ImiSebenzi Yabaphostoli 10:1-48
10 EKhesariya kwakulendoda okwakuthiwa nguKhoneliya. Yayingumkhokheli wamasotsha* ayesebuthweni le-Ithali.*
2 Indoda le yayizinikele kuNkulunkulu futhi yona labendlu yayo babemesaba uNkulunkulu. Yayisipha abayanga izipho* ezinengi njalo ihlala ithandaza kuNkulunkulu imncenga.
3 Ngelinye ilanga sekungaba lihora lesi-9,*+ yabona ingilosi kaNkulunkulu embonweni. Ingilosi yathi kuyo: “Khoneliya!”
4 UKhoneliya wayikhangela selumbulele uvalo wabuza wathi: “Kuyini Nkosi?” Yona yathi kuye: “Imithandazo yakho lezipho ozinika abayanga* kufikile kuNkulunkulu njalo uhlezi ekukhumbula lokho.+
5 Khathesi thuma abantu eJopha bayebiza indoda okuthiwa nguSimoni ebizwa langokuthi nguPhetro.
6 Indoda le ivakatshele uSimoni umtshuki wezikhumba olendlu eseduze kolwandle.”
7 Ingilosi eyayikhuluma laye yathi isuka wabiza izinceku zakhe ezimbili lesotsha elalisesaba uNkulunkulu,
8 wabalandisela konke okwakwenzakele wasebathuma eJopha.
9 Ngelanga elilandelayo bathi besendleleni sebezafika edolobheni, uPhetro wakhwela phezu kophahla lwendlu esiyathandaza. Kwakungaba lihora lesithupha.*
10 Kodwa wezwa eselambile esefuna ukudla. Bathi besalungisa ukudla wafikelwa ngumbono.+
11 Wabona izulu livulekile kusehla okwakungathi* lilembu elikhulu lelineni, kusehliselwa emhlabeni kubanjwe ngamakhona womane.
12 Phakathi kwakulemihlobo yonke yezinyamazana ezilenyawo ezine, lezinanakazana zomhlaba kanye lezinyoni.
13 Ilizwi laselisithi kuye: “Phetro, sukuma uhlabe udle!”
14 Kodwa uPhetro wathi: “Hatshi Nkosi, mina angikaze ngidle loba yini engcolileyo lengahlambulukanga.”+
15 Ilizwi laselikhuluma laye okwesibili lathi: “Yekela ukubiza izinto esezihlanjululwe nguNkulunkulu ngokuthi zingcolile.”
16 Lokhu kwenzakala kwaze kwaba kathathu, okwakubonwe nguPhetro kwasekuthathwa masinyane kwasiwa ezulwini.
17 UPhetro wathi elokhu esathithibele ezibuza ukuthi umbono ayewubonile wawungabe usitshoni, amadoda ayethunywe nguKhoneliya abuza ukuthi indlu kaSimoni yiphi, asefika ama egedini.+
18 Amemeza ebuza ukuthi endlini leyo kwakulesivakatshi esithiwa nguSimoni yini obizwa langokuthi nguPhetro.
19 UPhetro wathi esacabanga ngombono lo, umoya+ wathi: “Kulamadoda amathathu akudingayo.
20 Ngakho yehla uhambe lawo. Ungathikazi ngitsho lakancane ngoba yimi engiwathumileyo.”
21 UPhetro wasesehla waya emadodeni ayethunyiwe, wathi: “Yimi umuntu elimdingayo. Ngingalinceda ngani?”
22 Athi kuye: “Sithunywe nguKhoneliya,+ umkhokheli wamasotsha olungileyo futhi omesabayo uNkulunkulu. Isizwe sonke samaJuda sikhuluma kuhle ngaye. Ingilosi engcwele imnike umlayo ovela kuNkulunkulu, yathi akubize endlini yakhe ukuze azwe ukuthi uthini.”
23 Ngakho uPhetro wangenisa amadoda la endlini.
Ngelanga elilandelayo wahamba lawo elabanye abazalwane beJopha.
24 Bafika eKhesariya ngosuku olulandelayo. UKhoneliya wayevele ebalindele, ebize izihlobo labangane bakhe ayebathanda.
25 UPhetro wathi engena, uKhoneliya wamhlangabeza wazilahlela phansi enyaweni zakhe wamkhothamela.
26 Kodwa uPhetro wamsukumisa wathi: “Sukuma, lami ngingumuntu njengawe.”+
27 Wangena phakathi elokhu exoxa laye, wathola abantu abanengi bebuthene.
28 Wasesithi kubo: “Likwazi mhlophe ukuthi akukho emthethweni ukuthi umJuda adlelane lomuntu womunye umhlobo+ lokuthi amvakatshele. Kodwa uNkulunkulu usengitshengisile ukuthi akumelanga ngibize loba ngubani ngokuthi ungcolile kumbe ngokuthi kahlambulukanga.+
