ITlaixpantijkauan Jehová kinpaleuiaj inmikniuan uan oksekimej tlaltikpaktlakamej ijkuak okachi moneki. Ijkon kiteititiaj tlasojtlalistli, pampa ijkon moixmatij akinmej melauak kichiuaj ken Cristo (Juan 13:35).

Nikan moijtoa ken otlapaleuijkej itech 12 metstli tlen yopanok hasta itlajkotia xiuitl 2012. Nochtin okinyolseuijkej uan okinyolchijkajkej ijkon ken nochipa kichiuaj. Itech Kali kanin tekitij iTlaixpantijkauan Jehová okinpejpenkej seki tokniuan pampa tlapaleuiskej. Noijki otlapaleuijkej tlanechikolmej tlen katej kanin opanok tlaxixinilistli.

Japón. Itech tonal 11, metstli marzo, xiuitl 2011, chikauak otlalolinki uan opanok se tsunami, ik non, okintlaxixinili akinmej chantij ik norte itech ueyi altepetl Japón. ITlaixpantijkauan Jehová okinpaleuijkej ninmej tlaltikpaktlakamej ika tomin, tekitl uan okinpaleuijkej pampa kiyektlaliskej tlen okipolojkej. Xikita nin video pampa tikitas ken otlapaleuijkej itech ueyi altepetl Japón ijkuak chikauak otlalolinki.

Brasil. Itech nin ueyi altepetl sapanoa miakej omikej pampa oatemik uan otlauitonki. Pampa tlapaleuiskej iTlaixpantijkauan Jehová, okititlankej 42 toneladas tlakuali tlen amo niman ijtlakaui, 20,000 botellas ika atl, 10 toneladas tlakemitl, tlamantli tlen ika tlachipauaskej 5 toneladas, pajtli uan okseki tlamantli.

República del Congo. Ijkuak kanin kintlaliaj armas otoponki, naui kalmej tlen inmiaxka sekimej iTlaixpantijkauan Jehová oxixinkej uan 28 kalmej oijtlakauikej. Akinmej ijkon okinpanok okintitlanilijkej tlakuali, tlakemitl uan omokalotijkej inkalijtik oksekimej iTlaixpantijkauan Jehová tlen ompa chantij.

República Democrática del Congo. Okinmakakej pajtli akinmej okinmajsik cólera. Pampa oatemik nin ueyi altepetl, okinmakakej tlakemitl akinmej okintlaxixinili atl. Uan okinpajtikej akinmej okatkaj itech campos de refugiados, okinmakakej xinachtli pampa tlatokaskej uan okintliokolijkej miak tlakemitl.

Venezuela. Sapanoa okiauik, oatemik nin ueyi altepetl uan otlauitonki. Tokniuan akinmej tlapaleuiaj ijkuak panoa se tlaxixinilistli okinpaleuijkej 288 iTlaixpantijkauan Jehová. Okinchijchijkej kanaj 50 kalmej. Noijki ninmej tokniuan okinpaleuijkej akinmej uelis itlaj kinpanoskia inkalijtik pampa omoskalti atl itech altepetl Valencia.

Filipinas. Pampa opanok chikauak ejekakiauitl noso tifones, oatemik nin altepetl. Kali kanin tekitij iTlaixpantijkauan Jehová okititlanki tlakuali uan tlakemitl, uan iTlaixpantijkauan Jehová tlen ompa chantij otlapaleuijkej otlachipajkej ijkuak ayakmo okachi okatka atl.

Canadá. Ijkuak otlatlak kuajyo itech altepetl Alberta, iTlaixpantijkauan Jehová okititlanilijkej tlanechikol tlen itoka Slave Lake seki tomin pampa kinpaleuiskej ma tlachipauakan. Pampa amo nochi okitekitiltijkej tomin tlen okinmakakej, non tlanechikol okitemakakej non tomin pampa ma kinpaleuikan oksekimej tokniuan kanin panoa se tlaxixinilistli itech okseki altepemej.

Costa de Marfil. Ijkuak ayamo opeuaya guerra, ijkuak omoteuijtoka uan ijkuak otlanki guerra okintitlanilijkej tlakuali, okinkalotijkej uan okinpajtijkej akinmej okatkaj itech non ueyi altepetl.

Fiyi. Oatemik nin ueyi altepetl pampa sapanoa okiauik, uan okintlaxixinili 192 kalchanejkej, okinpolojkej inyolkauan tlen ika omopanoltiayaj. Ninmej kalchanejkej okinmakakej tlakuali.

Ghana. Ijkuak oatemik ik este itech nin ueyi altepetl, okintitlanilijkej tlakuali, xinachtli uan okinchijchiuilijkej inkaluan akinmej okintlaxixinili atl.

