Kubhabhathizwa izinkulungwane lezinkulungwane zabantu umnyaka ngamunye. Lokhu kwenza kube lesidingo sezakhiwo ezinengi kakhulu ezisetshenziswa ekukhonzeni uJehova. Ngenxa yalokhu, uHlangothi Lokudweba Amapulani Lokwakha (LDC) lwahlela ukuthi ngomnyaka wenkonzo ka-2020 kwakhiwe izakhiwo ezedlula 2 700. a

 Kodwa okunye okwakuhleliwe akusaphumelelanga ngenxa yomkhuhlane we-COVID-19. IKhomithi Ebona Ngomsebenzi Wokudinda yamisa ezinye inhlelo zokwakha ukuze ivikele abafowethu labodawethu njalo kulandelwe imithetho eyayisifakwe ngohulumende. Lanxa kunjalo, kunengi okwenziwe ngomnyaka wenkonzo ka-2020 umkhuhlane lo ungakaqalisi. Ngokwesibonelo, kwakhiwa njalo kwalungiswa amaWolu oMbuso lamaWolu Emihlangano Emikhulu adlula 1 700. Kwaphinda kwalungiswa lezinye izakhiwo zenhlanganiso ezedlula 100 emazweni atshiyeneyo. Ake sibone ukuthi ukwakhiwa kwezakhiwo ezimbili kubancede njani abafowethu labodadewethu.

 Igatsha LeCameroon. Igatsha leCameroon lisedolobheni leDouala. Izakhiwo zegatsha leli zasezizincane futhi kwasekumele zilungiswe. IKhomithi Ebona Ngomsebenzi Wokudinda yananzelela ukuthi ukulungisa igatsha leli kwakuzadinga imali enengi kakhulu. Ngakho yazama ukudinga eyinye indawo lapho okwakungakhiwa khona igatsha elitsha kumbe ukuthi kuthengwe esinye isakhiwo besesilungiswa kodwa kwehlula.

 Kungakayi ngaphi, abazalwane beCameroon bezwa ukuthi uhulumende wayeselungisa umgwaqo enyakatho yeDouala lapho okwakuleWolu Yemihlangano Emikhulu. Kwakuzindaba ezinhle lezo ngoba kwasekulula ukuthi kutholakale amagetsi, amanzi lokunye okwakuzadingwa ligatsha. Yikho iQula Elibusayo lavuma ukuthi kwakhiwe iwofisi yegatsha kweyinye ingxenye yestendi seWolu yemihlangano emikhulu.

 OFakazi basebenza lamakhampani okwakha ayeqhatshiwe futhi lokhu kwanceda ukuthi umsebenzi uphele masinyane lokuthi kongiwe imali. Inhlanganiso yenelisa ukonga imali engamadola eMelika adlula 2 miliyoni ngesikhathi kusakhiwa isakhiwo lesi. Izisebenzi zeBhetheli zathuthela egatsheni leli elitsha umkhuhlane we-COVID-19 ungakaqalisi.

 Abafowethu labodadewethu abahlala egatsheni leli bayakukholisa ukusebenza lokuhlala esakhiweni lesi esitsha njalo bathi igatsha leli liyisipho abasiphiwe nguJehova. Eyinye indoda lomkayo bathi: “Sizimisele ukuqhubeka sisebenza ngamandla ethu wonke ngoba siyasiqakathekisa isipho lesi.”

 Iwofisi Yokuhumutsha Yolimi LwesiTojolabal EseMexico. Okweminyaka eminengi, abahumutshi bolimi lwesiTojolabal babesebenzela egatsheni leCentral America eliseduze ledolobho elikhulu leMexico. Kodwa uhlupho yikuthi ulimi lolu lukhulunywa kakhulu e-Altamirano laseLas Margaritas futhi indawo lezi zikhatshana legatsha ngamakhilomitha angafika 1 000. Lokhu kwakusenza kube nzima ukuthi abahumutshi basebenzise ulimi olukhulunywa ngabantu nsuku zonke. Kwakunzima lokuthi kutholakale abafowethu labodadewethu abakhuluma ulimi lolu ababengarekhodwa kumbe basetshenziswe kweminye imisebenzi yokuhumutsha.

 Lokhu kwenza iKhomithi Yokuloba yeQula Elibusayo ivume ukuthi abahumutshi bathuthele endaweni elabantu abanengi abakhuluma isiTojolabal. Kwathengwa isakhiwo sasesilungiswa futhi ukwenza njalo kwakutshiphe ukwedlula ukwakha isakhiwo esitsha kumbe ukuyarenta kweyinye indawo.

 Omunye umhumutshi wathi: “Okweminyaka engu-10 ngisegatsheni, angizange ngihlangane ngitsho lemuli eyodwa ekhuluma isiTojolabal. Kodwa khathesi iwofisi yokuhumutsha isilapho okukhulunywa khona ulimi lwami futhi ngixoxa labantu abalukhulumayo phose nsuku zonke. Lokhu kungincede kakhulu emsebenzini wokuhumutsha ngoba sengifunde amabala amatsha amanengi.”

 Nxa izimo zivuma, sihlela ukwakha lokulungisa amawofisi okuhumutsha angu-75 kanye lezakhiwo ezisetshenziselwa izikolo zenhlanganiso. Kuleminye njalo imisebenzi emikhulu ezakwenziwa emagatsheni angu-8. Ngokwesibonelo kuzakwakhiwa igatsha elitsha e-Argentina, e-Italy kanye lesinye isakhiwo esizakuba seRamapo, eNew York. Kumele kwakhiwe lamaWolu oMbuso angu-1 000 futhi kulungiswe langu-4 000. Kanti njalo kulezakhiwo zokukhonzela ezedlula 6 000 ezingasekho esimeni esihle.

 Ivela ngaphi imali yokwenza imisebenzi yonke le? Impendulo siyithola kulokho okwatshiwo ngumfowethu uLázaro González ngesikhathi ekhuluma ngokwakhiwa kwewofisi yokuhumutsha yesiTojolabal. Wathi: “Imali evela kubamemezeli abakhangelwa ligatsha lethu ayinengi kangako. Yikho siyababonga kakhulu abafowethu labodadewethu emhlabeni wonke ngeminikelo yabo ngoba besingeke senelise ukwakha amawofisi okuhumutsha sisodwa. Uncedo lolu lwenze abahumutshi benelisa ukuyasebenzela lapho okukhulunywa khona indimi abazihumutshayo. Sibabonga singaqedi abafowethu labodadewethu abasemhlabeni wonke!” Liqiniso sibili ukuthi iminikelo yenu yiyo eyenza senelise ukwakha izakhiwo ezinengi kangaka futhi eminengi yakhona yenziwa ku-donate.isa4310.com.