ISIFUNDO 29
Usukulungele Yini Ukuhlupheka Okukhulu?
“Hlalani lizilungiselele.”—MAT. 24:44.
INGOMA 150 Dingani UJehova Ukuze Lisindiswe
ESIZAKUFUNDA a
1. Kungani kuqakathekile ukulungiselela kungakabi lomonakalo?
UKULUNGISELELA kungayisindisa impilo. Izikhathi ezinengi nxa kungaba lomonakalo abantu abayabe belungiselele yibo abajayele ukusinda baphinde bancedise labanye. Eyinye inhlanganiso enceda abantu ese-Europe ithi: “Ukulungiselela kuhle kungenza abantu basinde.”
2. Kungani kumele silungiselele ukuhlupheka okukhulu? (UMathewu 24:44)
2 ‘Ukuhlupheka okukhulu’ kuzafika abantu belibele. (Mat. 24:21) Kwezinye izikhathi abantu bafikelwa ngumonakalo belibele, kodwa thina siyakwazi ukuthi ukuhlupheka okukhulu kuyeza. Eminyakeni engaba ngu-2 000 eyadlulayo uJesu watshela abalandeli bakhe ukuthi balulungele lolosuku. (Bala uMathewu 24:44.) Nxa siyabe silungiselele kuzakuba lula ukuthi siqinisele ngesikhathi leso esiyabe sinzima futhi sincedise labanye ukuthi benze njalo.—Luk. 21:36.
3. Ukuqinisela lokuba lozwelo lothando kuzasinceda njani ukuthi silungele ukuhlupheka okukhulu?
3 Asixoxeni ngezinto ezintathu ezizasinceda ukuthi sikulungele ukuhlupheka okukhulu. Sizakwenzani nxa kungathiwa sitshele abantu umlayezo wokwahlulelwa besebesithwalisa nzima? (Isam. 16:21) Ngalesosikhathi kuzamele siqinisele, silalele uJehova futhi sithembe ukuthi uzasivikela. Sizakwenzani nxa abazalwane bangaqabuka bengaselazo izinto zokuziphilisa? (Hab. 3:17, 18) Okuzakwenza sibancedise yikuba lozwelo. Sizathini nxa singahlaselwa yizizwe ezimanyeneyo besekudingeka ukuthi sihlale ndawonye labafowethu labodadewethu sibanengi? (Hez. 38:10-12) Ukubathanda kakhulu yikho okuzasinceda ukuthi silwisane lobunzima esiyabe sikubo.
4. IBhayibhili litshengisa njani ukuthi kumele siqhubeke silwisa ukuthi sibe ngabantu abaqiniselayo, abalozwelo futhi abalothando?
4 ILizwi likaNkulunkulu lisikhuthaza ukuthi siqhubeke sisebenza nzima ukuthi sibe ngabantu abaqiniselayo, abalozwelo labalothando. ULukha 21:19 uthi: “Nxa lingaqinisela lizalondoloza impilo zenu.” UKholose 3:12 uthi: “Gqokani uzwelo.” U-1 Thesalonika 4:9, 10 yena uthi: ‘Lina ngokwenu lifundiswa nguNkulunkulu ukuthi lithandane. Loba kunjalo, siyalincenga bafowethu ukuthi liqhubeke likwenza kakhulu lokho.’ Amavesi la ayebhalelwe abafundi ababevele sebetshengisile ukuthi bayaqinisela, balozwelo lokuthi balothando. Kodwa kwakungamelanga basuthiseke ngalokho ababekwenza, kwakumele baqhubeke bethuthuka. Lathi kumele senze njalo. Ukuze sincedakale asihloleni ukuthi amaKhristu akuqala ayetshengisa njani ukuthi ayaqinisela, alozwelo futhi alothando. Ngemva kwalokho sizaxoxa ngokuthi singawalingisela njani ukuze sikulungele ukuhlupheka okukhulu.
