UHezekheli 10:1-22
10 Ngathi ngisabukele ngabona phezu kwesibhakabhaka esasiphezu kwamakhanda amakherubhi kulento eyayinjengelitshe lesafire. Yayikhanya phezu kwawo futhi yayingathi yisihlalo sobukhosi.+
2 UNkulunkulu wasesithi endodeni eyayigqoke isembatho selineni:+ “Ngena phakathi laphakathi kwamaviri,+ ngaphansi kwamakherubhi, ugcwalise izandla zakho ngamalahle avuthayo+ aphakathi kwamakherubhi, ubusuwahaza edolobheni.”+ Ngakho indoda le yangena ngiyikhangele.
3 Amakherubhi ayemi enyakatho kwethempeli ngesikhathi indoda le ingena. Iguma langaphakathi lasibekelwa liyezi.
4 Inkazimulo kaJehova+ yasuka phezu kwamakherubhi yaya esitubhini somnyango wethempeli futhi ithempeli lalilokhu lisibekelwa liyezi.+ Iguma lalibukhazikhazi ngenxa yenkazimulo kaJehova.
5 Umsindo wempiko zamakherubhi wawuzwakala egumeni elingaphandle, kungani lilizwi likaNkulunkulu uSomandla nxa ekhuluma.+
6 Watshela indoda eyayigqoke isembatho selineni wathi: “Thatha umlilo phakathi laphakathi kwamaviri, phakathi kwamakherubhi.” Ngakho yangena yafika yama eceleni kweviri.
7 Elinye ikherubhi lelulela isandla salo emlilweni owawuphakathi kwamakherubhi,+ lathatha umlilo lawufaka ezandleni zendoda eyayigqoke isembatho selineni,+ yawamukela yasiphuma.
8 Amakherubhi ayelokunye okwakungathi yizandla zomuntu ngaphansi kwempiko zawo.+
9 Ngathi ngisabukele ngabona amaviri amane eceleni kwamakherubhi, iviri elilodwa liseceleni kwekherubhi elilodwa. Amaviri la ayekhanya ecazimula njengelitshe lekhrisolithe.+
10 Nxa wawuwakhangele, wonke womane ayefanana futhi kwakungathi iviri liphakathi kwelinye iviri.*
11 Ayesithi nxa ehamba enelise ukuya kuloba yiliphi icele engazange atshibilike ngoba ayesiya lapho amakhanda amakherubhi ayekhangele khona futhi ayengatshibiliki.
12 Amakherubhi ayegcwele amehlo umzimba wonke, emhlane lasezandleni lasempikweni. Emaceleni kwamakherubhi kwakulamaviri futhi womane ayegcwele amehlo yonke indawo.+
13 Ngezwa ilizwi limemeza amaviri lisithi, “Maviri, phambili!”
14 Ikherubhi ngalinye lalilobuso obune. Ubuso bokuqala babungobekherubhi, obesibili bungobomuntu, obesithathu bungobesilwane njalo obesine bungobokhozi.+
15 Amakherubhi ayephakama aye phezulu. Amakherubhi la kwakuyizo izidalwa eziphilayo engazibona emfuleni uKhebhari.+
16 Ayesithi angahamba amaviri lawo ahambe. Amakherubhi ayesithi angaphakamisa impiko zawo ukuze aphakame esuka phansi, amaviri ayengatshibiliki futhi ayengasuki eceleni kwamakherubhi.+
17 Amakherubhi ayesithi angama, amaviri lawo ame njalo ayesithi angaphakama, lamaviri aphakame ngoba umoya owawusebenza kuwo yiwo owawusebenza lasemavirini.
18 Inkazimulo kaJehova+ yasuka esitubhini somnyango wethempeli yayakuma phezu kwamakherubhi.+
19 Ngathi ngisabukele, amakherubhi aphakamisa impiko zawo asuka phansi. Athi esuka, amaviri lawo ahamba lawo. Amakherubhi afika ama egedini lendlu kaJehova elisempumalanga njalo inkazimulo kaNkulunkulu ka-Israyeli yayiphezu kwawo.+
20 Lezi yizo izidalwa eziphilayo engangizibone ngaphansi kwesihlalo sobukhosi sikaNkulunkulu ka-Israyeli ngisemfuleni uKhebhari.+ Ngananzelela ukuthi izidalwa lezo kwakungamakherubhi.
21 Ngasinye sezidalwa lezi ezine sasilobuso obune lempiko ezine futhi ngaphansi kwempiko zaso sasilokunye okwakungathi yizandla zomuntu.+
22 Ubuso bazo babufanana lobuso engabubona ngisemfuleni uKhebhari.+ Isidalwa ngasinye sasihamba siqonde phambili.+
Amabala angaphansi
^ Kukhanya iviri ngalinye lalinqume phakathi kwelinye.
