuthi inhliziyo yethu itshaya njani, angenelisa lokubona ukuthi inhliziyo yethu ayila mikhuhlane yini. Lokhu kuhambelana njani lendaba yothando?

⁵ Njengoba udokotela esenelisa ukubona ukuthi inhliziyo yethu injani ngokuhlola isandla, lathi singenelisa ukubona ukuthi simthanda kangakanani uNkulunkulu ngokuhlola indlela esibathanda ngayo abanye. Nxa singananzelela ukuthi kasisabathandi kangako abafowethu labodadewethu, lokho kungabe kutshengisa ukuthi asisamthandi kangako loNkulunkulu. Kodwa nxa sihlala sitshengisa ukuthi siyabathanda abazalwane siyabe sitshengisa ukuthi siyamthanda kakhulu uNkulunkulu.

6. Kungani kungamelanga siphongugoqa izandla nxa singananzelela ukuthi asisabathandi kangako abafowethu labodadewethu? (U-1 Johane 4:7-9, 11)

⁶ Nxa singananzelela ukuthi asisabathandi kangako abafowethu labodadewethu akumelanga siphonguhlala sigoqe izandla ngoba kukhona okuyabe kungasahambi kuhle. Izikhathi ezinengi lokho kuyabe kutshengisa ukuthi ubungane bethu loJehova abusaqinanga. Umphostoli uJohane wakucacisa lokhu ngesikhathi esithi: “Lowo ongamthandiyo umfowabo ambonayo ngeke amthande uNkulunkulu angakaze ambone.” (1 Joh. 4:20) Sifundani? UJehova uyathokoza ngathi kuphela nxa ‘sithandana.’—Bala u-1 Johane 4:7-9, 11.

7-8. Yiziphi ezinye indlela esingatshengisa ngazo ukuthi siyathandana?

⁷ ELizwini likaNkulunkulu kulamavesi amanengi asikhuthaza ukuthi ‘sithandane.’ (Joh. 15:12, 17; Rom. 13:8; 1 Thes. 4:9; 1 Phet. 1:22; 1 Joh. 4:11) Umuntu uthanda ngenhliziyo. Manje kungakhanya njani ukuthi silothando njengoba kungelamuntu oyenelisa ukubona okusenhliziyweni? Singatshengisa ngamazwi ethu langezenzo zethu.

⁸ Kulendlela ezinengi esingatshengisa ngazo ukuthi siyabathanda abafowethu labodadewethu. Nanzi ezinye: “Khulumani iqiniso komunye lomunye.” (Zak. 8:16) “Liqhubeke lihlalisana ngokuthula.” (Mak. 9:50) “Khokhelani ekuhlonipheni abanye.” (Rom. 12:10) “Yamukelanani.” (Rom. 15:7) ‘Qhubekani lithethelelana.’ (Kol. 3:13) “Qhubekani lithwalisana imithwalo esindayo.” (Gal. 6:2) “Qhubekani liduduzana.” (1 Thes. 4:18) ‘Qhubekani lisakhana.’ (1 Thes. 5:11) “Lithandazelane.”—Jak. 5:16.

9. Kungani ukududuza abanye kuyindlela eqakathekileyo yokutshengisa ukuthi siyabathanda? (Khangela lomfanekiso.)

⁹ Ake sixoxe ngeyinye indlela esingatshengisa ngayo ukuthi siyathandana eqanjwe endimeni edlulileyo. Sizahlola amazwi kaPhawuli athi: “Qhubekani liduduzana.” Kungani ukududuza abanye kuyindlela eqakathekileyo yokutshengisa ukuthi siyabathanda? Elinye ibhuku elichasisa iBhayibhili lithi ibala elasetshenziswa nguPhawuli elihunyutshwa ngokuthi ‘ukududuza’ litsho  “ukuma eceleni komuntu umkhuthaze ngesikhathi ephakathi kobunzima.” Nxa siduduza umuntu esikhonza laye osebunzimeni siyabe simncedisa ukuthi aqine njalo aqhubeke ehamba endleleni yokuphila. Ngasosonke isikhathi nxa siduduza abafowethu labodadewethu siyabe sitshengisa ukuthi siyabathanda.—2 Khor. 7:6, 7, 13.