Estados Unidos. Pampa opanok se tornado, oijtlakauikej 66 inkaluan iTlaixpantijkauan Jehová itech eyi altepemej uan oxixinkej 12 kalmej. ITlaixpantijkauan Jehová otlapaleuijkej ma kiyektlalikan inkal, maski miakej okipiayaj seguro.

Argentina. Ik sur itech nin ueyi altepetl, iTlaixpantijkauan Jehová okinpaleuijkej akinmej oijtlakauik inkal pampa volcán okikajka tlekonextli.

Mozambique. Pampa itech nin ueyi altepetl sapanoa tlauaki, okintitlanilijkej tlakuali kanaj 1,000 tlaltikpaktlakamej.

Nigeria. Okinpaleuijkej ika tomin 24 tokniuan tlen omokokojkej pampa okinpanok itlaj amo kuali ijkuak oyayaj itech se autobús. Uan ik norte itech nin ueyi altepetl sapanoa moteuiaj pampa tlatlamantli intlaneltokilis, ik non, okinpaleuijkej akinmej okikajtejkej inkal.

Benín. Pampa oatemik nin ueyi altepetl, okintitlanilijkej pajtli, tlakemitl, mosquiteros, atl uan okinkalotijkej akinmej ompa chantij.

República Dominicana. Ijkuak opanok chikauak ejekakiauitl noso huracán Irene, miakej tlanechikolmej otlapaleuijkej ika tomin uan otlapaleuijkej pampa kinyektlaliskej inkaluan.

Etiopía. Okintitlanilijkej tomin ome altepemej kanin sapanoa tlauaki uan se altepetl tlen oatemik.

Kenia. Okinpaleuijkej ika tomin pampa sapanoa tlauaki.

Malaui. Okinpaleuijkej akinmej okatkaj itech se campo de refugiados itech altepetl Dzaleka.

Nepal. Pampa otlauitonki, oxixinki ikal se siuatl tlen iTlaixpantijka Jehová. Oksekimej iTlaixpantijkauan Jehová okipaleuijkej uan okichijchiuilijkej se kali.

Papúa Nueva Guinea. Seki tlakamej tlen amo yolkualmej okintlatijkej chikueyi inkaluan sekimej iTlaixpantijkauan Jehová. San niman okinpaleuijkej.

Rumania. Sekimej iTlaixpantijkauan Jehová oxixinkej inkaluan pampa oatemik nin ueyi altepetl. Okinpaleuijkej pampa kinyektlaliskej inkaluan.

Malí. Pampa itech ueyi nin altepetl ayakmo okipiayaj tlakuali pampa amo otlamochi, akinmej chantij itech ueyi altepetl Senegal okinpaleuijkej ika tomin.

Sierra Leona. Sekimej iTlaixpantijkauan Jehová akinmej tlapajtiaj uan chantij itech ueyi altepetl Francia, oyajkej itech non ueyi altepetl pampa kinpaleuiskej akinmej otlajyouijkej pampa okatka guerra.

Tailandia. Pampa sapanoa okiauik, oatenkej miakej altepemej. Tokniuan tlen tlapaleuiaj ijkuak panoa se tlaxixinilistli, okinchipajkej uan okinyektlalijkej 100 kalmej uan 6 Kalmej kanin monechikoaj iTlaixpantijkauan Jehová.

República Checa. Ijkuak oatemik nin ueyi altepetl, oxixinkej miakej kalmej, pero iTlaixpantijkauan Jehová tlen chantij itech ueyi altepetl Eslovaquia okinpaleuijkej ninmej tokniuan.

Sri Lanka. Nochtin okinpaleuijkej akinmej okintlajyouilti tsunami.

Sudán. ITlaixpantijkauan Jehová okintitlanilijkej tlakuali, tlakemitl, kakmej uan lonas de plastico akinmej oyajkej itech okse altepetl pampa sapanoa moteuiaj kanin chatij.

Tanzania. Pampa sapanoa okiauik, 14 kalchanejkej okipolojkej nochi tlen okipiayaj. Oksekimej iTlaixpantijkauan Jehová okintitlanilijkej tlakemitl uan okseki tlamantli tlen okinpoloaya. Noijki okichijchijkej se kali.

Zimbabue. Pampa itech nin ueyi altepetl sapanoa tlauaki amo onka tlakuali. Okintitlanilijkej tlakuali uan tomin akinmej amo itlaj okipiayaj.

Burundi. Okinpaleuijkej uan okinpajtikej sekimej tlaltikpaktlakamej tlen katej itech campo de refugiados.