QHUBEKA UQINISELA
5. Kuyini okwanceda amaKhristu akuqala ukuthi aqinisele?
5 AmaKhristu akuqala kwakumele aqinisele. (Heb. 10:36) Phezu kwenhlupho ezehlela bonke nje abantu, wona ayelezinye inhlupho ngenxa yokuba ngamaKhristu. Amanengi ayehlukuluzwa ngabakhokheli benkolo abangamaJuda, leziphathamandla ezingamaRoma, aphinde ahlukuluzwe zimuli zawo. (Mat. 10:21) Kanti njalo kwezinye izikhathi ebandleni ayesebenza nzima ukuze angacini esethatheka ngabahlamuki kanye lemfundiso zawo ezazisehlukanisa ibandla. (Imiseb. 20:29, 30) Kodwa amaKhristu la aqinisela. (Isam. 2:3) Kuyini okwawancedayo? Acabangisisa ngabanye abantu okukhulunywa ngabo eBhayibhilini abaqiniselayo, ngokwesibonelo uJobe. (Jak. 5:10, 11) Bathandaza becela ukuthi uJehova abanike amandla. (Imiseb. 4:29-31) Kanti njalo ababecabanga ngakho kakhulu ngumvuzo ababezawunikwa nguJehova nxa bangaqhubeka beqinisela.—Imiseb. 5:41.
6. Ufundani kulokho okwenziwa nguMerita?
6 Lathi singafunda ukuqinisela nxa singahlala sibala ngabantu abaqiniselayo okukhulunywa ngabo eBhayibhilini lasemabhukwini ethu besesicabangisisa ngabo. Omunye udade okuthiwa nguMerita ohlala e-Albania wakwenza lokhu futhi kwamnceda wenelisa ukumelana lokuhlukuluzwa ngabangakibo. Uthi: “Ukubala ngendaba kaJobe eseBhayibhilini kwangikhuthaza kakhulu. Wahlangana lobunzima obukhulu kodwa lanxa wayengakwazi ukuthi ngubani owayebangela inhlupho zakhe wathi: ‘Ngizaze ngizifele ngilokhu ngiqotho!’ (Jobe. 27:5) Nxa ngangicabanga ngobunzima obabonwa nguJobe obami babusala phansi. Mina ngangingcono kuloJobe ngoba ngangikwazi ukuthi ngubani owayebangela inhlupho zami.”
7. Lanxa kungelanto enkulu esihluphayo khathesi, kuyini okumele sikwenze?
7 Okunye okungasinceda ukuthi siqinisele yikuhlala sithandaza kuJehova ngenhliziyo yonke simtshela konke okusihluphayo. (Flp. 4:6; 1 Thes. 5:17) Kungenzakala ukuthi khathesi akulanto enkulu ekuhluphayo. Lanxa kunjalo uyamtshela yini uJehova nxa kulento ekucaphulileyo, kumbe obona angathi ingaphezu kwamandla akho, loba nxa ungakwazi ukuthi wenzeni ngohlupho oluthile? Nxa uhlala ucela uJehova ukuthi akuncedise ngenhlupho ohlangana lazo nsuku zonke, awusoze uthikaze ukwenza njalo nxa usuhlangana lenhlupho ezinkulu ngesikhathi esizayo. Lokhu kuzakwenza ungathandabuzi ukuthi uJehova uyasazi isikhathi esifaneleyo sokukuncedisa lalokho okumele akwenze ukuze akuncedise.—Hubo. 27:1, 3.
UKUQINISELA
Ukuqinisela ebunzimeni esihlangana labo khathesi kuzasinceda ukuthi siqinisele kokuzayo (Khangela indima 8)
8. Okwenzakala kuMira kutshengisa njani ukuthi ukuqinisela khathesi kungasinceda ukuthi siqinisele ngesikhathi esizayo? (UJakhobe 1:2-4) (Khangela lomfanekiso.)
8 Nxa singaqinisela sihlale sithembekile khathesi, sizenelisa ukuqinisela ngesikhathi sokuhlupheka okukhulu. (Rom. 5:3) Kungani sisitsho njalo? Abafowethu labodadewethu bayakubona ukuthi bayenelisa ukuqinisela ebunzimeni obuvukayo nxa sebeke baqinisela ebunzimeni abayabe beke bahlangana labo. Nxa umuntu eseke waqinisela ebunzimeni, kuyamnceda kakhulu ngoba kwenza abe lokholo oluqinileyo lokuthi uJehova ukulungele futhi uzimisele ukumncedisa. Ukholo lwakhe lona lumnceda ukuthi abekezelele ubunzima obulandelayo. (Bala uJakhobe 1:2-4.) Omunye udade okuthiwa nguMira ohlala e-Albania uthi indlela aqinisela ngayo kudala iyamnceda ukuthi aqhubeke eqinisela nxa ehlangana lenhlupho khathesi. Uthi kwezinye izikhathi ubona angathi nguye yedwa olenhlupho ezinengi. Kodwa uyazikhumbuza indlela uJehova abemncedisa ngayo okweminyaka engu-20 edlulileyo, abesezitshela athi: ‘Qhubeka uthembekile. Ungavumi ukuthi konke okwenzakale eminyakeni leyo labo bonke ubunzima obunqobe uncediswa nguJehova kuphelele emoyeni.’ Lawe kungakunceda ukucabangisisa ngendlela uJehova abekunceda ngayo ukuthi uqinisele ebunzimeni. Ungathandabuzi ukuthi uJehova uyakubona konke ukuqinisela kwakho lokuthi uzakunika umvuzo. (Mat. 5:10-12) Nxa ukuhlupheka okukhulu sekuqalisa uyabe usukufundile ukuqinisela futhi uzazimisela ukuqhubeka usenza njalo.
