IVangeli Elabhalwa NguMathewu 28:1-20
28 ISabatha lathi selidlulile, sekulilanga lokuqala leviki, uMariya Magadalena lomunye uMariya bafika ekuseni kakhulu bezokhangela ingcwaba.+
2 Bathola kube lokuzamazama komhlaba okwesabekayo ngoba kwakwehle ingilosi kaJehova* ivela ezulwini yafika yagiqela eceleni ilitshe elalivale ingcwaba, yasihlala phezu kwalo.+
3 Yayikhazimula njengombane njalo izigqoko zayo zazimhlophe nke njengongqwaqwane.+
4 Ababelindile besaba beyibona, babanjwa ngumhedehede behluleka lokunyakaza. Basebengathi ngabantu abafileyo.
5 Kodwa ingilosi yathi kwabesifazana: “Lingesabi, ngiyakwazi ukuthi lidinga uJesu obulewe ngokubethelwa esigodweni.+
6 Kakho lapha ngoba uvusiwe njengoba wayetshilo.+ Buyani lizobona indawo abebekwe kuyo,
7 beselisuka masinyane liyetshela abafundi bakhe ukuthi usevusiwe kwabafileyo. Uzakuya eGalile,+ lizamthola khonale. Yikho ebengizolitshela khona.”+
8 Ngakho bahle basuka ethuneni besesaba kodwa bethabe befile, bagijima besiyabikela abafundi bakhe.+
9 Khonokho nje uJesu wabahlangabeza wathi: “Salibonani!” Basondela kuye babamba inyawo zakhe bamkhothamela.
10 UJesu wasesithi kubo: “Lingesabi! Hambani liyetshela abafowethu ukuze baye eGalile, yikho lapho abazangibona khona.”
11 Abesifazana laba bathi belokhu besendleleni, abanye abalindi+ bangena edolobheni bayatshela abaphristi abakhokhelayo konke okwakwenzakele.
12 Abaphristi babuthana labadala bacebisana, basebenika amasotsha inhlamvu zesiliva ezinengi,
13 bathi kuwo: “Litshele abantu lithi, ‘Abafundi bakhe bafike bamtshontsha ebusuku silele.’+
14 Nxa lokhu kungafika endlebeni zombusi,* thina sizamchasisela ukuthi kuhambe njani, lina lingakhathazeki.”
15 Ngakho bathatha inhlamvu zesiliva benza lokho ababekutsheliwe. Indaba le yamemetheka yagcwala phakathi kwamaJuda futhi kulokhu kunjalo kuze kube lamuhla.
16 Abafundi abangu-11 baya eGalile,+ entabeni uJesu ayehlele ukuthi uzahlangana labo kuyo.+
17 Bathi bembona bamkhothamela kodwa abanye babethandabuza ukuthi nguye.
18 UJesu wasondela wasekhuluma labo wathi: “Sengiphiwe amandla wonke ezulwini lasemhlabeni.+
19 Ngakho hambani liyekwenza abantu bezizwe zonke babe ngabafundi,+ libabhabhathize+ ebizweni likaBaba leleNdodana lelomoya ongcwele,
20 libafundise ukulandela izinto zonke engilitshele zona.+ Hlalani likhumbula ukuthi ngizabe ngilani zonke izinsuku kuze kube yisiphetho somumo lo wezinto.”*+