29 Yikho ngingazange ngithikaze ngitshelwa ukuthi ngize lapha. Ngicela ukubuza, lingibizeleni?”
30 UKhoneliya wasesithi: “Ezinsukwini ezine ezidlulileyo nxa sibala kusukela khathesi, bengikhuleka endlini yami ngehora lesi-9.* Ngithe ngisakhuleka ngabona indoda ebigqoke izigqoko ezikhazimulayo imi phambi kwami,
31 yasisithi: ‘Khoneliya, uNkulunkulu usewuzwile umthandazo wakho njalo usewamukele, wakhumbula lezipho obuzinika abayanga.*
32 Ngakho thuma abantu eJopha bayebiza uSimoni obizwa langokuthi nguPhetro. Indoda le ivakatshele uSimoni umtshuki wezikhumba ohlala eduze kolwandle.’+
33 Yikho ngihle ngathuma abantu ukuthi bazokubiza. Wenze kuhle wabuya. Sonke sesikhona phambi kukaNkulunkulu ukuthi sizwe zonke izinto uJehova* athe uzikhulume.”
34 UPhetro esezwe lokho waqalisa ukukhuluma wathi: “Khathesi sengizwisisa sibili ukuthi uNkulunkulu kakhethi+
35 kodwa kuzo zonke izizwe, uyamamukela umuntu omesabayo futhi owenza okulungileyo.+
36 Wathumela ilizwi ebantwini bako-Israyeli ukuze atshumayele kubo izindaba ezinhle zokuthula+ okuzakuba khona ngoJesu Khristu, yena oyiNkosi yabantu bonke.+
37 Liyayazi indaba okwakukhulunywa ngayo kulo lonke eleJudiya kusukela eGalile,+ ngemva kobhabhathizo uJohane ayetshumayela ngalo.
38 Yayimayelana loJesu waseNazaretha, owagcotshwa nguNkulunkulu ngomoya ongcwele+ langamandla, wahamba esenza okuhle kulo lonke ilizwe futhi esilisa bonke ababecindezelwe nguDeveli,+ ngenxa yokuthi uNkulunkulu wayelaye.+
39 Singofakazi bazo zonke izinto azenza elizweni lamaJuda kanye laseJerusalema. Lanxa kunjalo bambulala ngokumbethela esigodweni.*
40 UNkulunkulu wamvusa ngelanga lesithathu+ wasemvumela ukuthi abonakale* ebantwini,
41 hatshi kubo bonke kodwa kubofakazi uNkulunkulu ayevele esebakhethile, thina esadla sanatha laye ngemva kokuvuka kwakhe kwabafileyo.+
42 Wasitshela lokuthi sitshumayeze abantu njalo sifakaze kuze kucace+ ukuthi lo nguye obekwe nguNkulunkulu ukuthi abe ngumahluleli wabaphilayo labafileyo.+
43 Bonke abaphrofethi bafakaza ngaye+ besithi wonke umuntu okholwa kuye uyathethelelwa izono ngebizo lakhe.”+
44 UPhetro wathi esakhuluma, umoya ongcwele wehlela phezu kwabo bonke ababelalele ilizwi.+
45 Amakholwa* asokiweyo ayebuye loPhetro amangaliswa yikuthi isipho samahala somoya ongcwele sasithululelwa lasebantwini bezinye izizwe.
46 Phela ayebezwa bekhuluma ngezindimi ezitshiyeneyo bedumisa uNkulunkulu.+ UPhetro wasesithi:
47 “Ukhona yini ongayala ukuthi abantu laba babhabhathizwe+ ngamanzi bona sebewamukele umoya ongcwele njengathi?”
48 Ngakho wabatshela ukuthi babhabhathizwe ebizweni likaJesu Khristu,+ basebemcela ukuthi ahlale labo okwensukwana.
Amabala angaphansi
^ Lapha kutshiwo umkhokheli wamasotsha angu-100.
^ Lapha kutshiwo iqembu lebutho lamaRoma elilamasotsha angu-600.
^ NgesiGrikhi, “izipho zesihawu.” Khangela iNgcazelo Yamabala.
^ Kumbe, “ngabo-3 emini.”
^ NgesiGrikhi, “lezipho zakho zesihawu.” Khangela iNgcazelo Yamabala.
^ Kumbe, “ngabo-12 emini.”
^ NgesiGrikhi, “isitsha esasingathi.”
^ Kumbe, “ngabo-3 emini.”
^ NgesiGrikhi, “lezipho zakho zesihawu.” Khangela iNgcazelo Yamabala.
^ Khangela iSengezo ku-A5.
^ Kumbe, “esihlahleni.”
^ NgesiGrikhi, “avezwe.”
^ Kumbe, “Abathembekileyo.”