WOBA LOZWELO
9. Abazalwane bebandla le-Antiyokhi yeSiriya batshengisa njani ukuthi babelozwelo?
9 AmaKhristu eJudiya ake ahlaselwa yindlala enkulu. Akuthandabuzwa ukuthi abazalwane bebandla le-Antiyokhi yeSiriya bawazwela kakhulu amaKhristu la sebezwile ukuthi ayesehlaselwe yindlala. Kodwa abacinanga ngokubazwela kuphela, babancedisa. IBhayibhili lithi: “Bazimisela ukuthi ngamunye wabo anikele okusemandleni akhe ukuze kuthunyelwe okokuncedisa abazalwane abahlala eJudiya.” (Imiseb. 11:27-30) Lanxa amaKhristu ayehlaselwe yindlala ayehlala khatshana, amaKhristu e-Antiyokhi ayezimisele ukuwancedisa.—1 Joh. 3:17, 18.
UZWELO
Nxa kungaba lengozi zemvelo siyathola ithuba lokutshengisa ukuthi siyabazwela abazalwane (Khangela indima 10)
10. Kuyini esingakwenza ukuze sitshengise ukuthi siyabazwela abafowethu labodadewethu abehlelwe ngumonakalo? (Khangela lomfanekiso.)
10 Lathi kumele sitshengise ukuthi silozwelo nxa singezwa ukuthi abafowethu labodadewethu sebehlelwe ngumonakalo. Akumelanga siphuze ukubancedisa. Mhlawumbe singabuza abadala ukuthi singancedisa njani. Okunye esingakwenza yikunikela emsebenzini womhlaba wonke kumbe ukubathandazela. b (Zaga. 17:17) Ngokwesibonelo ngo-2020 kwabunjwa amaKhomithi Okusiza Abehlelwe Ngumonakalo edlula 950 emhlabeni wonke ukuze kusizwe labo ababedinga ukuncediswa ngesikhathi somkhuhlane weCOVID-19. Siyababonga kakhulu bonke abancedisa emsebenzini owenziwa ngamakhomithi la! Abazalwane laba bayabazwela abafowethu labodadewethu yikho bebancedisa ngezinto zokuziphilisa futhi bebaqinisa ukholo. Kwezinye izikhathi bayalungisa loba bakhe kutsha izindlu zabo eziyabe zidilikile kanye lezindawo zokukhonzela.—Khangela lo-2 Khorinte 8:1-4.
11. Ukutshengisa ukuthi silozwelo kumdumisa njani uBaba wethu osezulwini?
11 Nxa kungaba lomonakalo besesitshengisa ukuthi siyabazwela abazalwane, abanye bayakunanzelela ukuthi sizimisele ukubancedisa. Ngokwesibonelo ngo-2019 kwaba lesiphepho esikhulu esadiliza iWolu yoMbuso yaseBahamas. Ngesikhathi abafowethu belungisisa iWolu le bacela omunye umakhi ongayisuye Fakazi ukuthi abatshele ukuthi kwakuzakuba yimalini ukwenza umsebenzi othile. Wabatshela wathi: ‘Ngizalenzela mahala umsebenzi lo ngiphinde ngilinike lezinto zokusebenzisa. Ngifisa ukuncedisa inhlanganiso yenu ngoba indlela elibathanda ngayo abangane benu iyangimangalisa.’ Abantu abanengi emhlabeni kabamazi uJehova, kodwa abanengi babo bayakubona okwenziwa ngoFakazi bakaJehova ukuze bancede abanye. Kuyasithokozisa kakhulu ukwazi ukuthi nxa sitshengisa ukuthi silozwelo abantu bangafisa ukuba mazi uNkulunkulu ‘olesihawu esikhulu’!—Efe. 2:4.