10. Ukuba lozwelo lokududuza abanye kuhambelana njani?

¹⁰ Izikhathi ezinengi umuntu oduduza abanye ngumuntu olozwelo. Kungani sisitsho njalo? Uzwelo yilo olufuqa umuntu ukuthi aduduze abanye njalo adinge indlela zokubancedisa nxa besebunzimeni. Nxa sifuna ukududuza abanye kumele sibe ngabantu abalozwelo. UPhawuli wakuveza ukuthi okwenza uJehova aduduze abanye yikuthi ulozwelo. Wathi uJehova ‘nguYise wesihawu esikhulu loNkulunkulu wenduduzo yonke.’ (2 Khor. 1:3) Evesini le uPhawuli uthi uNkulunkulu ‘ulesihawu esikhulu’ ukuze achaze indlela uJehova abazwela ngayo abantu. Ngakho nxa kuthiwa uNkulunkulu nguYise wesihawu esikhulu kutsho ukuthi uyabazwela kakhulu abantu. Uzwelo yilo olwenza asiduduze “kuloba yiziphi inhlupho” ezisehlelayo. (2 Khor. 1:4) Njengoba nje umthombo okhipha amanzi amnandi usenza ukuthi umuntu owomileyo avuseleleke, uJehova laye uyabavuselela futhi abaduduze abantu nxa besebunzimeni. Thina singamlingisela njani uJehova ekubeni lozwelo lasekududuzeni abanye? Okunye okungasinceda yikuthi sizame ukuba lobuntu obuzakwenza kube lula ukuthi siduduze abanye. Yibuphi lobobuntu?

11. Yibuphi ubuntu obuqanjwe kuKholose 3:12 lo-1 Phetro 3:8 okumele sibe labo ukuze sihlale silothando futhi siduduza abanye?

¹¹ Kuyini okuzasinceda ukuthi sihlale sithandana ukuze ‘siqhubeke siduduzana’ nsuku zonke? Kumele sizame ukuba ngabantu abalesisa kumbe abazwisisa indlela abanye abazizwa ngayo, abathanda abazalwane ngenhliziyo yonke futhi abalomusa. (Bala uKholose 3:12; 1 Phetro 3:8.) Kuzasinceda njani lokhu? Nxa singaba lozwelo lobunye ubuntu lobu, asisoze siyekele ukududuza abanye nxa besebunzimeni. UJesu wathi: “Umlomo ukhuluma okuphuphuma enhliziyweni. Umuntu omuhle ukhipha izinto emagugwini amahle awagcinileyo.” (Mat. 12:34, 35) Ukududuza abafowethu labodadewethu nxa besebunzimeni yindlela eqakatheke kakhulu esitshengisa ngayo ukuthi siyabathanda.

12. (a) Kungani kumele sihlale sizihlola ukuthi sisabathanda yini abanye? (b) Yiwuphi umbuzo esizawuphendula?

¹² Sonke sifuna ‘ukuqhubeka sithandana.’ (1 Joh. 4:7) Lanxa kunjalo kuqakathekile ukuthi sihlale sikhumbula amazwi kaJesu athi: “Lothando lwabanengi luzaphola.” (Mat. 24:12) Kodwa ayisikho ukuthi uJesu wayesithi abafundi bakhe abanengi babezayekela ukuthandana. Lamuhla abantu abanengi emhlabeni lo abalathando, yikho lathi kumele sinanzelele ukuthi singacini sisenza njengabo. Ngakho asixoxeni ngombuzo lo oqakathekileyo: Singabona njani ukuthi lokhu sibathanda kakhulu abazalwane?

13. Kuyini okungenza kube nzima ukuthi sithande abanye?

¹³ Eyinye indlela esingabona ngayo ukuthi sibathanda kangakanani abazalwane yikukhangela ukuthi senza njani nxa kungaba lento ephambanisekileyo. (2 Khor. 8:8) Nxa abanye bangasiphambanisela kumbe benze izinto ezisizwisa ubuhlungu, kungaba nzima  ukuthi siqhubeke sibathanda. Umphostoli uPhetro wathi: “Phezu kwakho konke thandanani kakhulu ngoba uthando lusibekela izono ezinengi.”—1 Phet. 4:8.

14. U-1 Phetro 4:8 uthi uthando luzasinceda ukuthi senzeni? Nika umzekeliso.

¹⁴ Ake siwahlolisise amazwi kaPhetro. Ingxenye yokuqala kavesi 8 ikhuluma ngendlela okumele sithandane ngayo, ithi: “Thandanani kakhulu.” Ngolimi lwesiGrikhi nxa uPhetro wayesithi “thandanani kakhulu” wasebenzisa ibala elitsho “ukunanabuka.” Ingxenye yesibili yevesi iyasitshela ukuthi kuyini okuzakwenzakala nxa sibathanda kakhulu abanye. Uthando luzasenza sisibekele izono zabazalwane. Kungathi uthando silubamba ngezandla silunanabule angathi sinanabula ilembu, luze lusibekele kumbe luvale “izono ezinengi” hatshi esisodwa kumbe ezimbili. Evesini le ukusibekela kutsho ukuthethelela. Njengoba nje isigamba sivala lapho isigqoko esidabuke khona, lothando luyavala izono zabanye lalokho abasiphambanisela khona.

