SEWAKE wananzelela yini ukuthi abantu abanengi emhlabeni lo bazitshela ukuthi balamalungelo amanengi lokuthi bafuna ukuphathwa ngendlela ethile ngoba bezibona beqakathekile. Lanxa bengaze benzelwe izinto ezinengi kabasuthiseki, bayabe belokhu befuna okunye futhi. IBhayibhili lakutsho ukuthi ezinsukwini zokucina kuzakuba labantu abangabongiyo labacabanga okunceda bona bodwa.—2 Thim. 3:2.

Lakudala babekhona ababezibona beqakathekile bezitshela ukuthi kumele bathole amalungelo athile. U-Adamu lo-Eva babona angathi balelungelo lokuzikhethela okuhle lokubi kodwa labatshonela emini. Ngokuhamba kwesikhathi, iNkosi u-Uziya yakoJuda yacabanga ukuthi ilelungelo lokutshisa impepha ethempelini kodwa kwakungaqondanga eyakwenzayo. (2 Imilan. 26:​18, 19) AbaFarisi labaSadusi labo babebona angathi baqakatheke kakhulu kuNkulunkulu ukwedlula abanye ngenxa nje yokuthi babeyizizukulwane zika-Abrahama.—Mat. 3:9.

Emhlabeni lo esiphila kuwo kugcwele abantu abaziqakathekisayo futhi abazikhukhumezayo njalo lathi singacina sesifuna ukwenza njengabo. (Gal. 5:26) Singacina sicabanga ukuthi kulamalungelo okumele siwaphiwe lokuthi kumele siphathwe ngendlela ethile. Manje singenzani ukuze sikuxwaye lokho? Asiqaleni sibone ukuthi uJehova uyibona njani indaba le. Sizaxoxa ngezimiso ezimbili eziseBhayibhilini.

UJehova nguye otshoyo lokho okumele sikuthole. Nanzi ezinye izibonelo:

•   Emulini indoda kumele ikuzwe ukuthi umkayo uyayihlonipha, lenkosikazi kumele ikuzwe ukuthi umkayo uyayithanda. (Efe. 5:33) Indoda kumele itshengise uthando kumkayo kuphela njalo lenkosikazi layo kumele yenze njalo. (1 Khor. 7:3) Abazali balelungelo lokuthi abantwababo babalalele njalo abantwana labo kumele baluthole uthando oluvela ebazalini njalo babasekele.—2 Khor. 12:14; Efe. 6:2.

• UJehova uthi kumele sibahloniphe abadala bebandla abasebenza nzima. (1 Thes. 5:12) Kodwa abadala abalalo ilungelo lokubusa abafowabo labodadewabo.—1 Phet. 5:​2, 3.

• UNkulunkulu unike ohulumende ilungelo lokuthi bathathe imithelo ebantwini lokuthi bahlonitshwe ngabantu abangaphansi kwabo.—Rom. 13:​1, 6, 7.

UJehova uNkulunkulu wethu olothando usinika lezinto ebesingelalungelo lokuzithola. Thina bekumele sife ngenxa yokuthi sizelwe silesono esasithatha ku-Adamu. (Rom. 6:23) Kodwa uJehova usinika izibusiso ezinengi ngenxa yokuthi ulothando oluqotho. (Hubo. 103:​10, 11) Zonke izibusiso esizitholayo sizithola ngenxa yokuthi ulomusa omkhulu.—Rom. 12:​6-8; Efe. 2:8.

Ungalingiseli indlela abantu bomhlaba lo abacabanga ngayo. Singaqalisa ukucabanga ukuthi silelungelo lokuthola izinto ezinengi ukwedlula abanye kodwa singakunanzeleli lokho. UJesu wakucacisa ukuthi lokho kungenzakala njani esebenzisa umzekeliso wezisebenzi ezabhadalwa udenariyu. Ezinye izisebenzi zaqalisa umsebenzi ekuseni kakhulu, zasebenza usuku lonke ilanga litshisa bhe. Kodwa ezinye zasebenza okwehora elilodwa kuphela. Ababeqalise ukusebenza ekuseni babezitshela ukuthi kumele baphiwe umholo othe xaxa ngenxa yokuthi babesebenze ilanga lonke. (Mat. 20:​1-16) UJesu wathi echasisa umzekeliso wakhe watshengisa ukuthi abalandeli bakhe kumele basuthiseke ngalokho abakuphiwa nguNkulunkulu.

Woba ngumuntu obongayo hatshi okhangelele ukuphiwa izinto ngabanye. (1 Thes. 5:18) Ungalingisela umphostoli uPhawuli ongazange acele ukuthi abazalwane beKhorinte bamnike izinto zokuziphilisa lanxa wayelelungelo lokuthi bamnike. (1 Khor. 9:​11-14) Kumele sibabonge abanye  ngalokho abasinika khona, singakhangeleli ukuthi basinike ngenkani.

Thobeka. Nxa umuntu engaqalisa ukucabanga ukuthi yena uqakathekile kulabanye uyabe esezitshela ukuthi kulezinto ezinengi okumele yena azithole. Okungasinceda ukuthi singaziboni njalo yikuthobeka.

Umphrofethi uDanyeli wayethobekile njalo singafunda kuye. Wayevela emulini eqakathekileyo, emuhle, ekhaliphile futhi kwakulezinto ezinengi ayesenelisa ukuzenza. Konke lokhu kwakungenza ukuthi acabange ukuthi kumele aphathwe ngendlela etshiyene leyabanye lokuthi kumele athole ezinye izinto. (Dan. 1:​3, 4, 19, 20) Kodwa uDanyeli wahlala ethobekile futhi lokhu kwenza waba ligugu kuJehova.—Dan. 2:30; 10:​11, 12.

Akumelanga siqale ukulingisela abantu bomhlaba lo abazibona beqakathekile futhi ababona angathi kumele bathole amalungelo amanengi. Kodwa kasiqhubekeni sithokoziswa yizibusiso esiziphiwa nguJehova ngenxa yomusa wakhe omkhulu.