Itech altepetl Queens (Nueva York), 23 iTlaixpantijkauan Jehová okiselijkej se tlamachtil pampa momachtiskej kitlajtoltiskej uan tlajtoskej tlajtoli bengalí, nin tlajtoa itech ueyi altepetl Bangladesh uan seki altepemej itech ueyi altepetl India. Akinmej otlamachtijkej, tlen noijki iTlaixpantijkauan Jehová, okitekitiltijkej miak tlamantli pampa okachi totoka ma momachtikan non tlajtoli.

Ijkon ken otlamachtijkej tlajtoli bengalí, noijki tlamachtiaj ika okseki tlatlamantli tlajtolmej itech ueyi altepetl Estados uan itech okseki altepemej. Ijkon kichiuaj pampa uelis kintlapouiskej ika Biblia ika intlajtol nochtin tlaltikpaktlakamej.

Magaly, akin omomachti tlajtoli bengalí, okijto: “Okachi yimiakej akinmej tlajtoa tlajtoli bengalí itech nin altepetl. Miakej kinekij kimatiskej intlanankilis seki tlajtlanilmej tlen miak inpati, ken ¿tleka onka miak tlajyouilistli? Ijkuak nikintlapouia tlen kichiuas toTajtsin Dios itech Tlaltikpak, okachi kinekij kimatiskej. Pero amo ueli ijkon nikchiua pampa amo nikmati intlajtol”.

Akinmej tlamachtiaj, kitekitiltiaj miak tlamantli tlen kinpaktia akinmej momachtijtokej pampa okachi totoka ma momachtikan. Se tlamantli tlen kichiuaj, ken ijkuak kijtoaj se tlajtoli, itlaj kichiuaj pampa kimokauiskej non tlajtoli.

Ijkuak tlami se tlamachtil, tokniuan tlen momachtijtokej san niman kintlapouitiuij akinmej tlajtoaj non tlajtoli pampa kitekitiltiskej tlen omomachtijkej. Magaly noijki kijtoa: “Sapanoa kinpaktia tlaltikpaktlakamej kimatiskej nimomachtijtok intlajtol. Ijkuak kitaj nimochijchikaua nimomachtis okachi kipatioitaj tlen titetlapouiaj”.

ITlaixpantijkauan Jehová amo san momachtiaj se tlajtoli, noijki kinmachtiaj sekimej pampa noijki ma tlamachtikan. San itech metstli enero, xiuitl 2006 hasta metstli enero, xiuitl 2012 tekitl tlen mochiua itech ueyi altepetl Estados Unidos, yokichijkej 38 tlamachtilmej pampa momachtiskej se tlajtoli uan yokinmachtijkej 2,244 pampa noijki tlamachtiskej. Itech tonal 1, metstli septiembre, xiuitl 2012, yomochijkej kanaj 1,500 tlamachtilmej ika 37 tlatlamantli tlajtolmej, itech ueyi altepetl Estados Unidos.