15. Nxa sibathanda kakhulu abafowethu labodadewethu, kuyini esizenelisa ukukwenza? (UKholose 3:13)

¹⁵ Kumele sibathande kakhulu abafowethu labodadewethu okokuthi siyenelisa  ukubathethelela nxa besiphambanisile lanxa lokho kungaba nzima kwezinye izikhathi. (Bala uKholose 3:13.) Nxa sithethelela abanye siyabe sitshengisa ukuthi siyabathanda kakhulu lokuthi sifuna ukuthokozisa uJehova. Kuyini okunye okungasinceda ukuthi sithethelele abanye lokuthi singaphangisi ukuzonda nxa besenza izinto ezisicaphulayo?

16-17. Kuyini okunye okuzasinceda ukuthi singahlali sicabanga ngalokho esiyabe sikuphanjaniselwe ngabazalwane? Nika umzekeliso. (Khangela lomfanekiso.)

¹⁶ Khangela okuhle okwenziwa ngabafowenu labodadewenu hatshi okubi. Ake sithi libuthene labafowenu labodadewenu lizikwejisele nje. Liyazikholisela sibili njalo lithi selivalelisana lithathe ipikitsha. Alithathi eyodwa kodwa lithatha lamanye amabili ukwenzela ukuthi likhethe enhle phakathi kwawo. Uthi usuwakhangela womathathu unanzelele ukuthi kwenye kulomfowethu obengabobotheki. Uhle uyidilithe ngenxa yokuthi ulamanye amabili aphume kuhle njalo lomfowethu lo uphume ebobotheka kuwo.

¹⁷ Umzekeliso lo wamapikitsha uhambelana njani lalokho esikugcina ezingqondweni zethu? Sihlala sizikhumbula izikhathi ezinhle esaba lazo labafowethu labodadewethu. Kodwa kungenzeka ukuthi ngesinye isikhathi umfowethu kumbe udadewethu wenza into eyakucaphulayo kumbe wakhuluma into eyakuzwisa ubuhlungu. Kumele ukugcine engqondweni yini lokho? Hatshi, kumele  uzame ukukucitsha engqondweni ngendlela ongadilitha ngayo ipikitsha engaphumanga kuhle. (Zaga. 19:11; Efe. 4:32) Nxa umfowenu kumbe udadewenu angakuphambanisela ungenelisa ukukhohlwa ngalokho ngenxa yokuthi kunengi okuhle oyabe ukukhumbula ngaye. Izinto ezinhle ezenziwa ngabafowethu labodadewethu yizo kuphela esifuna ukuhlala sizikhumbula.

18. Sifundeni ngothando esihlokweni lesi?

¹⁸ Kungani kumele siqhubeke sithandana kakhulu? Njengoba sibonile, nxa sitshengisa ukuthi siyabathanda abafowethu labodadewethu kuyabe kusitsho ukuthi siyamthanda uJehova. Sitshengisa njani ukuthi siyabathanda? Okunye esingakwenza yikubaduduza. ‘Sizaqhubeka siduduzana’ nxa sibazwela abanye. Kodwa kuyini okungasinceda ukuthi siqhubeke sithandana kakhulu? Yikwenza okusemandleni ethu ukuthi sihlale sibathethelela abazalwane nxa besiphambanisele.

19. Khathesi kungani sekuqakatheke kakhulu ukutshengisa ukuthi siyabathanda abanye?

¹⁹ Khathesi kungani sekuqakatheke kakhulu ukutshengisa ukuthi siyabathanda abanye? Nansi isizatho esasiphiwa ngumphostoli uPhetro, wathi: ‘Ukuphela kwezinto zonke sekuseduze. Ngakho thandanani kakhulu.’ (1 Phet. 4:7, 8) Njengoba umhlaba lo omubi ususiya ekucineni, kuyini esikukhangeleleyo? UJesu wakhuluma labalandeli bakhe wathi: “Lizazondwa yizizwe zonke ngenxa yebizo lami.” (Mat. 24:9) Nxa sifuna ukuqhubeka sithembekile kuJehova lanxa sizondwa, kumele sihlale simanyene. Nxa singenza njalo uSathane uzakwehluleka ukusehlukanisa ngoba siyabe simanyaniswe luthando olusenza ‘simanyane ngokupheleleyo.’—Kol. 3:14; Flp. 2:1, 2.