UHezekheli 37:1-28
37 Isandla sikaJehova sasiphezu kwami njalo uJehova wangithatha ngomoya wakhe wayangihlalisa phakathi laphakathi kwesigodi+ esasigcwele amathambo.
2 Wangidlulisa phakathi kwawo ngabona amathambo amanengi kakhulu kulesosigodi njalo ayewome kakhulu.+
3 Wangibuza wathi: “Ndodana yomuntu, amathambo la angaphinda aphile yini?” Mina ngaphendula ngathi: “Nkosi Enkulu Jehova, wena nguwe okwaziyo.”+
4 Ngakho wathi kimi: “Phrofetha ukhulume lamathambo la uthi kuwo, ‘Zwanini ilizwi likaJehova lina mathambo awomileyo:
5 “‘INkosi Enkulu uJehova ithi kini: “Ngizafaka umoya phakathi kwenu futhi lizavuka liphile.+
6 Ngizafaka imisipha lenyama phezu kwenu, ngilivale ngejwabu besengifaka umoya phakathi kwenu, livuke liphile. Lapho-ke lizakwazi ukuthi mina nginguJehova.”’”
7 Ngakho ngaphrofetha njengoba ngangitsheliwe. Ngathi ngisaphrofetha kwezwakala umsindo, amathambo ekhehlezela futhi eqalisa ukuhlangana, ithambo ngalinye lihlangana lelinye.
8 Ngabona amathambo la esiba lemisipha lenyama futhi esiba lejwabu phezulu. Kodwa kwakulokhu kungelamoya phakathi kwawo.
9 Waqhubeka wathi kimi: “Phrofetha ukhulume lomoya. Phrofetha ndodana yomuntu ukhulume lomoya uthi, ‘Nanku okutshiwo yiNkosi Enkulu uJehova: “Buya moya uvela emaceleni womane, uphephethe phezu kwabantu laba ababulawayo ukuze bavuke baphile.”’”
10 Yikho ngaphrofetha njengoba nje wayetshilo. Umoya wangena phakathi kwabo bavuka baphila, basebesukuma bama ngenyawo.+ Babebanengi kakhulu.
11 Wasesithi kimi: “Ndodana yomuntu, amathambo la amela bonke abantu bako-Israyeli.+ Bathi, ‘Amathambo ethu omile lethemba lethu selitshabalele.+ Sekuphelile ngathi.’
12 Ngakho phrofetha uthi kubo, ‘Nanku okutshiwo yiNkosi Enkulu uJehova: “Ngizavula amangcwaba enu+ ngilikhiphe kuwo bantu bami, ngililethe elizweni lako-Israyeli.+
13 Nxa sengivula amangcwaba enu futhi sengilikhipha kuwo bantu bami,+ lizakwazi ukuthi mina nginguJehova.”’
14 ‘Ngizafaka umoya wami phakathi kwenu livuke liphile+ njalo ngizalihlalisa elizweni lenu. Lapho-ke lizakwazi ukuthi mina Jehova ngitshilo lokuthi sengikwenzile,’ kutsho uJehova.”
15 Ilizwi likaJehova laphinda lafika kimi lathi:
16 “Ndodana yomuntu, thatha isigodo ubhale kuso ukuthi, ‘EsikaJuda labantu bako-Israyeli abamanyene laye,’+ ubusuthatha esinye ubhale ukuthi, ‘EsikaJosefa esimela u-Efrayimi labo bonke abako-Israyeli abamanyene laye.’+
17 Ngemva kwalokho hlanganisa izigodo lezi zombili zibe yisigodo esisodwa esandleni sakho.+
18 Nxa abantu bakini bangathi kuwe, ‘Sitshele phela ukuthi konke lokhu kutshoni,’
19 wena baphendule uthi, ‘Nanku okutshiwo yiNkosi Enkulu uJehova: “Ngizathatha isigodo esisesandleni sika-Efrayimi, esikaJosefa lezizwana zako-Israyeli ezimanyene laye, ngisihlanganise lesigodo sikaJuda kube yisigodo esisodwa+ esandleni sami.”’
20 Izigodo obhala kuzo kumele uzibambe ngesandla ukuze bonke bazibone.
21 “Nxa usukwenzile lokhu batshele uthi, ‘Nanku okutshiwo yiNkosi Enkulu uJehova: “Ngizakhipha abako-Israyeli ezizweni abakuzo, ngibaqoqe ezindaweni zonke ngibalethe elizweni labo.+
22 Ngizabenza babe yisizwe esisodwa kulo lonke ilizwe,+ bahlale ezintabeni zako-Israyeli. Bazabuswa yinkosi eyodwa+ futhi abasoze baqhubeke beyizizwe ezimbili loba imibuso emibili eyehlukeneyo.+
23 Abasoze baphinde bazingcolise ngezithombe zabo ezenyanyekayo* lezenzo zabo ezenyanyekayo kanye lezono zabo zonke.+ Ngizabenza batshiye ukuba ngabantu abangathembekanga ngoba yikho okwabenza bona. Ngizabahlambulula babe ngabantu bami, mina ngibe nguNkulunkulu wabo.+
24 “‘“Inceku yami uDavida izakuba yinkosi yabo+ futhi bonke bazakuba lomelusi oyedwa.+ Bazalandela imithetho yami yokwahlulela, bagcine yonke imilayo yami.+
25 Bazahlala elizweni engalipha inceku yami uJakhobe lapho okhokho benu ababehlala khona.+ Bazahlala kulo kuze kube nini lanini+ belabantwababo* labantwana babantwababo,+ njalo inceku yami uDavida izakuba ngumkhokheli wabo* kuze kube phakade.+
26 “‘“Ngizakwenza labo isivumelwano sokuthula+ esizahlala kuze kube nini lanini. Ngizabapha indawo yokuhlala, ngibandise babe banengi+ futhi ngizabeka indawo yami engcwele phakathi kwabo kuze kube phakade.
27 Itende lami lizakuba* phakathi kwabo.* Ngizakuba nguNkulunkulu wabo, bona babe ngabantu bami.+
28 Nxa indawo yami engcwele isiphakathi kwabako-Israyeli kuze kube nini lanini, izizwe zizakwazi ukuthi mina Jehova ngenza abako-Israyeli babe ngcwele.”’”+
Amabala angaphansi
^ Ibala lesiHebheru elisetshenziswe lapha lingabe lihambelana lebala elitsho ubulongwe futhi lisetshenziswa nxa kukhulunywa ngento enyanyisayo.
^ Kumbe, “izakuba yinkosana yabo.”
^ NgesiHebheru, “belamadodana abo.”
^ Kumbe, “Indawo yami yokuhlala izakuba.”
^ Kumbe, “phezu kwabo.”