12. Ukuba lozwelo kusinceda njani ukuthi silungiselele ukuhlupheka okukhulu? (ISambulo 13:16, 17)
12 Kungani kuzamele sitshengise ukuthi silozwelo ngesikhathi sokuhlupheka okukhulu? IBhayibhili litshengisa ukuthi labo abangasoze basekele ezombusazwe bazathwala amagabha avuzayo khathesi langesikhathi sokuhlupheka okukhulu. (Bala iSambulo 13:16, 17.) Ngalesosikhathi kungadingakala ukuthi kuncediswe abafowethu labodadewethu ukuthi bathole izinto zokuziphilisa. Nxa iNkosi yethu uKhristu uJesu isizokwahlulela, kwangathi ingasithola sitshengisa ukuthi silozwelo ibisisinxusa ukuthi ‘sidle ilifa loMbuso.’—Mat. 25:34-40.
QHUBEKA UTHANDA ABAFOWENU LABODADEWENU
13. URoma 15:7 uthi kuyini okwanceda amaKhristu akuqala ukuthi aqhubeke ethandana?
13 AmaKhristu akuqala ayesaziwa ngokuthandana. Kodwa kwakulula yini ukuthi atshengise ukuthi ayathandana? Ngokwesibonelo ibandla leRoma lalilabantu ababetshiyene. Phakathi kwabo kwakulamaJuda ayekhule etshelwa ukuthi kumele alalele umthetho kaMosi kuphinde kube labezizweni ababekhuliswe ngezindlela ezitshiyeneyo. Kungenzakala ukuthi amanye amaKhristu ayeyizigqili, amanye ekhululekile. Kanti njalo amanye kungenzakala ayelezigqili. AmaKhristu la ayetshiyene kangaka ayengenzani ukuze atshengise ukuthi ayathandana? Umphostoli uPhawuli wawakhuthaza ukuthi ‘ayamukelane.’ (Bala uRoma 15:7.) Wayesitshoni? Ibala elithi “yamukelanani” litsho ukwamukela umuntu ngezandla zombili kumbe ngomusa, kungaba semzini wakho loba ukuthi abe ngumngane wakho. Ngokwesibonelo uPhawuli watshela uFilimoni ukuthi amukele u-Onesimu isigqili esasibalekile wathi: “Mamukele ngazo zombili.” (Filim. 17) Kanti njalo uPrisila lo-Akhwila ‘bathatha’ u-Apholo bamncedisa lanxa wayengakwazi okunengi ngokholo lwamaKhristu njengabo. (Imiseb. 18:26) AmaKhristu la ayetshiyene sibili kodwa kawazange avume ukuthi lokho kuwenze angasazwanani, aqhubeka ephathana kuhle.
UTHANDO
Siyakudinga ukuthandwa ngabafowethu labodadewethu (Khangela indima 15)
14. U-Anna lomkakhe batshengisa njani ukuthi bayabathanda abanye?
14 Lathi singatshengisa ukuthi siyabathanda abafowethu labodadewethu ngokuba lobungane labo. Izikhathi ezinengi singenza njalo, labo bayatshengisa ukuthi bayasithanda. (2 Khor. 6:11-13) Ake sixoxe ngalokho okwenzakala ku-Anna lomkakhe. Bathi besanda kufika kwenye indawo lapho ababezakuba ngabanali khona eWest Africa, umkhuhlane weCOVID-19 wahle waqalisa. Ngenxa yalokho babengeke bahlangane labanye ebandleni kumbe babazi ngcono. Manje batshengisa njani ukuthi bayabathanda abafowethu labodadewethu? Bathintana labo besebenzisa ezempucuko babatshela ukuthi babefisa ukubazi ngcono. Izimuli ababezifonela zabonga kakhulu, lazo zaqalisa ukubafonela kanengi lokubabhalela amameseji. Kungani abanali laba bafuna ukubazi ngcono abafowethu labodadewethu ebandleni labo elitsha? U-Anna uthi: “Indlela abafowethu labodadewethu abatshengise ngayo ukuthi bayangithanda ezikhathini ezinzima lasezikhathini ezinhle ayiphumi enhliziyweni yami lasengqondweni yami futhi lokhu yikho okwenza lami ngifise ukutshengisa ukuthi ngiyabathanda abanye.”
