UHezekheli 7:1-27
7 Ilizwi likaJehova laphinda lafika kimi lathi:
2 “Ndodana yomuntu, iNkosi Enkulu uJehova ithi ebantwini bako-Israyeli: ‘Isiphelo sesifikile! Isiphelo sesifikile kulo lonke ilizwe.
3 Isiphelo sesifikile kini futhi ngizathululela ulaka lwami phezu kwenu. Ngizalahlulela ngokufanele izenzo zenu, ngilithonisise ngenxa yazo zonke izinto ezenyanyekayo elizenzayo.
4 Angisoze ngilizwele futhi angisoze ngibe lesihawu kini,+ kodwa ngizalipha umvuzo wezenzo zenu njalo lizahlupheka ngenxa yezenzo zenu ezenyanyekayo.+ Lapho-ke lizakwazi ukuthi mina nginguJehova.’+
5 “Nanku okutshiwo yiNkosi Enkulu uJehova: ‘Kuza umonakalo omkhulu! Umonakalo ongakaze ubonakale.+
6 Isiphelo siyeza! Siyeza sibili! Sizalifikela lilibele, sesiseduze.
7 Sekuze kwalifica lina elihlala elizweni. Isikhathi siyeza, losuku seluseduze.+ Akulamsindo wokuthokoza ezintabeni kodwa kulokuxokozela kuphela.
8 “‘Sekuseduze ukuthi ngehlisele intukuthelo yami kini+ lokuthi ngithululele lonke ulaka lwami phezu kwenu.+ Ngizalahlulela ngokufanele izenzo zenu, ngilithonisise ngenxa yazo zonke izinto ezenyanyekayo elizenzayo.
9 Angisoze ngilizwele futhi angisoze ngibe lesihawu kini,+ kodwa ngizalipha umvuzo wezenzo zenu njalo lizahlupheka ngenxa yezenzo zenu ezenyanyekayo. Lapho-ke lizakwazi ukuthi mina Jehova yimi engilijezisayo.+
10 “‘Usuku luyeza futhi seluseduze!+ Sekuze kwalifica, induku isihlumile lokuzigqaja sekumilile.
11 Udlakela selube yinduku yokuqeda ububi.+ Bonke bazaphela futhi inotho yabo labantu babo lodumo lwabo kuzatshabalala.
12 Isikhathi siyeza, losuku luzafika! Othengayo kangathokozi, lothengisayo kangakhali ngoba ngithukuthelele wonke umuntu.*+
13 Othengisayo kasoze abuyele kulokho akuthengisileyo lanxa ubengasinda ngoba izinto ozibone embonweni zizakwehlela wonke umuntu. Akulamuntu ozaphenduka futhi kakho ozasindisa impilo yakhe ngoba bonke benza okubi.
14 “‘Balitshayile icilongo,+ bonke abantu balungela impi, kodwa akulamuntu oyakulwa ngoba ngithukuthelele wonke umuntu.+
15 Phandle kwedolobho kulenkemba,+ phakathi kulendlala lesifo esibi. Ophandle uzabulawa ngenkemba, abaphakathi bona bazaqedwa yisifo lendlala.+
16 Abazasinda bazabalekela ezintabeni njalo bazakhala njengamajuba ahlala ezigodini, ngamunye ekhaliswa yisono sakhe.+
17 Izandla zabo zizaphela amandla lamadolo abo ajuluke amanzi.*+
18 Sebegqoke izembatho zamasaka+ futhi bayaqhaqhazela ngokwesaba. Bonke bazayangeka baphuce amakhanda.*+
19 “‘Bazaphosela isiliva sabo emigwaqweni futhi bazalenyanya igolide labo. Isiliva sabo kanye legolide labo akusoze kubasindise ngosuku lolaka lukaJehova.+ Abasoze badle basuthe izisu zabo zigcwale ngoba izinto lezi* seziyisikhubekiso esenza bone.
20 Babezigqaja ngobuhle bemiceciso yabo futhi babeyisebenzisa ukwenza* imifanekiso lezithombe ezenyanyekayo,+ yikho ngizakwenza bayenyanye.
21 Ngizayinika abantu bezinye izizwe bazithathele yona,* ngiyinike labantu abenza okubi ibe ngeyabo bayingcolise.
22 “‘Ngizabafulathela+ njalo bazangcolisa indawo yami eligugu.* Izigebenga lazo zizangena kuyo ziyingcolise.+
23 “‘Yenza iketane*+ ngoba elizweni kubulawa abantu abanengi abagwetshelwa ukufa bona bengelacala.+ Edolobheni kugcwele udlakela.+
24 Ngizaletha isizwe esilesihluku ukwedlula zonke izizwe+ futhi sizathatha izindlu zabo.+ Ngizaqeda ukuzigqaja kwabalamandla njalo izindawo zabo ezingcwele zizangcoliswa.+
25 Nxa sebehlupheka bazadinga ukuthula kodwa abasoze bakuthole.+
26 Inhlupho zizabuya zelekene, lemibiko ifike ilandelana. Abantu bazadinga umbono kumphrofethi+ bawuswele njalo umthetho uyabe ungasatholakali kubaphristi, labadala bengaselawo amacebo.+
27 Inkosi izalila,+ abakhokheli baphele amandla. Izandla zabantu abahlala elizweni zizaqhaqhazela ngenxa yokwesaba. Ngizabaphatha ngokufanele izenzo zabo, ngibahlulele ngendlela abakade besahlulela ngayo. Lapho-ke bazakwazi ukuthi mina nginguJehova.’”+
Amabala angaphansi
^ Lapha kutshiwo ukuthi bonke abathengisayo labathengayo abasoze bazuze lutho ngoba bonke bazatshabalala.
^ Lapha kutshiwo ukuthi bazazithambisela ngenxa yokwesaba.
^ Lapha kutshiwo ukuthi bazaphuca amakhanda belila.
^ Lapha kutshiwo isiliva sabo legolide labo.
^ Lapha kutshiwo imiceciso yabo eyayenziwe ngesiliva langegolide.
^ Lapha kutshiwo isiliva sabo legolide labo ababelisebenzisa ukwenza izithombe.
^ Kumbe, “efihlakeleyo.” Lapha kungabe kutshiwo iNgcwelengcwele eyayisethempelini likaJehova.
^ Lapha kutshiwo amaketane okubopha abantu abathunjiweyo.
