UJesu wayengelasono yikho wayengakaze athwaliswe nzima ngezinye izinto ezazikhathaza abantu. Lanxa kunjalo wayebazwela kakhulu. Wayezimisele ukubenzela loba yini, kungelani lokuthi kwakukhanya kukuncane njani. Uzwelo yilo olwalumenza ancede abanye. Bala izibonelo ezikuSahluko 32, 37, 57, 99.

Abantu bonke nje, abancane labadala babekhululekile ukuthi balande uJesu ngoba kazange abe ngumuntu ongelasikhathi labantu njalo wayengaziphakamisi. Abantu babekhululekile nxa belaye ngoba babekubona ukuthi ulendaba labo. Bala okunengi ngalokhu kuSahluko 25, 27, 95.

UJesu wayehlala ethandaza ngenhliziyo yonke kuYise, eyedwa loba elabafundi bakhe. Wayengathandazi esidla kuphela kodwa wayethandaza kanengi. Wayekhuleka ebonga uYise, emdumisa futhi emcela ukuthi amncedise akhethe kuhle. Khangela izibonelo ezikuSahluko 24, 34, 91, 122, 123.

Lanxa uJesu wayengabe efuna ukuphumula, wayezinikela ukunceda abanye. Ayekuqakathekisa kakhulu ngokwakufunwa ngabanye. Kumele simlingisele lakulokhu. Khangela izibonelo ezikuSahluko 19, 41, 52.

UJesu wafundisa abafundi bakhe ukuthi bathethelele. Kanti njalo watshengisa ukuthi uyakwenza lokho akufundisayo ngoba wayebathethelela abafundi bakhe kanye labanye. Cabangisisa ngezibonelo ezikuSahluko 26, 40, 64, 85, 131.

Kwakuvele kukhulunyiwe ukuthi uMesiya wayengasoze amukelwe ngamaJuda amanengi lokuthi wayezabulawa yizitha zakhe. Lokhu kwakungenza uJesu angazihluphi kangako ngokunceda abantu. Kodwa yena wayekutshisekela ukukhonza kweqiniso. Isibonelo sakhe singanceda abalandeli bakhe abahlangana labantu abangelandaba labakutshumayelayo kumbe ababaphikisayo. Bala iSahluko 16, 72, 103.

UJesu wayetshiyene kakhulu labantu abalesono. Ngokwesibonelo, wayelolwazi olunengi futhi ukuhlakanipha kwakhe kwakudlula khatshana okwabo. Akuthandabuzwa ukuthi wayelamandla futhi ekhaliphe ukwedlula abanye njengoba wayengelasono. Lanxa kunjalo, wayezithoba azimisele ukwenzela abanye imisebenzi. Bala ngalokhu kuSahluko 10, 62, 66, 94, 116.

UJesu wayehlala ebabekezelela abaphostoli bakhe kanye labanye nxa babesehluleka ukulingisela isibonelo sakhe kumbe ukwenza lokho ayebatshela khona. Wayengadinwa ukuphindaphinda ukubafundisa izinto ezazizakwenza basondele kuJehova. Bala ngezibonelo zokubekezela kukaJesu kuSahluko 74, 98, 118, 135.