15. Ufundani kuVanessa mayelana lokuthanda abafowethu labodadewethu? (Khangela lomfanekiso.)
15 Abanengi bethu sisemabandleni alabafowethu labodadewethu abavela endaweni ezitshiyeneyo labalobuntu obutshiyeneyo. Okungasinceda ukuthi sibathande kakhulu bonke yikukhangela okuhle abakwenzayo. Omunye udade oseNew Zealand okuthiwa nguVanessa wayekuthola kunzima ukuzwanana labanye ebandleni lakhe. Kodwa kulokuthi abaninele khatshana labo ababelobuntu ayengabuthandi, wakhetha ukuthi azame ukuqeda isikhathi esinengi elabo. Ukwenza njalo kwamnceda wabona ukuthi uJehova ubathandelani. Uthi: “Kusukela umkami waba ngumbonisi wesiqinti sesihlala silabafowethu labodadewethu abanengi abalobuntu obutshiyeneyo futhi sekulula kimi ukuthi ngijayelane labo. Sengibathanda kakhulu lanxa betshiyene. LoJehova uyasithanda lanxa sitshiyene, yikho wasidonsela kuye lanxa silobuntu obutshiyeneyo.” Nxa singafunda ukubona abanye ngendlela uJehova ababona ngayo siyabe sitshengisa ukuthi siyabathanda.—2 Khor. 8:24.
Ngesikhathi sokuhlupheka okukhulu uJehova uzasivikela nxa singaqhubeka simanyene labafowethu labodadewethu (Khangela indima 16)
16. Kungani kuzabe kuqakathekile ukuthi sithande abafowethu labodadewethu ngesikhathi sokuhlupheka okukhulu? (Khangela lomfanekiso.)
16 Ngesikhathi sokuhlupheka okukhulu kuzabe kuqakatheke kakhulu ukuthi sithandane. UJehova uzasivikela njani nxa ukuhlupheka okukhulu sekuqalisa? Ake sibone ukuthi uJehova wabatshelani abantu bakhe ngesikhathi iBhabhiloni yasendulo ihlaselwa. Wathi: “Hambani bantu bami, ngenani ezindlini zenu zangaphakathi, beselivala iminyango yenu. Licatshe okwesikhatshana ulaka luze ludlule.” (Isaya. 26:20) Mhlawumbe lathi kuzamele senze njalo ngesikhathi sokuhlupheka okukhulu. ‘Izindlu zangaphakathi’ zingabe zisitsho amabandla ethu. UJehova uthembisa ukuthi uzasivikela ngesikhathi sokuhlupheka okukhulu nxa singaqhubeka simkhonza ndawonye labafowethu labodadewethu. Yikho kumele sisebenze nzima khathesi ukuthi sibathande kakhulu abafowethu labodadewethu, singaphongubabekezelela nje. Phela kungenzakala ukuthi ukubathanda yikho okuzakwenza sivikeleke.
LUNGISELELA KHATHESI
17. Nxa singalungiselela khathesi, kuyini esizenelisa ukukwenza ngesikhathi sokuhlupheka okukhulu?
17 “Usuku olukhulu lukaJehova” luzabe luyisikhathi esinzima kakhulu kubo bonke abantu. (Zef. 1:14, 15) Labantu bakaJehova labo bazathwala nzima. Kodwa nxa singalungiselela khathesi, sizahlaliseka ngalesosikhathi futhi sincedise labanye. Lanxa singehlelwa zinhlupho sizenelisa ukuqinisela. Nxa abafowethu labodadewethu bephakathi kobunzima, ukubazwela kuzasifuqa ukuthi senze konke okusemandleni ethu ukuthi sibancedise futhi sibanike abakuswelayo. Kanti njalo asisoze sibalahle abafowethu labodadewethu ngoba siyabe sibathanda kakhulukazi. Nxa singenza njalo uJehova uzasinika umvuzo wokuphila phakade emhlabeni lapho esizakhohlwa khona ngokuhlupheka langazo zonke izingozi ezisehlelayo khathesi.—Isaya. 65:17.
INGOMA 144 Khangelisani Amehlo Enu Emvuzweni
a Sekuseduze kakhulu ukuthi ukuhlupheka okukhulu kuqalise. Okuzasinceda ukuthi silungele izinto ezinzima ezizakwenzakala ngalesosikhathi yikuqinisela lokuba lozwelo kanye lokuba lothando. Sizaxoxa ngokuthi kuyini okwanceda amaKhristu akuqala ukuthi abe ngabantu abaqiniselayo, abalozwelo futhi abalothando. Sizaphinda sixoxe ngokuthi singawalingisela njani lokuthi ukwenza njalo kuzasinceda njani ukuthi silungele ukuhlupheka okukhulu.
b Labo abafuna ukuncedisa nxa kube lomonakalo kumele baqale bafile ifomu elithi Local Design/Construction Volunteer Application (DC-50) lelithi Application for Volunteer Program (A-19) besebemelela ukubizwa ukuze bazoncedisa.